MLM Scheme Fraud Case: मल्टी लेव्हल मार्केटिंग स्कीम फसवणूक प्रकरण; KBC  कंपनीची 84 कोटी रुपयांपेक्षा जास्त मालमत्ता जप्त
ED on MLM Scam | (Photo Credits: Archived, edited, symbolic images)

KBC Multitrade MLM Scam: अंमलबजावणी संचालनालयाने (Enforcement Directorate) केबीसी मल्टीट्रेड या मल्टी-लेव्हल मार्केटिंग (Multi-Level Marketing Scheme) कंपनीशी जोडलेल्या महाराष्ट्र आणि राजस्थानमधील विविध ठिकाणी 84.24 कोटी रुपयांची जंगम आणि स्थावर मालमत्ता तात्पुरती जप्त केली आहे. कंपनीवर 200 कोटींहून अधिक लोकांना फसवल्याचा आरोप आहे. संलग्न मालमत्तेमध्ये बेनामी मालमत्ता, डीमॅट खाती, पोस्ट ऑफिस बचत, चांदी आणि हिऱ्याचे दागिने/सराफा आणि बँक खात्यातील शिल्लक यांसारख्या जंगम आणि स्थावर मालमत्तेच्या विस्तृत श्रेणीचा समावेश आहे. या संपत्ती KBC मल्टीट्रेडच्या भाऊसाहेब छबू चव्हाण, आरती भाऊसाहेब चव्हाण आणि फसव्या योजनेत अडकलेल्या इतरांनी विकत घेतल्याची माहिती आहे.

अधिक परताव्याचे आमिष दाखवत लोकांची फसवणूक

बापू छबू चव्हाण, भाऊसाहेब छबू चव्हाण आणि आरती भाऊसाहेब चव्हाण यांच्यासह कंपनी आणि तिच्या प्रवर्तकांविरुद्ध महाराष्ट्रातील विविध जिल्ह्यांमध्ये अनेक एफआयआर दाखल करण्यात आला आहे. ईडीने या प्रकरणात तपास आणि कारवाई वाढवली आहे. या प्रकरणातील आरोपींवर फसव्या बहु-स्तरीय मार्केटिंग योजनेचे आयोजन केल्याचा आरोप आहे. या योजनेने कोणत्याही प्रकारची वास्तवदर्शी कृती अथवा व्यवसाय नसतानाही मोठ्या प्रमाणावर नफा मिळवून देण्याचे आमिष देत लोकांना भूरळ घातली आणि जाळ्यात ओढले. लोकांना MLM योजनेच्या नावाखाली, विविध पॅकेजेस आणि योजनांसाठी शुल्क भरून, कमिशन, पुरस्कार, बक्षिसे आणि उत्पादने भेटवस्तूंच्या आश्वासनाने भुरळ घालून त्यांना सदस्य होण्यासाठी प्रवृत्त केले गेले, असा आरोप आहे. तथापि, कंपनीने कोणत्याही प्रकारचा कायदेशीर व्यवसाय न सुरु करता सदस्यांची भरती सुरू ठेवल्याचे तपासात उघड झाले आहे. (हेही वाचा, Arvind Kejriwal Arrested: अरविंद केजरीवाल यांना अटक; अबकारी धोरण प्रकरणी ईडीची कारवाई)

निधी आणि मालमत्तेचा गैरवापर

सोन्याचे दागिने आणि शेअर्समधील गुंतवणुकीसह स्थावर आणि जंगम मालमत्ता मिळविण्यासाठी आरोपींनी जनतेकडून गोळा केलेल्या निधीचा गैरवापर केल्याचा आरोप ईडीने केला आहे. ही संपत्ती आरोपी आणि त्यांच्या नातेवाईकांच्या नावे ठेवली गेली होती. त्यामुळे आर्थिक अनियमिततेचा तपास आणखी गुंतागुंतीचा झाला असल्याचे ईडीने म्हटले आहे.

या आधीची घडामोड

अलीकडील मालमत्ता जप्तीपूर्वी, तपास एजन्सीने 16.6 कोटी रुपये असलेल्या बँक खात्यावर, 44.61 लाख रुपयांच्या डीमॅट खात्यातील शिल्लक आणि एकूण 5.56 लाख रुपयांच्या पोस्ट ऑफिस बचतीवर निर्बंध लादले होते. ही सर्व मालमत्ता एका आरोपीच्या मालकीची होते. याव्यतिरिक्त, विद्यमान तपासाचा भाग म्हणून 30.75 लाख रुपये किमतीचे सोने आणि हिऱ्यांचे दागिने जप्त करण्यात आले. या प्रकरणाची अधिक चौकशी सध्या सुरू आहे.