Virus | Image Used For Representational purpose Only | (Photo Credits: Pixabay.com)

पाकिस्तान (Pakistan) आणि चीनची (China) मैत्री जगजाहीर आहे. चीनने पाकिस्तानला अनेकवेळा आर्थिक मदत केली आहे. त्याचवेळी पाकिस्तानही चीनला वेळोवेळी समर्थन देताना दिसत आला आहे. आता या दोन देशांची मैत्री धोकादायक पातळीवर पोहोचली आहे. अहवालानुसार हे दोघे मिळून जगाचा नाश करू लागले आहेत. चीन आणि पाकिस्तान मिळून कोरोना विषाणूपेक्षाही घातक व्हायरस बनवत असल्याच्या बातम्या येत आहेत. रावळपिंडीच्या संशोधन प्रयोगशाळेत हा विषाणू विकसित करण्यासाठी दोन्ही देश भागीदारीत काम करत आहेत, असे रिपोर्ट्समध्ये म्हटले आहे.

कोरोना विषाणूच्या संकटातून जग अजूनही सावरलेले नाही आणि आता या बातमीने जगाची झोप उडवली आहे. 2019 मध्ये चीनच्या वुहान शहरातून जगभरात पसरलेल्या कोरोना विषाणूचा प्रसार जगभर झाला. कोरोना विषाणूच्या उत्पत्तीबाबत गंभीर आरोप असूनही चीन आपल्या कारवायांना आवर घालत नसल्याचे दिसत आहे. चीन पाकिस्तानच्या रावळपिंडीजवळील काही गुप्त ठिकाणी पाकिस्तानच्या सहकार्याने बायो-वेपनच्या चाचण्या घेत असल्याचे वृत्त आहे. रोगजनकांचे जैव-शस्त्रांमध्ये रूपांतर करणे हा त्याचा उद्देश आहे.

मीडिया रिपोर्ट्सनुसार, चीनच्या वुहान इन्स्टिट्यूट ऑफ व्हायरोलॉजी आणि पाकिस्तान आर्मी द्वारा संचालित संरक्षण विज्ञान आणि तंत्रज्ञान संघटना (DSTO) ने पाकिस्तानमध्ये घातक रोगजनकांवर संशोधन करण्यासाठी अत्यंत प्रगत वैज्ञानिक पायाभूत सुविधा उभारल्या आहेत. वृत्तानुसार, आस्थापना नेमकी कुठे आहे हे उघड करण्यात आलेले नाही, कारण हे अत्यंत गुप्त पद्धतीने केले जात आहे. या संशोधनाचे शीर्षक 'कोलॅबोरेशन फॉर इमर्जिंग इन्फेक्शियस डिसीज अँड स्टडीज ऑन द बायोलॉजिकल कंट्रोल ऑफ वेक्टर ट्रान्समिटेड डिसीजेस' असे आहे.

डीएनएच्या रिपोर्टनुसार पाकिस्तानने मात्र हे सर्व दावे फेटाळून लावले आहेत. पाकिस्तानच्या परराष्ट्र कार्यालयाने सांगितले की, अहवालात करण्यात आलेल्या दाव्याप्रमाणे प्रयोगशाळेत बायो-सेफ्टी लेव्हल-3 (BSL-3) बाबत काहीही गोपनीय नाही. परंतु बायोवेपन्स तज्ज्ञांच्या मते, पाकिस्तानी लष्कराच्या अखत्यारीतील प्रयोगशाळा आणि चिनी प्रयोगशाळा यांच्यात कोणतेही वैज्ञानिक संशोधन होत नसून, त्याचा उद्देश रोगजनकांचे जैव-शस्त्रांमध्ये रूपांतर करणे हा आहे.

दरम्यान, कोरोना विषाणू जगामध्ये पसरल्यानंतर काही महिन्यांनी, एप्रिल-जुलै 2020 दरम्यान, ऑस्ट्रेलियन शोध पत्रकार अँथनी क्लान यांच्या दाव्याने जग हादरले होते. क्लान म्हणाले होते की चीनच्या वुहान इन्स्टिट्यूट ऑफ व्हायरोलॉजी आणि पाकिस्तानच्या संरक्षण विज्ञान आणि तंत्रज्ञान संघटना यांनी तीन वर्षांच्या करारावर स्वाक्षरी केली आहे. या गुप्त डीलचा उद्देश बायोवेपन्स बनवणे हा आहे. क्लानने दावा केला की, पाकिस्तानमध्ये एक गुप्त प्रयोगशाळा आहे, जी प्राणघातक विषाणूशी संबंधित अनेक संशोधन प्रकल्प चालवते. (हेही वाचा: Lab grown Blood to Humans: प्रथमच मानवी शरीरात चढवण्यात आले प्रयोगशाळेत विकसित केलेले रक्त; निकालांवर लागले संपूर्ण जगाचे लक्ष)

आता या प्रकरणाची माहिती असलेल्या गुप्तचर आणि वैज्ञानिक समुदायाशी संबंधित लोकांनी इशारा दिला आहे की, चीन आणि पाकिस्तान प्रयोगशाळेत विकसित होत असलेले विषाणू कोरोनापेक्षा शेकडो पटीने जास्त घातक आहेत.