Pune Ganesh Visarjan 2026: पुण्यातील विसर्जन मिरवणुकीत 120 ठिकाणी ध्वनिमापन; मर्यादा ओलांडणाऱ्या ढोल-ताशा पथकांवर कारवाई

गणेश विसर्जन मिरवणुकीत ध्वनिप्रदूषण रोखण्यासाठी पुणे पोलिसांनी कडक नियम जाहीर केले आहेत. मिरवणूक मार्गावरील 120 ठिकाणी ध्वनिपातळी मोजली जाईल. निर्धारित मर्यादेपेक्षा जास्त आवाज करणाऱ्या ढोल-ताशा पथकांवर कायदेशीर कारवाई होईल, असे पोलीस आयुक्त अमितेश कुमार यांनी सांगितले.

पुणे शहरातील मिरवणुकांमध्ये ध्वनिपातळी मर्यादेपेक्षा जास्त नोंदवली गेल्याचे यापूर्वी दिसले आहे. 20 सप्टेंबर रोजी, गणेशोत्सवाच्या सातव्या दिवशी सिंहगड रस्त्यावरील मिरवणुकीत रात्री सुमारे 9.30  ते 10.30 दरम्यान सरासरी 95 डेसिबल आवाज नोंदवला गेला. कमाल पातळी 109 डेसिबलपर्यंत गेली होती. मंडळांच्या प्रतिनिधींनी यापूर्वी डीजेवर कडक कारवाई होत असताना हजारो ढोलांच्या पारंपरिक वादनातूनही मोठा आवाज होतो, याकडे लक्ष वेधले होते.

ढोल-ताशा पथकांसाठी नियम

आतापर्यंत पोलीस प्रामुख्याने ध्वनिक्षेपक आणि इतर ध्वनियंत्रणांवर लक्ष ठेवत असत. यंदा ढोल-ताशा पथकांचाही या तपासणीत समावेश करण्यात आला आहे.

• प्रत्येक सहभागी गणेश मंडळाला केवळ दोन ढोल-ताशा पथके वापरता येतील.
• प्रमुख चौकांमध्ये सलग वादन १० मिनिटांपुरते मर्यादित राहील.
• "टोल" वाजवण्यावर निर्बंध आहेत.

पोलीस आयुक्तांनी पथकप्रमुखांना ध्वनिमर्यादेचे पालन करण्याचे आवाहन केले आहे. नक्की वाचा: Pune No-Parking Zones Visarjan Day: शहरातील 10 प्रमुख रस्त्यांवर 'नो-पार्किंग'; 48 तास सर्व जड वाहनांना शहरात प्रवेशबंदी.  

मंडळांच्या ध्वनियंत्रणेवर निर्बंध

प्रत्येक मंडळाला फक्त चार बास आणि चार टॉप स्पीकर वापरण्याची परवानगी आहे. प्रेशर मिड आणि प्लाझ्मा साउंड सिस्टीमसारख्या जास्त आवाजाच्या उपकरणांवर निर्बंध कायम आहेत. मिरवणुकीत मोठ्या क्षमतेचे लेझर दिवे वापरू नयेत, अशा सूचनाही पोलिसांनी मंडळांना दिल्या आहेत.

सहभागी मंडळांची ध्वनियंत्रणा मिरवणुकीच्या वेळी जागेवरच तपासली जाईल. नियमभंग आढळल्यास उपकरणे तत्काळ जप्त केली जातील आणि गुन्हा दाखल होईल.

मुंबई उच्च न्यायालयाचे निर्देश

पोलिसांनी हे नियम मुंबई उच्च न्यायालयाच्या ध्वनिप्रदूषणासंबंधी निर्देशांनुसार लागू केले आहेत. धार्मिक मिरवणुकांमधील ध्वनिप्रदूषणाची न्यायालयाने स्वतःहून दखल घेतली आहे. आवाजाची शास्त्रीय पद्धतीने मोजणी करून नियमभंगावर कारवाई करण्याची गरज न्यायालयाने अधोरेखित केली आहे.

मिरवणूक आणि बंदोबस्त

मुख्य विसर्जन मिरवणूक २५ सप्टेंबर रोजी महात्मा फुले मंडईतील लोकमान्य टिळक पुतळ्याजवळून सुरू होईल. लक्ष्मी रोड, टिळक रोड, केळकर रोड आणि कुमठेकर रोड या प्रमुख मार्गांवर पोलीस तैनात असतील.

शहरात सुमारे १०,००० पोलीस कर्मचारी तैनात केले जाणार आहेत. ३,५०० हून अधिक सीसीटीव्ही कॅमेऱ्यांतून फरासखाना पोलीस ठाण्यातून थेट निगराणी ठेवली जाईल.