Wonsan Kalma Coastal Resort Zone: उत्तर कोरियमध्ये Kim Jong-Un ने केले पहिल्या पर्यटन क्षेत्राचे उद्घाटन; 54 हॉटेल्स, सिनेमागृह, बिअर पब, वॉटरपार्क, शॉपिंग मॉल्ससह अनेक सुविधांचा समावेश

उत्तर कोरियाने (North Korea) पर्यटन क्षेत्राला चालना देण्यासाठी एक महत्त्वाकांक्षी पाऊल उचलले आहे. नुकतेच उत्तर कोरियाचा नेता किम जोंग-उनने (Kim Jong Un) वॉन्सन-काल्मा किनारी रिसॉर्ट क्षेत्राचे Wonsan Kalma coastal resort zone उद्घाटन केले, जो देशातील सर्वात मोठा पर्यटन प्रकल्प आहे. या रिसॉर्टमध्ये 54 हॉटेल्स, सिनेमागृह, पाच बिअर पब, वॉटरपार्क, मिनी-गोल्फ कोर्स आणि अनेक रेस्टॉरंट्स आणि शॉपिंग मॉल्स यासारख्या आधुनिक सुविधा आहेत. 5 किलोमीटर लांबीच्या काल्मा प्रायद्वीपावर पसरलेले हे रिसॉर्ट सुमारे 20,000 पर्यटकांना सामावून घेऊ शकते. 1 जुलै 2025 पासून हे रिसॉर्ट स्थानिक पर्यटकांसाठी खुले होईल, तर रशियन पर्यटकांसाठी 7 जुलैपासून विशेष टूर आयोजित केले जाणार आहेत.

वॉन्सन-काल्मा किनारी रिसॉर्ट क्षेत्र हे उत्तर कोरियाच्या पूर्व किनारपट्टीवरील काल्मा प्रायद्वीपावर वसलेले आहे. हे रिसॉर्ट 3,460 एकर परिसरात पसरलेले असून, यात 54 हॉटेल्स, मोठे आतील आणि बाहेरील वॉटरपार्क, मिनी-गोल्फ कोर्स, सिनेमागृह, अनेक शॉपिंग मॉल्स, रेस्टॉरंट्स, पाच बिअर पब आणि दोन व्हिडिओ गेम आर्केड्स यांचा समावेश आहे. कोरियन सेंट्रल न्यूज एजन्सी (KCNA) नुसार, यात समुद्रकिनारी खेळण्यासाठी सुविधा, क्रीडा क्षेत्र आणि उच्च दर्जाची निवास व्यवस्था आहे. रिसॉर्टच्या उद्घाटन समारंभात किम जोंग-उनने याला ‘जागतिक दर्जाचे पर्यटन स्थळ’ असे संबोधले. याशिवाय, रिसॉर्टजवळील काल्मा रेल्वे स्टेशन आणि आंतरराष्ट्रीय विमानतळ यामुळे पर्यटकांना येणे-जाणे सोपे होईल.

24 जून 2025 रोजी झालेल्या उद्घाटन समारंभात किम जोंग-उनसह पत्नी री सोल-जू आणि मुलगी किम जू-ए यांनी हजेरी लावली. री सोल-जूचा हा 1 जानेवारी 2024 नंतरचा पहिला सार्वजनिक कार्यक्रम होता. किम जू-ए, जिला किमचे संभाव्य उत्तराधिकारी मानले जाते, तिनेही रिसॉर्टच्या सुविधा पाहिल्या. रशियाचे राजदूत अलेक्झांडर मात्सेगोरा आणि दूतावास कर्मचारीही या समारंभाला उपस्थित होते, जे उत्तर कोरिया आणि रशियामधील वाढत्या संबंधांचे द्योतक आहे. (हेही वाचा: Katrina Kaif Maldives Brand Ambassador: भारतीयांना आकर्षित करण्यासाठी मालदीव सरकारची मोठी घोषणा; कतरिना कैफची जागतिक पर्यटन राजदूत म्हणून निवड)

Wonsan Kalma Coastal Resort Zone:

उत्तर कोरियाला संयुक्त राष्ट्रांच्या निर्बंधांचा सामना करावा लागत आहे, ज्यामुळे अर्थव्यवस्था कमकुवत झाली आहे. अशा परिस्थितीत, पर्यटन हा निर्बंधांपासून मुक्त असलेला उत्पन्नाचा एक महत्त्वाचा स्रोत आहे. किम जोंग-उनने पर्यटनाला प्राधान्य देत वॉन्सन शहराला एक अब्ज डॉलर्सचे पर्यटन केंद्र बनवण्याचा प्रयत्न केला आहे, जिथे त्यांचे बालपण लक्झरीत गेले होते. या रिसॉर्टसाठी प्रचंड गुंतवणूक करण्यात आली आहे, आणि त्याचा खर्च वसूल करण्यासाठी परदेशी पर्यटक, विशेषतः रशियन आणि चिनी पर्यटक, यांना आकर्षित करणे आवश्यक आहे.

रशियन ट्रॅव्हल एजन्सी व्होस्टोक इंटूरने 7 जुलैपासून सात दिवसांचा टूर पॅकेज जाहीर केला आहे, ज्यामध्ये प्योंगयांग ते वॉन्सन विमानप्रवास, चार रात्री रिसॉर्टमध्ये मुक्काम, मासिकर्योंग स्की रिसॉर्टला भेट आणि प्योंगयांगमधील साइटसीइंगचा समावेश आहे. दरम्यान, उत्तर कोरियाने 2020 मध्ये कोविड-19 महामारीमुळे आपल्या सीमा बंद केल्या होत्या, आणि परदेशी पर्यटकांवर बंदी घातली होती. 2023 पासून निर्बंध हळूहळू शिथिल होत आहेत, आणि सध्या केवळ रशियन पर्यटकांना गटांमध्ये काही भागांत प्रवेश मिळतो. एप्रिल 2025 मध्ये प्योंगयांग इंटरनॅशनल मॅरेथॉनमध्ये 200 परदेशी धावपटूंनी भाग घेतला, जे परदेशी पर्यटकांच्या स्वागताचे संकेत आहे. वॉन्सन-काल्मा रिसॉर्ट प्रामुख्याने प्योंगयांगमधील उच्चभ्रू स्थानिकांना आणि निवडक परदेशी पर्यटकांना लक्ष्य करते, ज्यामुळे सामान्य उत्तर कोरियन नागरिकांचा प्रवेश मर्यादित राहील.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)