Mumbai: वायफाय हॉटस्पॉटचा पासवर्ड देण्यास नकार दिल्याने 17 वर्षीय मुलाची हत्या

मुंबईतील कामोठे परिसरात वायफाय हॉटस्पॉटचा पासवर्ड देण्यास नकार दिल्याने एका 17 वर्षीय मुलाची दोघांनी हत्या केली. दोघेही दारूच्या नशेत होते. मुलाला पासवर्ड देण्याचा त्यांनी आग्रह केला, परंतु तरुणाने पासवर्ड न दिल्याने दोघांनी चाकूने भोसकून त्याची हत्या केली. या घटनेनंतर दोघांनाही पोलिसांनी अटक केली आहे, नवी मुंबई डीसीपी झोन-1 विवेक पानसरे यांनी सांगितले की, मयत आणि दोन्ही आरोपींमध्ये भांडण झाले, त्यानंतर दोन्ही आरोपींनी चाकूने वार करून मृताची हत्या केली.

अटक करण्यात आलेल्या आरोपींनी गुन्ह्याची कबुली दिली असून चौकशीत त्यांनी वायफायचा पासवर्ड न सांगितल्याने तरुणाचा वार करून खून केल्याचे उघड झाले. ही घटना 27 ऑक्टोबर रोजी रात्री 11 वाजण्याच्या सुमारास कामोठे परिसरातील एका इमारतीत घडली. रवींद्र अटवाल आणि राज वाल्मिकी अशी अटक केलेल्या दोन आरोपींची नावे असून दोघेही कामोठे परिसरातील मारुती भवन नावाच्या इमारतीत साफसफाईचे काम करतात.