पुणे, कोल्हापूर, सातारा, सोलापूर आणि सांगली मधून आतापर्यंत 29 जणांचा मृत्यू: Maharashtra Monsoon & Flood 2019 Live Updates

-महाराष्ट्रातील पुणे, कोल्हापूर, सातारा, सोलापूर आणि सांगली येथे  निर्माण झालेल्या पुरस्थितीत 29 जणांचा आतापर्यंत मृत्यू झाला  आहे.
- पुराच्या पाण्यात अद्याप  6 जण  बेपत्ता असून त्यांचे शोधकार्य सुरु आहे.
-आतापर्यंत 2.85 लाख  नागरिकांना पुण्यातील सुखरुप ठिकाणी पोहचवण्यात आले आहे. 

महाराष्ट्र लोकसेवा आयोगामार्फत घेण्यात येणाऱ्या MPSC  (STI main paper) 2019 चा मुख्य पेपर क्रमांक 2 राज्यातील पुरपरिस्थितीमुळे पुढे ढकलण्यात आला आहे. त्यामुळे, रविवारी 11 ऑगस्ट रोजी नियोजित परीक्षा रद्द करून आता 24 ऑगस्ट ला घेण्यात येणार आहे.  याबाबत आयोगाने परिपत्रक जारी करुन माहिती दिली. कोल्हापूर, सांगली सातारा आणि राज्यातील इतर जिल्ह्यात पूर परिस्थिती निर्माण झाल्यामुळे अनेक विद्यार्थ्यांनी याबाबत आयोगाकडे मागणी केली होती. लवकरच सुधारित हॉलतिकीट आयोगाच्या वेबसाईटवर उपलब्ध होईल.

कोल्हापूर, सांगली, रायगड परिसरात पावसामुळे पूरजन्य परिस्थिती निर्माण झाली असून पुरात अडकलेल्या नागरिकांना सोडवण्यासाठी युद्धपातळीवर बचावकार्य सुरु आहे. या कार्यात आता मुंबईतील सैन्याच्या 10 टीमही सहभागी झाल्या आहेत. रस्त्यावर साचलेल्या पाण्यात बोटीतून मार्ग काढत नागरिकांना सुरक्षित स्थानी हलविण्याचे काम अद्याप सुरु आहे.

ANI ट्विट 

महाराष्ट्राला पावसाने झोडपलं असताना, अनेकांचे जीव धोक्यात असताना नागरिक ज्या सरकारकडे अपेक्षेने पाहतात त्यांनी आता एक नवा जीआर काढून नागरिकांची जणू थट्टा केली आहे.या जीआर मधील प्रमुख अटीनुसार एखादा परिसर दोन दिवसांहून अधिक काळ पाण्याखाली असेल तरच तेथील नागरिकांना मोफत अन्नधान्य देण्यात येईल, असे समजत आहे.

पहा हे परिपत्रक

महाराष्ट्रात मागील आठवड्यात पुणे, नाशिक, सांगली, सातारा, कोल्हापूर व अन्य अनेक ठिकाणी पुरामुळे झालेल्या दुर्दशेची आकडेवारी मांडणारा एक अहवाल आज, 9 ऑगस्ट रोजी मांडण्यात आला. ज्यानुसार, अवघ्या सात दिवसात महाराष्ट्रात पुरामुळे ठिकठिकाणी 30 जणांचा बळी गेला आहे. तर सुमारे दोन लाखाहून अधिक नागरिकांची स्थलांतर करण्यात आले आहे. 

कोल्हापूर मधील पूरजन्य परिस्थीतीवर दिलासा मिळावा या हेतूने मुख्यमंत्री देवेंद्र फडणवीस यांनी कर्नाटक सरकारकडे आलमट्टी धरणातून 5 लाख क्युसेक्स पाणी सोडण्याची विनंती केली होती. मात्र सद्य परिस्थितीत दोन्ही राज्यातील अवस्था पाहता कर्नाटक सरकारने ही मागणी फेटाळुन लावली आहे. त्यामुळे आलमट्टी धरणातून अपेक्षित विसर्ग होणार नसल्याचे समजत आहे. 

कोल्हापूर पूर ग्रस्तांच्या भेटीला गेलेले जलसंपदा मंत्री गिरीश महाजन यांचा एक व्हिडीओ सध्या सोशल मीडियावर पाहायला मिळत आहे. एका बोट मध्ये बसून पोलीस व अन्य अधिकाऱ्यांसह पूर पाहणी करताना महाजन यांना सेल्फी काढण्याचा मोह न आवरला नाही. त्यामुळे अशा आपत्कालीन परिस्थितीत हजारो लोक अडकले असताना महाजन मात्र या व्हिडिओमध्ये हसत सेल्फी काढण्यात मग्न असलेले पाहायला मिळत आहेत. 

गिरीश महाजन व्हिडीओ 

कोल्हापूर मधील पावसाचा जोर अद्याप कायम असून छोटयाछोट्या खेड्यांमध्ये पूरजन्य परिस्थिती निर्माण झाली आहे. हवामान खात्याच्या अंदाजानुसार येत्या 48 तासातही कोल्हापूर सह सांगली सातारा रेड अलर्ट वर असणार आहे. अशातच किनी गावात 500 जण अडकल्याची माहिती समोर येत आहे.  या नागरिकांच्या सुटकेसाठी मदतकार्य सुरु असून अनेक सामाजिक संस्थांकडून त्यांना अन्न पुरवण्यात येत आहे. दरम्यान पुरामुळे आसपासच्या रास्त वाहतुकीवर देखील परिणाम झाला आहे.

ANI ट्विट 

महाराष्ट्राला मागील काही दिवसात पावसाने अक्षरशः झोडपून काढले आहे. यामुळे वाहतूक व्यवस्थेला सर्वात मोठा फटका बसला असून जनजीवन विस्कळीत झाले आहे. जागोजागी पाण्यात गेलेले रस्ते आणि वाहतुकीची कोलमडलेली वेळापत्रके पाहता नागरिकांच्या मदतीसाठी मिरज- कराड दरम्यान विशेष रेल्वेची सोय करण्यात आल्याची माहिती रेल्वे मंत्री पियुष गोयल यांनी दिली आहे.

पहा ट्विट 

कोल्हापूर मध्ये पावसाच्या तडाख्यानानंतर खिद्रापूर या गावाला चारही बाजूनी पाण्याने वेढले आहे, पुराच्या पाण्यात तब्बल 2000 जण अडकल्याची शक्यता वर्तवली जात आहे, मात्र अद्याप याठिकाणी प्रशासनाची मदत पोहचलेली नाही. अशावेळी निदान महिला व बालकांना तरी गावाबाहेर काढण्यासाठी तात्काळ मदत मिळावी अशी ग्रामस्थांनी विनंती केली आहे. 

बंगालच्या उपसागरात निर्माण झालेल्या कमी दाबाच्या पट्ट्याचा परिणाम म्हणून पुढील 48 तासात म्हणजे 9  व 10 ऑगस्ट रोजी पुणे, कोल्हापूर आणि सातारा जिल्ह्यात अतिवृष्टी होईल, असा इशारा भारतीय हवामान शास्त्र विभागाने दिला आहे. दरम्यान, उत्तर मुंबई सह उपनगरात देखील जोरदार पावसाचा अंदाज वर्तवण्यात आला आहे.

Skymet ट्विट 

कोल्हापूर  सांगली परिसरात अतिवृष्टीमुळे पर्जन्य परिस्थिती निर्माण झाली असून अद्याप अनेकजण अद्याप अडकून पडले आहेत. या नागरिकांच्या मदतीसाठी नौदलाची 12 बचाव पथके सांगलीसाठी रस्तेमार्गाने रवाना झाली आहेत. काल कोल्हापूर येथे प्रतिकूल हवामानामुळे हवाई मार्गाने हेलिकॉप्टरची मदत पोहचवणे शक्य होत नव्हते त्यामुळे हा निर्णय घेण्यात आला.

ANI ट्विट