Ladki Bahin Yojana's August Installment: लाडक्या बहिणींसाठी आनंदाची बातमी! 339 कोटींचा निधी वळता झाला, आता बँकेत कधी जमा होणार?

महाराष्ट्र शासनाच्या सामाजिक न्याय व विशेष सहाय्य विभागाने मुख्यमंत्री माझी लाडकी बहीण योजनेच्या ऑगस्ट महिन्याच्या हप्त्याच्या वितरणासाठी (Ladki Bahin Yojana's August Installment) ३३९.१४ कोटी रुपयांचा निधी महिला व बालविकास विभागाला वितरित करण्यास मान्यता दिली आहे. राज्य सरकारकडून या योजनेच्या लाभार्थी महिलांना दरमहा १,५०० रुपये दिले जातात. आता हा निधी वितरित झाल्याने, महिलांना ऑगस्ट महिन्याचे १,५०० रुपये नेमके कधी मिळणार, याकडे सर्वांचे लक्ष लागले आहे.

शासन निर्णयातील तरतुदी

सामाजिक न्याय व विशेष सहाय्य विभागाने २४ सप्टेंबर रोजी यासंदर्भात शासन निर्णय जारी केला आहे. या शासन निर्णयानुसार, ३३९.१४ कोटी रुपये महिला व बालविकास विभागाकडे वितरित करण्यास मान्यता देण्यात आली आहे. सामाजिक न्याय विभागाकडून दिल्या जाणाऱ्या या निधीचे वाटप अनुसूचित जाती प्रवर्गातील महिला लाभार्थ्यांना व्हावे, याची दक्षता घ्यावी, असे स्पष्ट निर्देश या शासन निर्णयात देण्यात आले आहेत.

राज्य सरकारच्या महिला व बालविकास विभागाकडून जुलै २०२४ मध्ये मुख्यमंत्री माझी लाडकी बहीण योजना सुरू करण्यात आली होती. योजनेचा लाभ केवळ पात्र लाभार्थ्यांनाच मिळावा, यासाठी शासनाने ई-केवायसी प्रक्रिया राबवली. या प्रक्रियेनंतर मुख्यमंत्री माझी लाडकी बहीण योजनेतील लाभार्थ्यांची संख्या १ कोटी ६४ लाखांवर आली असून, यामुळे या योजनेवरील शासनाचा खर्चही कमी झाला आहे.

 लाडकी बहीण योजना लाभार्थी संख्येत घट का झाली?

योजना सुरू झाली त्यावेळी लाभार्थी संख्या २ कोटी ४६ लाख इतकी होती. मात्र ई-केवायसी प्रक्रियेनंतर आणि योजनेच्या नियमांनुसार पात्र न ठरल्याने अनेक महिलांची नावे यादीतून वगळण्यात आली. अडीच लाख रुपयांपेक्षा अधिक वार्षिक उत्पन्न असलेल्या कुटुंबातील महिला अपात्र ठरल्या. काही लाभार्थी महिलांच्या घरी चारचाकी वाहन असल्याने त्यांचीही नावे वगळण्यात आली, तर काही महिलांचे वय ६५ वर्षे पूर्ण झाल्याने त्यांची नावेही यादीतून कमी झाली.

२,१०० रुपयांच्या आश्वासनाचे काय झाले?

विधानसभा निवडणुकीपूर्वी महायुती सरकारने मुख्यमंत्री माझी लाडकी बहीण योजनेच्या लाभार्थी महिलांना दरमहा २,१०० रुपये देण्याचे आश्वासन दिले होते. गणेशोत्सवादरम्यान एका कार्यक्रमात महिला व बालविकास मंत्री आदिती तटकरे यांना या आश्वासनाबाबत प्रश्न विचारण्यात आला होता. यावर उत्तर देताना, २,१०० रुपयांबाबतचा निर्णय मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्राताई पवार योग्य वेळी घेतील, असे तटकरे यांनी स्पष्ट केले होते.

निधी वितरित झाल्यानंतर आता महिला व बालविकास विभागाकडून प्रत्यक्ष हप्ता लाभार्थी महिलांच्या बँक खात्यात जमा करण्याची प्रक्रिया लवकरच सुरू होण्याची शक्यता आहे. दरम्यान, दरमहा १,५०० रुपयांऐवजी २,१०० रुपये कधी मिळणार, याबाबत लाभार्थी महिलांमध्ये उत्सुकता कायम असून, यासंदर्भातील अंतिम निर्णयाची प्रतीक्षा आहे.