Mobile Phone and Brain Cancer: मोबाईल फोनच्या वापरामुळे होऊ शकतो मेंदूचा कर्करोग? जाणून घ्या काय म्हणतो WHO-समर्थित अभ्यास

Mobile Phone and Brain Cancer: स्मार्टफोन (Smartphone) आणि इतर इलेक्ट्रॉनिक उपकरणे सर्वत्र मोठ्या प्रमाणावर वापरली जातात्त. घरापासून ऑफिसपर्यंत सगळीकडे लोक मोबाईल फोन, लॅपटॉप वापरताना दिसतात. स्मार्टफोन वापरल्याने मेंदूच्या कर्करोगाचा (Brain Cancer) धोका वाढू शकतो, असे मानले जाते. परंतु या बाबतीत ठोस माहितीचा अभाव आहे. यामुळेच संशोधक दीर्घकाळापासून वायरलेस गॅझेट्समधून निघणाऱ्या रेडिओ लहरी आणि त्यांचे तोटे यावर लक्ष केंद्रित करत आहेत. आता जागतिक आरोग्य संघटनेने (WHO) केलेल्या एका अभ्यासातून याबाबत मोठे सत्य समोर आले आहे. जागतिक आरोग्य संघटनेच्या नवीन पुनरावलोकन अहवालानुसार, मेंदूचा कर्करोग आणि मोबाईल फोन यांच्यात कोणताही संबंध नाही. याचा अर्थ स्मार्टफोनच्या अतिवापरामुळे मेंदूचा कर्करोग होण्याचा धोका असल्याचे दावे खरे नाहीत.

रॉयटर्सच्या अहवालानुसार, डब्ल्यूएचओच्या या अभ्यासातून समोर आले आहे की, वायरलेस तंत्रज्ञानाच्या वापरात मोठी वाढ झाली असली तरी, मेंदूच्या कर्करोगाच्या प्रकरणांमध्ये कोणतीही वाढ झालेली नाही. अभ्यास करणाऱ्या शास्त्रज्ञांनी असेही सांगितले की, हा परिणाम अशा लोकांनाही लागू होतो जे एक दशकापेक्षा जास्त काळ फोन किंवा मोबाईल फोन वापरतात. या विश्लेषणामध्ये 1994 ते 2022 दरम्यानच्या 63 अभ्यासांचा समावेश होता, ज्याचे 10 देशांतील 11 अन्वेषकांनी मूल्यांकन केले होते. यामध्ये ऑस्ट्रेलियन सरकारच्या रेडिएशन प्रोटेक्शन ऑथॉरिटीचाही समावेश आहे.

एकीकडे मोबाईल फोनमुळे मेंदूचा कर्करोग होत नसल्याचा दावा या अहवालात करण्यात आला आहे, तर दुसरीकडे, ते म्हणतात की रेडिओफ्रिक्वेंसी रेडिएशन मानवी शरीराद्वारे मोठ्या प्रमाणात शोषले जाते, ज्यामुळे उष्णता निर्माण होते. यामुळे बर्न आणि शरीराच्या ऊतींचे नुकसान होण्याचा धोका असतो, परंतु रेडिओफ्रिक्वेंसी रेडिएशनमुळे मेंदूचा कर्करोग होण्याचा धोका नाही. अमेरिकन कॅन्सर सोसायटी म्हणते की, काही विशिष्ट प्रकरणांमध्ये, नॉन-आयोनायझिंग रेडिएशनचे पेशींवर इतर परिणाम होऊ शकतात, ज्यामुळे कर्करोग होऊ शकतो. (हेही वाचा: Daisuke Hori: जपानी माणूस; जो 12 वर्षे झाली, दिवसातून झोपतो केवळ 30 मिनिटे)

दरम्यान, डब्ल्यूएचओ आणि इतर आंतरराष्ट्रीय आरोग्य संस्थांनी यापूर्वी म्हटले आहे की, मोबाइल फोनद्वारे वापरल्या जाणाऱ्या रेडिएशनच्या दुष्परिणामांचे कोणतेही ठोस पुरावे नाहीत, परंतु अधिक संशोधन आवश्यक आहे. असे नाही की रेडिओ वेब फक्त मोबाईल फोनवरून उपलब्ध आहे. अहवालानुसार, मानवाला अनेक स्त्रोतांकडून रेडिओ वेब मिळते. त्याचे नैसर्गिक स्त्रोत सूर्य, वीज आणि पृथ्वी आहेत. याशिवाय टीव्ही सिग्नल, मोबाइल फोन, रडार, वायफाय, ब्लूटूथ उपकरणे, फुल बॉडी स्कॅनर रेडिओ हे वेबचे स्रोत असू शकतात.