Thane: गुन्हेगाराला अटक करण्यासाठी गेलेल्या मुंबई पोलिसांच्या पथकावर स्थानिकांचा हल्ला; 10 पोलिस जखमी

Thane: ठाणे जिल्ह्यात एका कथित गुन्हेगाराला अटक (Arrest) करण्याचा प्रयत्न करत असताना दगड आणि इतर अस्त्रांनी हल्ला केल्याने मुंबईतील (Mumbai) दहा पोलिस जखमी झाल्याची धक्कादायक घटना समोर आली आहे. बुधवार आणि गुरुवारी मध्यरात्री, मुंबईच्या अंधेरी पोलिस ठाण्यातील पोलिसांचे पथक एका गंभीर गुन्ह्यात सहभागी असलेल्या एका व्यक्तीला अटक करण्यासाठी कल्याणजवळील आंबिवली येथील इराणी बस्ती भागात पोहोचले, असे अधिकाऱ्याने पीटीआयनुसार सांगितले.

या परिसरात पोलिसांच्या उपस्थितीची बातमी पसरताच महिलांसह अनेक स्थानिकांनी त्यांच्यावर दगडफेक केली. कल्याणमधील खडकपाडा पोलिस स्टेशनचे स्टेशन हाऊस ऑफिसर म्हणाले की, या हल्ल्यात किमान 10 पोलिस किरकोळ जखमी झाले. अधिकाऱ्याने सांगितले की, इराणी बस्ती येथे यापूर्वी गुन्हेगारांना पकडण्याच्या प्रयत्नात अनेकवेळा पोलिसांवर हल्ले झाले आहेत. (हेही वाचा - Cyber Crimes: मनोरंजनातून जागृती! 'हास्यजत्रा'ची क्लिप शेअर करत मुंबई पोलिसांचे केवायसी, ओटीपी आणि ऑनलाईन बँकिंगच्या फसवणुकीपासून सावध राहण्याचे आवाहन (Watch))

पोलिस पथकावर झालेल्या हल्ल्याप्रकरणी गुन्हा दाखल करण्यात येत असल्याचे अधिकाऱ्याने सांगितले. दरम्यान, दुसऱ्या एका घटनेत ठाणे जिल्ह्यात छत्रपती शिवाजी महाराज टर्मिनस-जाणाऱ्या एसी लोकल ट्रेनवर दगडफेक केल्याप्रकरणी सरकारी रेल्वे पोलिसांनी दोन जणांना अटक केली. या घटनेत एक महिला प्रवासी जखमी झाली.

एका सरकारी रेल्वे पोलिस अधिकाऱ्याने सांगितले की, एसी उपनगरीय ट्रेन टिटवाळा ते मुंबईत सीएसएमटीकडे जात असताना ठाकुर्ली आणि डोंबिवली दरम्यान सकाळी गर्दीच्या वेळी त्यावर दगडफेक करण्यात आली. या हल्ल्यात ट्रेनमधील 28 वर्षीय महिला जखमी झाली. सरकारी रेल्वे पोलिसांनी परिसरातील रेल्वेच्या आवारात बसवण्यात आलेल्या सीसीटीव्ही कॅमेऱ्यांचे फुटेज तपासले. त्यानंतर आरोपींना अटक करण्यात आली.