भारतात 7703 कोरोना बाधित रुग्ण; ICMR; 11 एप्रिल 2020 च्या ताज्या मराठी बातम्या आणि ब्रेकिंग न्यूज LIVE

भारतात 7703 कोरोना बाधित रुग्णांची नोंद करण्यात आली असल्याचे  ICMR ने सांगितले आहे.

पुण्याचे महापौर मुरलीधर मोहोळ यांनी  पुण्यातील प्रभागनिहाय कोरोनाबाधित रुग्णांची माहिती दिली आहे.

मुंबईतील पंचतारांकित ताज महल हॉटेलमधील 6 कर्मचाऱ्यांना कोरोनाची लागण झाली आहे. या सर्वांवर रुग्णालयात उपचार सुरू आहेत.  

राज्यभरात 'लॉकडाऊन' ३० एप्रिलपर्यंत वाढवण्याबाबतचा निर्णय लोकहिताचा आहे. नागरिकांनी या निर्णयाला पाठिंबा द्यावा आणि सहकार्य करावं. राज्यातल्या प्रत्येकानंच कोरोनावर मात करण्यासाठी कटिबद्ध होऊया! आपला व आपल्या कुटुंबाचा जीव वाचवण्यासाठी सरकारनं लॉकडाऊन वाढवला आहे, असं मत उपमुख्यमंत्री अजित पवार यांनी व्यक्त केलं आहे.

दिवसभरात पुण्यात 15 नवे कोरोनाबाधित रुग्ण आढळले आहेत. त्यामुळे शहरातील एकूण रुग्णांची संख्या 223 वर पोहोचली आहे.

कोरोना विषाणूने संपूर्ण देशात हाहाकार माजवला आहे. कोरोना बाधीतांच्या संख्येत दिवसेंदिवस वाढ होऊ लागली आहे. मध्य प्रदेशात कोरोनाची लागण होऊन आतापर्यंत 40 लोकांचा मृत्यू झाला असल्याची माहिती समोर आली आहे. तर एकूण 529 जण कोरोनाच्या जाळ्यात अडकले आहेत. ट्वीट-

तेलंगणामध्ये 30 एप्रिलपर्यंत लॉकडाऊन घोषित करण्यात आलं आहे. यासंदर्भात तेलंगणाचे मुख्यमंत्री के. चंद्रशेखर राव यांनी माहिती दिली आहे.

महाराष्ट्रातील कोरोना रुग्णांचा आकडा 1761 वर पोहोचला आहे. आज 187 नव्या कोरोना बाधितांची नोंद झाली आहे.

कोरोना व्हायरसचे मुंबईत 61 टक्के रुग्ण तर ठाणे, पालघर, नवी मुंबई भागात 10 टक्के आणि पुण्यात 20 टक्के रुग्ण आढळून आले आहेत. त्याचसोबत राज्यातील कोरोना रुग्णांचा मृत्यूदर 5.5 टक्के असल्याची माहिती आरोग्यमंत्री राजेश टोपे यांनी दिली आहे. 

राज्यातील पॅरोमेडिकल कर्मचाऱ्यांना वेबपोर्टलद्वारे ऑनलाईन प्रशिक्षण देण्याचा निर्णय घेण्यात आल्याची माहिती आरोग्यमंत्री राजेश टोपे यांनी दिली आहे.

कोरोनाच्या पार्श्वभुमीवर गोव्यात सुद्धा लॉगडाउन वाढवला जाणार पण आर्थिक व्यवहार सुरु राहणार आहे. तसेच येत्या सोमवार पासून खासगी आणि सरकारी रुग्णालयातील ओपीडी सुरु करण्यात येणार आहेत. मात्र आजपासून मासेमारी संबंधित कामे सुरु करण्यात आल्याची माहिती गोव्याचे मुख्यमंत्री प्रमोद सावंत यांनी दिली आहे.

कोरोना व्हायरसच्या पार्श्वभुमीवर राजस्थान येथील सरकार 9 वी आणि 11 वी च्या विद्यार्थ्यांना पास करणार असल्याचा निर्णय घेण्यात आला आहे.

पुणे येथे आणखी तीन जणांना कोरोना व्हायरसमुळे मृत्यू झाल्याने एकूण 29 जणांचा बळी गेल्याची माहिती आरोग्य विभागाकडून देण्यात आली आहे.

मुंबईत कोरोनाचे आणखी 189 रुग्ण आढळून आले आहेत. तर 11 जणांचा आजपर्यंत मृत्यू झाला आहे. त्यामुळे शहरातील एकूण कोरोनाबाधितांचा आकडा 1182 वर आणि एकूण मृतांची संख्या 75 वर पोहचल्याची माहिती मुंबई महापालिकेने दिली आहे.

दिल्लीतील कश्मिरी गेट येथे भीषण आग लागली असून 5 अग्निशमन दलाच्या गाड्या घटनास्थळी दाखल झाल्या आहेत.

राजस्थान मध्ये आणखी 117 कोरोनाचे रुग्ण आढळून आल्याने आकडा 678 वर पोहचला आहे.

महाराष्ट्रानंतर पश्चिम बंगाल येथे सुद्धा 30 एप्रिल पर्यंत लॉकडाउन कायम राहणार असल्याची माहिती ममता बॅनर्जी यांनी दिली आहे.

महाराष्ट्रात 14 एप्रिल नंतर लॉकडाउन कायम राहणार असल्याचे मुख्यमंत्री उद्धव ठाकरे यांनी स्पष्ट केले आहे. तर 30 एप्रिल पर्यंत लॉकडाउन राहणार असल्याचा निर्णय घेण्यात आला आहे.  मुंबई, पुणे या ठिकाणी कोरोनाच्या पार्श्वभुमीवर लक्ष ठेवण्याची अधिक गरज आहे. शेतीच्या कामांना लॉकडाउनच्या काळात परवानगी  देण्यात आली आहे. 

राज्याच हाय रिस्क असलेले रुग्ण दगावले असल्याचे मुख्यमंत्री उद्धव ठाकरे यांनी स्पष्ट केले आहे. येत्या सोमवारी पहिला कोरोनाबाधित रुग्ण आढळून आल्याचा पाचवा आठवा पूर्ण होणार आहे. मुंबईत सापडलेल्या कोरोनाबाधितांची लक्षणे सौम्य दिसून आली आहेत. मात्र आता घरोघरी जाऊन कोरोनासंबंधित चाचणी केली जात आहे.तर  महाराष्ट्रात14 एप्रिल नंतर लॉकडाउन कायम ठेवणार असल्याचा निर्णय घेण्यात आला आहे. 

महाराष्ट्रात कोरोनाबाधितांचा आकड्यात वाढ झाली आहे. जवळजवळ 33 हजार जणांच्या चाचण्या करण्यात आल्या आहेत. तर मुंबईतील 19 हजारांपैकी 1 हजार जणांची कोविड-19 ची चाचणी पॉझिटिव्ह आली आहे.