Raghav Chadha, Supreme Court (PC - FB and Wikimedia Commons)

SC On Raghav Chadha: सर्वोच्च न्यायालयाने शुक्रवारी आम आदमी पक्षाचे (AAP) खासदार राघव चढ्ढा (Raghav Chadha) यांना राज्यसभेचे अध्यक्ष जगदीप धनकर (Jagdeep Dhankhar) यांची भेट घेण्यास आणि सभागृहातील त्यांच्या कथित वर्तनाबद्दल माफी मागण्यास सांगितले आहे. काही खासदारांना प्रस्तावित निवड समितीमध्ये समाविष्ट करण्याचा निर्णय घेण्यापूर्वी त्यांची परवानगी न घेतल्याच्या आरोपावरून आप नेत्याला 11 ऑगस्ट रोजी संसदेतून अनिश्चित काळासाठी निलंबित करण्यात आले होते.

सर्वोच्च न्यायालयाने म्हटले आहे की, चढ्ढा हे प्रथमच खासदार आणि राज्यसभेचे तरुण सदस्य आहेत. त्यांच्या माफीचा सभापती गांभीर्याने विचार करतील. सर्वोच्च न्यायालयाच्या या सूचनेवर अॅटर्नी जनरल व्यंकटस्वामी म्हणाले की, हे प्रकरण सभागृहाचे असल्याने चढ्ढा यांना राज्यसभेतच माफी मागावी लागेल. आम्हाला वाटते की हे प्रकरण सामंजस्याने सोडवले जाईल. (हेही वाचा -Raghav Chadha Suspended From Rajya Sabha: आप खासदार राघव चढ्ढा राज्यसभेतून निलंबित; संजय सिंह निलंबनाची मुदत वाढवली)

दरम्यान, ऑगस्टमध्ये राज्यसभेच्या अध्यक्षांनी 5 खासदारांच्या मान्यतेशिवाय त्यांच्या नावाचा प्रस्ताव सिलेक्ट कमिटीसमोर ठेवल्याने त्यांना निलंबित केले होते. याशिवाय, राज्यसभेने हे प्रकरण संसदेच्या विशेषाधिकार समितीकडे पाठवले आहे, जिथे त्यावर सुनावणी होणे बाकी आहे.

सरन्यायाधीश डीवाय चंद्रचूड यांनी सुनावणीदरम्यान सांगितले की, चढ्ढा अध्यक्षांसमोर हजर राहू शकतात आणि बिनशर्त माफी मागू शकतात. याचिकाकर्त्याचा सभागृहाचा अवमान करण्याचा कोणताही हेतू नव्हता, हे समजून घेते. अध्यक्षांना भेटण्यासाठी वेळ काढून चढ्ढा माफी मागू शकतात. न्यायालयाने या प्रकरणाची पुढील सुनावणी दिवाळीच्या सुटीनंतर घेण्यास सांगितले आहे. यावेळी ते खटल्याच्या प्रगतीचा आढावा घेणार आहेत.