Chakan, Hinjewadi Makeover: आयटी हब आणि औद्योगिक पट्ट्याचा कायापालट होणार; चाकण-हिंजवडीसाठी 1,826 कोटींचा मास्टरप्लॅन मंजूर
पुणे जिल्ह्यातील चाकण आणि हिंजवडी परिसरातील वाहतूक कोंडी सोडवण्यासाठी तसेच रस्ते, ड्रेनेज आणि वीजपुरवठा सुधारण्यासाठी राज्य सरकारने 1,826 कोटी रुपयांच्या पायाभूत विकास आराखड्याला तत्त्वतः मंजुरी दिली आहे.
पुणे जिल्ह्यातील प्रमुख औद्योगिक केंद्र असलेले चाकण आणि आयटी हब हिंजवडी येथील वाहतूक कोंडी आणि पायाभूत सुविधांच्या समस्या सोडवण्यासाठी राज्य शासनाने मोठा निर्णय घेतला आहे. या भागातील रस्ते सुधारणा, वाहतूक व्यवस्थापन आणि ड्रेनेज यंत्रणेसाठी उपमुख्यमंत्री देवेंद्र फडणवीस यांनी 1,826 कोटी रुपयांच्या एकात्मिक विकास आराखड्याला तत्त्वतः मंजुरी दिली आहे. मुंबईत झालेल्या बैठकीत पुणे जिल्हाधिकारी जितेंद्र डुडी यांनी या प्रकल्पाचे सादरीकरण केले.
या आराखड्यानुसार प्रत्यक्ष विकासकामे डिसेंबर महिन्यापासून सुरू करण्याचे नियोजन असून, पुढील पावसाळ्यापूर्वी वाहतूक व्यवस्थेत ठोस आणि दृश्यमान सुधारणा करण्याचे उद्दिष्ट ठेवण्यात आले आहे.
चाकणसाठी 1,400 कोटींचा निधी: रस्ते आणि ड्रेनेजवर भर
चाकण परिसरातील औद्योगिक वसाहतींच्या गरजा लक्षात घेऊन 1,400 कोटी रुपयांचा निधी मंजूर करण्यात आला आहे. यामध्ये मुख्यत्वे जलमय होणाऱ्या भागांची समस्या कायमस्वरूपी दूर करण्यावर भर दिला जाईल. जलसंपदा विभागाच्या सर्वेक्षणानुसार नैसर्गिक नाले मोकळे करणे, रस्त्यांच्या दोन्ही बाजूंना सुमारे 38 किलोमीटर लांबीचे पावसाळी पाण्याचे ड्रेनेज नेटवर्क उभारणे आणि पुलांची पाणी वाहून नेण्याची क्षमता वाढवण्याचे काम हाती घेतले जाईल.
याशिवाय, चाकणमधील 75 किलोमीटर लांबीच्या रस्त्यांचे रुंदीकरण न करता उपलब्ध जागेचा योग्य वापर करून पादचारी मार्ग आणि रस्ते सुरक्षा यंत्रणा विकसित केली जाईल. अतिरिक्त भूसंपादन टाळून सध्याच्या जागेतच विविध युटिलिटी वाहिन्यांसाठी स्वतंत्र जागा दिली जाणार आहे.
सार्वजनिक वाहतूक आणि 500 अतिरिक्त बसचे नियोजन
पुणे आणि पिंपरी-चिंचवड शहरांतून चाकण एमआयडीसीमध्ये दररोज ये-जा करणाऱ्या कामगारांसाठी स्वतंत्र मार्गांवर विशेष बस सेवा सुरू करण्याची योजना मांडण्यात आली आहे. चाकण मार्गावरील खासगी वाहनांचा ताण आणि कोंडी कमी करण्यासाठी सुमारे 500 अतिरिक्त बसेसची आवश्यकता जिल्हा प्रशासनाने शासनासमोर मांडली आहे.
हिंजवडी आयटी पार्कसाठी 426 कोटींची तरतूद
आयटी हब म्हणून ओळखल्या जाणाऱ्या हिंजवडीतील पायाभूत सुविधांच्या बळकटीकरणासाठी 426 कोटी रुपयांची तरतूद करण्यात आली आहे. या आराखड्यानुसार परिसरातील वीजपुरवठा अधिक सक्षम करण्यात येणार असून, वारंवार खंडित होणाऱ्या वीज समस्येवर तोडगा काढला जाईल.
हिंजवडीतील वाहतूक नियमन अधिक प्रभावी करण्यासाठी महाराष्ट्र सुरक्षा दलाचे (MSF) 100 जवान तैनात केले जातील. तसेच परिसरातील कचरा व्यवस्थापन आणि स्वच्छता व्यवस्था अधिक सक्षम करण्यासाठी पुणे किंवा पिंपरी-चिंचवड महानगरपालिकेकडे ही जबाबदारी सोपवली जाणार आहे.