Kerala Shocker: तिरुवनंतपुरममध्ये 23 वर्षीय तरुणाने केली कुटुंबातील 5 जणांची हत्या; आई जखमी, विष प्राशन करून केले पोलिसांसमोर आत्मसमर्पण

केरळमध्ये (Kerala) एक धक्कादायक घटना समोर आली आहे. तिरुअनंतपुरममध्ये (Thiruvananthapuram) एका तरुणाने त्याच्या प्रेयसीसह कुटुंबातील पाच सदस्यांची हत्या केली. या हल्ल्यात तरुणाची आई गंभीर जखमी झाली आहे. हत्येचे कारण अद्याप कळलेले नाही. आरोपी तरुणाने विष प्राशन करून आत्महत्या करण्याचा प्रयत्नही केला. सध्या पोलीस घटनेचा तपास करत आहेत. अहवालानुसार, पोलिसांनी सांगितले की, 23 वर्षीय आरोपी तरुण अफानने त्याची आजी, वडिलांचा भाऊ, वडिलांच्या भावाची पत्नी, 14 वर्षीय भाऊ आणि त्याच्या प्रेयसीची हत्या केली.

यासह आरोपीने त्याच्या आईवरही प्राणघातक हल्ला केला. या हल्ल्यात आई गंभीर जखमी झाली असून तिच्यावर तिरुअनंतपुरम मेडिकल कॉलेजमध्ये उपचार सुरू आहेत. आरोपीच्या आईची प्रकृतीही गंभीर असल्याचे सांगण्यात येत आहे. हत्येनंतर, आरोपीने तिरुअनंतपुरममधील वेंजाराममोड्डु पोलीस ठाण्यात स्वतः जाऊन हत्येची कबुली दिली. आरोपीने पोलिसांना सांगितले की, त्याने हे गुन्हे तीन वेगवेगळ्या घरात केले.

आरोपीने हेही कबूल केले की, हा हत्येनंतर त्याने विष प्राशन करून आत्महत्या करण्याचा प्रयत्न केला होता, परंतु रुग्णालयात गेल्यानंतर तो वाचला. सध्या पोलीस हत्येमागील कारण शोधण्याचा प्रयत्न करत आहेत आणि आरोपींची चौकशी करत आहेत. आरोपी पेरुमला येथील रहिवासी आहे. पोलिसांनी सांगितले की, सोमवारी संध्याकाळी 5.30 वाजताच्या सुमारास अफानने त्याची आजी सलमा बिवी हिला पानगोडे येथील त्यांच्या घरी हातोड्याने मारहाण केली. त्याचे पुढचे लक्ष्य एसएन पुरम येथील काकाचे घर होते, जिथे त्याने त्याचे काका लतीफ आणि काकू शाहिदा यांची हत्या केली. त्यानंतर त्याने त्याचा धाकटा भाऊ अफसान, आई शेमी आणि त्याची प्रेयसी फरसाना यांच्यावर हल्ला केला.

या हल्ल्यात प्रेयसी आणि भाऊ मरण पावले व आई गंभीर जखमी झाली. त्यानंतर त्याने पोलीस स्टेशन गाठून हत्येची कबुली दिली. पोलीस स्टेशनला पोहोचण्यापूर्वी अफानने उंदीर मारण्याचे विष प्राशन केले होते. चौकशीदरम्यान त्याची प्रकृती बिघडली तेव्हा पोलिसांनी त्याला तिरुअनंतपुरम येथील सरकारी वैद्यकीय महाविद्यालय रुग्णालयात दाखल केले. पोलिसांच्या जवळच्या सूत्रांनी त्यांची प्रकृती स्थिर असल्याची पुष्टी केली आहे.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)