Can Tattoo Infect You With HIV? गाझियाबादमध्ये 4 वर्षांत 68 महिलांना AIDS ची लागण; 20 जणींचा टॅटूमुळे संसर्ग झाल्याचा आरोप

गाझियाबादच्या (Ghaziabad) जिल्हा महिला रुग्णालयात प्रसूतीपूर्व चाचणीदरम्यान चार वर्षांत 68 महिलांना एचआयव्हीची (HIV) लागण झाल्याचे आढळून आले. समुपदेशनादरम्यान यातील 20 महिलांनी सांगितले की, त्यांच्या शरीरावर टॅटू (Tattoo) काढल्यामुळे त्यांना संसर्ग झाल्याचा संशय आहे. या सर्व महिलांनी त्यांचे टॅटू रस्त्याच्या कडेला असलेल्या टॅटू बनवणाऱ्या व्यक्तीकडून काढून घेतले होते. यानंतर त्यांची प्रकृती खालावली. जिल्हा रुग्णालयाच्या समुपदेशक उमा सिंह यांनी सांगितले की, दरवर्षी 15 ते 20 महिलांना संसर्ग होत आहे. मात्र, संक्रमित आढळलेल्या सर्व महिलांची सुरक्षित प्रसूती झाली.

या प्रकरणामुळे स्वच्छता आणि टॅटू बनवण्याच्या खबरदारीवर प्रश्न उपस्थित झाले आहेत. आजकाल टॅटू काढणे ही फॅशन झाली आहे, पण फॅशनसाठी जीव धोक्यात घालणे शहाणपणाचे नाही. टॅटूचे शौकीन असलेले असे लोक सुरक्षिततेकडे लक्ष देत नाहीत, ज्यामुळे एचआयव्हीसारख्या घातक आजाराचा धोका वाढू शकतो. टॅटू काढताना लोकांनी स्वच्छतेची काळजी घेणे महत्त्वाचे आहे. टॅटू बनवताना सावधगिरीने टॅटू बनवावेत. टॅटू काढताना स्वच्छतेची आणि सुई बदलण्याची माहिती टॅटू काढणाऱ्या व्यक्तीकडून घेणे अत्यंत आवश्यक आहे.

टॅटू काढल्याने संसर्ग होत नाही, मात्र एकाच सुईने अनेक लोकांवर गोंदवल्याने एचआयव्ही होतो. टॅटू बनवल्यानंतर सुई पुन्हा वापरली नाही तर एचआयव्ही संसर्ग टाळता येतो. जिल्हा रुग्णालयातील पॅथॉलॉजिस्ट डॉ.शेफाली अग्रवाल यांनी सांगितले की, टॅटू काढणाऱ्याने प्रत्येक ग्राहकासाठी वेगळी सुई वापरावी. टॅटूमध्ये संसर्ग पसरण्याचा धोका 0.3 टक्के असतो. संक्रमित व्यक्तीच्या रक्ताच्या संपर्कात सुई आल्यानंतर त्याच सुईमुळे दुसऱ्या व्यक्तीला रक्तसंक्रमण होण्याचा धोका असतो. संसर्ग टाळण्यासाठी सावधगिरी आणि सतर्कता आवश्यक आहे. (हेही वाचा: Uttarakhand Shocker: रामनगरमध्ये अंमली पदार्थांचे सेवन करणाऱ्या मुलीने ठेवले अनेक लोकांशी शारीरिक संबंध; 20 जणांना झाली HIV ची लागण)

दरम्यान, तज्ञांच्या मते, टॅटूच्या शाईमध्ये धोकादायक रसायने असू शकतात, ज्यामुळे त्वचेच्या कर्करोगाचा धोका वाढतो. त्यात पॉलिथिलीन ग्लायकोलसारखी रसायने मिसळली जातात, ज्यामुळे त्वचा आणि मज्जासंस्थेला हानी पोहोचते. म्हणूनच टॅटू काढण्यापूर्वी, शाईची गुणवत्ता तपासली पाहिजे. टॅटूच्या माध्यमातून केवळ एचआयव्हीच नाही तर इतर गंभीर आजारांचाही धोका असल्याचे डॉक्टरांचे म्हणणे आहे. याचा परिणाम किडनी आणि रोगप्रतिकारक शक्तीवर होऊ शकतो.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)