Salman Khan: सलमान खानने शेजाऱ्यावर केला मानहानीचा खटला दाखल, जाणून घ्या संपूर्ण प्रकरण
पनवेल येथील सलमानच्या फार्म हाऊसजवळील शेजारी मालक केतन कक्कर याच्याविरुद्ध सलमानने शहर दिवाणी न्यायालयात खटला दाखल केला आहे.
बॉलिवूडचा (Bollywood) भाई सलमान खानचा (Salman Khan) मोठा चाहता वर्ग आहे. त्याच्या वैयक्तिक आयुष्याबद्दल जाणून घेण्यासाठी त्याचे चाहते नेहमीच उत्सुक असतात. सण आणि विविध कार्यक्रम साजरे करण्यासाठी सलमान अनेकदा त्याच्या पनवेलमधील (Panvel) फार्महाऊसला (Farmhouse) त्याच्या कुटुंबासह भेट देतो. सलमानने या फार्महाऊसचे फोटो सोशल मीडियावर शेअर केले आहेत. लॉकडाऊनमध्येही सलमान त्याच्या पनवेलच्या घरीच थांबला होता. पनवेल येथील सलमानच्या फार्म हाऊसजवळील शेजारी मालक केतन कक्कर याच्याविरुद्ध सलमानने शहर दिवाणी न्यायालयात खटला दाखल केला आहे.
मानहानीचा खटला दाखल
सलमान खानने त्याचा शेजारी केतन कक्करवर मानहानीचा खटला दाखल केला आहे. सलमान खानचे फोटो सोशल मीडियावर पोस्ट केल्याने त्याचे आणि त्याच्या कुटुंबाचे मन दुखावल्याचे त्याने म्हटले आहे. त्यावर बंदी घातली पाहिजे. केतन कक्करच्या वतीने त्यांच्या वकिलांनी उत्तर दाखल करण्यासाठी न्यायालयाकडे वेळ मागितला आहे. केतन कक्करने त्याच्या यूट्यूब चॅनलवरून सलमानबद्दल अपशब्द वापरले. खटला दाखल केल्यानंतर न्यायालयाने कक्कर यांच्याकडून जबाब मागवला. या प्रकरणाची पुढील सुनावणी 21 जानेवारीला निश्चित करण्यात आली आहे.
सलमान खानने काही दिवसांपूर्वी पनवेल येथील त्याच्या घरी वाढदिवस साजरा केला. त्यादरम्यान त्यांना साप चावला. वृत्तानुसार, हा साप विषारी नव्हता. साप चावल्यानंतर सलमान खानवर कामोठे येथील एमजीएम रुग्णालयात उपचार करण्यात आले.