Mumbai Rain: असह्य उकाड्यापासून मुंबईकरांना अखेर दिलासा, अनेक भागांत मान्सूनपूर्व पावसाच्या सरी

वाढलेले तापमान आणि घामाच्या धारांमुळे चातकासारखी पावसाची वाट बघणाऱ्या मुंबईकरांना रविवारी मान्सूनपूर्व पावसामुळे काहीसा दिलासा मिळू लागला आहे. गेल्या काही दिवसांपासून मुंबई आणि आसपासच्या परिसरात नागरिकांना प्रचंड उकाड्याचा सामना करावा लागत होता. अशा परिस्थितीत रविवारी मुंबई उपनगरामध्ये काही ठिकाणी मान्सूनपूर्व सरी बरसल्याने हवेत किंचित गारवा निर्माण झाला आहे.

उपनगरांमध्ये पावसाची हजेरी

मुंबईच्या पश्चिम आणि पूर्व उपनगरांमध्ये रविवारी पावसाचे वातावरण तयार झाले होते. पश्चिमेतील वांद्रे, मीरा भाईंदर, माहीम आणि खार या भागांमध्ये पावसाच्या सरी कोसळल्या.

याशिवाय, पूर्व उपनगरातील मुलुंड आणि आसपासच्या परिसरामध्येही हलक्या स्वरूपात पाऊस पडला. अचानक आलेल्या या पावसामुळे रस्त्यावरून जाणाऱ्या नागरिकांची धावपळ उडाली, परंतु उष्णतेपासून दिलासा मिळाल्याने नागरिकांमध्ये आनंदाचे वातावरण आहे.

नवी मुंबईत ढगाळ वातावरण

मुंबई उपनगरांसोबतच नवी मुंबईतही रविवारी दुपारच्या सुमारास आभाळ भरून आले होते. अनेक ठिकाणी काळे ढग जमा झाल्याने लवकरच जोरदार पाऊस पडेल अशी चिन्हे दिसत आहेत. ठाणे आणि नवी मुंबईच्या काही अंतर्गत भागांतही ढगाळ वातावरणामुळे तापमानात घट झाली आहे.

मे महिन्याच्या उत्तरार्धात मुंबईत कमाल आणि किमान तापमानात फारसा फरक नसल्यामुळे अस्वस्थता मोठ्या प्रमाणावर वाढली होती. हवेतील आर्द्रतेचे प्रमाण जास्त असल्याने मुंबईकर घामाच्या धारांनी त्रस्त झाले होते.

रविवारी झालेल्या या मान्सूनपूर्व पावसामुळे तापमानात फार मोठी घट झाली नसली, तरी गेल्या काही दिवसांपासून सुरू असलेल्या दमट आणि उष्ण वातावरणापासून मुंबईकरांना नक्कीच तात्पुरता दिलासा मिळाला आहे. आगामी काळात पावसाचा जोर आणखी वाढण्याची शक्यता वर्तवण्यात येत आहे.