Gokhale Bridge

मुंबईमधील (Mumbai) अंधेरी पूर्व आणि पश्चिमेला जोडणारा गोपाळ कृष्ण गोखले पूल (Gopal Krishna Gokhale Bridge), जो गेल्या अडीच वर्षांपासून (नोव्हेंबर 2022 पासून) बंद होता, तो 11 मे 2025 रोजी पूर्णपणे वाहतुकीसाठी खुला होणार आहे. बृहन्मुंबई महानगरपालिका (BMC) ने या पूलाच्या पुनर्बांधणीचे काम पूर्ण केले असून, पहिल्या टप्प्यात फेब्रुवारी 2024 मध्ये एक बाजू खुली झाली होती. हा पूल पश्चिम द्रुतगती महामार्ग (Western Express Highway) आणि एस.व्ही. रोड यांना जोडतो, तसेच तेली गल्लीमार्गे अंधेरी पूर्वेशी संलग्न आहे. हा पूल पूर्णपणे झाल्यानंतर अंधेरी, वर्सोवा, विलेपार्ले आणि जुहू या परिसरातील लाखो प्रवाशांना दिलासा मिळेल

गोपाळ कृष्ण गोखले पूल हा अंधेरीतील एक महत्त्वाचा दुवा आहे. अंदाजे 90 कोटी रुपये खर्चून बांधलेला, नवीन गोखले पूल 90 मीटर लांबीचा आहे. हा 99.8 मीटर लांबीच्या विद्याविहार पुलानंतर शहरातील दुसरा सर्वात लांब रेल्वे ओव्हरब्रिज बनला आहे. 3 जुलै 2018 रोजी या पूलाचा पादचारी भाग कोसळला, ज्यामध्ये दोन जणांचा मृत्यू झाला आणि तीन जण जखमी झाले. यानंतर संरचनात्मक तपासणीत पूल जीर्ण झाल्याचे आढळले, आणि सप्टेंबर 2022 मध्ये तो असुरक्षित घोषित करण्यात आला. परिणामी, 7 नोव्हेंबर 2022 पासून पूल पूर्णपणे बंद करण्यात आला.

पूलाच्या पुनर्बांधणीची जबाबदारी बीएमसी आणि पश्चिम रेल्वे यांच्यावर होती, कारण पूलाचा काही भाग रेल्वे मार्गावर आहे. डिसेंबर 2022 ते मार्च 2023 या कालावधीत पूलाचे विघटन (Demolition) पूर्ण झाले, आणि डिसेंबर 2023 मध्ये पुनर्बांधणीला सुरुवात झाली. गोखले पूल बंद झाल्यामुळे अंधेरीतील वाहतूक व्यवस्थेवर मोठा ताण आला. एस.व्ही. रोड आणि आसपासच्या रस्त्यांवर वाहतूक कोंडी वाढली, आणि स्थानिक रहिवाशांना, विद्यार्थ्यांना आणि व्यावसायिकांना मोठा त्रास सहन करावा लागला. (हेही वाचा: Mumbai Local Megablock on 11th May: मुंबईकरांनो लक्ष द्या! शहरातील मध्य, हार्बर आणि पश्चिम लोकल मार्गावर रविवारी मेगा ब्लॉक, जाणून घ्या सविस्तर)

आता उद्यापासून हा पूल प्रवाशांसाठी सुरु होत आहे. यामुळे अंधेरी पूर्व आणि पश्चिम दरम्यानचा प्रवास वेळ कमी होईल, आणि एस.व्ही. रोडवरील वाहतूक कोंडी कमी होण्यास मदत होईल. याशिवाय, बेस्ट बस सेवाही पुन्हा सुरू होण्याची शक्यता आहे, ज्यामुळे सार्वजनिक वाहतुकीवर अवलंबून असलेल्या प्रवाशांना दिलासा मिळेल.