iPhone 16 Pro and iPhone 16 Pro Max (Photo Credit: Apple)

Apple Event 2024: भारतीय वेळेनुसार आज रात्री साधारण साडेदहा वाजता ॲपल कंपनीच्या बहुप्रतीक्षित वार्षिक कार्यक्रमाला सुरुवात झाली. या इव्हेंटमध्ये कंपनीने, ॲपल वॉच मालिका 10 (Apple Watch Series 10), एअरपॉड्स (AirPods), आयफोन 16 सिरीज (iPhone 16 Series) सारखी अनेक उत्पादने सादर केली. कार्यक्रमाच्या सुरुवातीला कंपनीने ॲपल वॉच सिरीज 10 सादर केली. हे कंपनीचे नवीनतम स्मार्टवॉच आहे. वॉच सीरीज 10 मध्ये स्टेनलेस स्टील ऐवजी टायटॅनियम व्हेरिएंट देण्यात आला आहे. यामध्ये अनेक आरोग्य आणि फिटनेस सेन्सर उपलब्ध असतील. हे स्मार्टवॉच 30 मिनिटांत 80 टक्क्यांहून अधिक चार्ज होईल.

कंपनीने या घड्याळात मीडिया प्लेयरसह अनेक नवीन फीचर्स सादर केले आहेत. स्पीकरसह येणारे हे घड्याळ कंपनीचे असे पहिले स्मार्टवॉच आहे. याच्या मदतीने तुम्ही संगीत ऐकू शकता, यासाठी हेडफोनची गरज नाही. कंपनीच्या म्हणण्यानुसार हे घड्याळ युजर्समधील स्लीप एपनिया शोधण्यास समर्थन देईल. ॲपल वॉचमध्ये येणारे हे सर्वात मोठे फिचर आहे.  हे घड्याळ तीन रंगात आणण्यात आले आहे. यामध्ये नॅचरल, गोल्ड आणि डार्क स्लेट ग्रे यांचा समावेश आहे. नवीनतम स्मार्टवॉचची सुरुवातीची किंमत $399 (अंदाजे रु. 33,500) आहे. त्याच्या एका मॉडेलची किंमत 499 डॉलर (सुमारे 41,900 रुपये) आहे. त्याचे प्री-बुकिंग आजपासून सुरू होत आहे. हे घड्याळ 20 सप्टेंबरपासून विक्रीसाठी उपलब्ध होणार आहे.

आजच्या कार्यक्रमात ॲपल वॉच अल्ट्रा 2 नवीन फिनिशिंग आणि नवीन हर्मीस बँडसह सादर करण्यात आले आहे. त्याची किंमत 799 डॉलर आहे. त्याचे प्री-बुकिंगही आजपासून सुरू झाले आहे. 20 सप्टेंबरपासून तुम्ही ते खरेदी करू शकाल. हे नॅचरल आणि ब्लॅक या दोन रंगांच्या पर्यायांमध्ये उपलब्ध असेल. घड्याळानंतर ॲपलने आपल्या कार्यक्रमात नवीन एअरपॉड्स 4 सादर केले. एअरपॉड्स 4 च्या प्री-ऑर्डर सुरू झाल्या आहेत. त्यांची विक्री 20 सप्टेंबरपासून सुरू होणार आहे. याच्या बेस व्हेरिएंटची किंमत $129 आहे. यासह, सक्रिय आवाज रद्दीकरण (Active Noise Cancellation) मॉडेलची किंमत $179 पासून सुरू होते, यासह ॲपल एअरपॉड्स मॅक्स (Apple AirPods Max) ची किंमत $549 आहे.

त्यानंतर अखेर कंपनीने त्यांची आयफोन 16 सिरीज सादर केली. आयफोन 16 हा 5 रंगांमध्ये- काळा, पांढरा, निळा, हिरवा आणि गुलाबी, लॉन्च करण्यात आला आहे. आयफोन 16 मध्ये 6.1 इंच स्क्रीन दिली जाईल, तर आयफोन 16 प्लसमध्ये 6.7 इंच स्क्रीन डिस्प्ले दिला जाईल. पातळ बेझलमुळे फोनचा एकूण आकार थोडा लहान झाला आहे.

आयफोन 16 मधील कॅमेरा खूप चांगला झाला आहे. यात आता 48MP मुख्य सेन्सर आणि 12MP अल्ट्रा-वाइड अँगल लेन्स आहे. या फोनमध्ये कम्प्युटेशनल फोटोग्राफीचा वापर करण्यात आला असून, त्यामुळे फोटो आणखी चांगले येतील. कॅमेरा अनुभव आणखी सुधारण्यासाठी आयफोन 16 सिरीजमध्ये एक समर्पित कॅमेरा बटण जोडले गेले आहे. कॅमेरा सक्रिय करण्यासाठी आणि फोटो लवकर काढण्यासाठी हे बटण उपयुक्त ठरेल. (हेही वाचा: 5G Handset Market in 2024: अमेरिकेला मागे टाकत भारत ठरला जगातील दुसऱ्या क्रमांकाची सर्वात मोठी 5G हँडसेट बाजारपेठ)

ॲपलने आपल्या नवीन आयफोन 16 मध्ये एक अतिशय खास फीचर जोडले आहे, ज्याला ॲपल इंटेलिजेंस म्हणतात. तुमचे प्रश्न समजून घेण्यासाठी आणि उत्तरे देण्यासाठी हे फिचर खूप चांगले असेल. ते तुमची कार्यशैली देखील विचारात घेईल आणि तुमच्यासाठी सर्वोत्तम उत्तर देईल. ॲपलचे एआय मॉडेल पुढील महिन्यापासून काही देशांमध्ये उपलब्ध होणार आहे. डिसेंबरमध्ये ते अधिक देशांमध्ये उपलब्ध होईल. पुढील वर्षी ते अधिक भाषांमध्ये उपलब्ध होईल. ॲपलने म्हटले आहे की हे एआय वापरण्यासाठी सध्या तरी तुम्हाला कोणतेही पैसे द्यावे लागणार नाहीत.

आयफोन 16 च्या 128GB स्टोरेज व्हेरिएंटची किंमत $799 आहे आणि आयफोन 16 प्लसच्या 128GB स्टोरेज व्हेरिएंटची किंमत $899 आहे.

दुसरीकडे, आयफोन 16 प्रो मध्ये 6.3 इंच डिस्प्ले आहे, तर प्रो मॅक्स मॉडेल 6.9 इंच डिस्प्लेमध्ये येईल. हा सर्वात मोठा डिस्प्ले आहे. यामध्ये सर्वात पातळ बेझल देण्यात आले आहेत. हा आयफोन प्रो मॉडेल चार रंगांच्या पर्यायांमध्ये येतो. हे दोन्ही मॉडेल ॲपल इंटेलिजेंस सपोर्टसह येतील. आयफोन 16 प्रो मॉडेलमध्ये Apple A18 Pro चिपसेट दिला जाईल.

आयफोन 16 प्रो मॉडेलमध्ये ट्रिपल कॅमेरा सेटअप दिला जाईल. यात 48MP मुख्य कॅमेरा सेन्सर असेल, जो 24mm फोकल लेन्थसह येईल. याशिवाय 48MP अल्ट्रा वाईड कॅमेरा दिला जाईल. यामध्ये 13mm फोकल लेंथ सपोर्ट दिला जाईल. यात हायब्रिड फोकल पिक्सेल असतील. आयफोन 16 प्रोमध्ये 5x टेलीफोटो कॅमेरा असेल. फोन 120fps वर 4k व्हिडिओ रेकॉर्ड करण्यास सक्षम असेल. आयफोन 16 प्रो सुरुवातीची किंमत $999 आणि आयफोन प्रो मॅक्स मॉडेलची सुरुवातीची किंमत $1199 ठेवण्यात आली आहे. 16 प्रो 128GB बेस मॉडेलमध्ये येतो, तर 16 प्रो मॅक्स त्याच्या बेस मॉडेलमध्ये 256GB स्टोरेज ऑफर करतो.