Mumbai Metro One Extends Services: गणेश उत्सवाच्या काळात मुंबई मेट्रो वन वर देखील रात्री उशिरापर्यंत सेवा; पहा वेळापत्रक

गणेशोत्सव 2026 च्या पार्श्वभूमीवर मुंबईतील सार्वजनिक वाहतूक व्यवस्थेत महत्त्वाचा बदल करण्यात आला असून, मुंबई मेट्रो वनने (Mumbai Metro One) आपल्या सेवांच्या वेळेत वाढ करण्याची घोषणा केली आहे. 14 सप्टेंबर ते 25 सप्टेंबर या कालावधीत मेट्रो सेवा रात्री उशिरापर्यंत, म्हणजेच 1 वाजून 3 मिनिटांपर्यंत सुरू ठेवण्यात येणार आहेत. गणेशोत्सवाच्या मुख्य कालावधीत मंडपांचे दर्शन घेण्यासाठी तसेच उत्सवात सहभागी होण्यासाठी मोठ्या संख्येने नागरिक व भाविक शहरभर प्रवास करत असल्याने, हा निर्णय घेण्यात आल्याचे मेट्रो प्रशासनाकडून सांगण्यात आले आहे.

अधिकृत निवेदनानुसार, रात्रीच्या वेळी प्रवाशांना सुरक्षित, विश्वासार्ह आणि सोयीस्कर सार्वजनिक वाहतुकीचा पर्याय उपलब्ध करून देणे, हा या उपक्रमामागील मुख्य उद्देश आहे. नक्की वाचा: Ganesh Visarjan 2026 Full Calendar: अनंत चतुर्दशी कधी? जाणून घ्या तारीख, शुभ मुहूर्त आणि विसर्जनाचे संपूर्ण कॅलेंडर. 

रात्रीच्या फेऱ्यांच्या सुधारित वेळा

तात्पुरत्या सुधारित वेळापत्रकानुसार, वर्सोवा-अंधेरी-घाटकोपर या मार्गिकेवरील शेवटच्या फेऱ्या तब्बल बारा दिवसांसाठी नेहमीपेक्षा उशिरा धावणार आहेत. सुधारित वेळापत्रकानुसार अंतिम फेऱ्यांच्या वेळा पुढीलप्रमाणे आहेत:

• वर्सोवा ते घाटकोपर: शेवटची गाडी रात्री 12.15 वाजता सुटेल.
• घाटकोपर ते वर्सोवा: शेवटची गाडी रात्री 12.40 वाजता सुटेल आणि वर्सोवा टर्मिनलवर पहाटे  1.03 वाजता पोहोचेल.

मुंबई मेट्रो वाढीव वेळापत्रक व्यवस्था 25 सप्टेंबरपर्यंत

मुंबई मेट्रोची ही वाढीव वेळापत्रक व्यवस्था 25 सप्टेंबरपर्यंत सलगपणे लागू राहणार आहे. रात्री उशिरा प्रवास करणाऱ्या प्रवाशांनी सुधारित वेळापत्रक तपासून आणि त्यानुसार आपला प्रवास नियोजित करून शेवटच्या फेऱ्यांचा लाभ घ्यावा, असे आवाहन प्रशासनाकडून करण्यात आले आहे.

दरम्यान, गणेशोत्सव २०२६ च्या उत्सवादरम्यान प्रवाशांच्या सोयीसाठी मुंबई मेट्रो रेल कॉर्पोरेशन लिमिटेडने (एमएमआरसीएल) अ‍ॅक्वा लाईन अर्थात मेट्रो लाईन 3 च्याही सेवा 14 ते 25 सप्टेंबर या कालावधीत मध्यरात्रीपर्यंत वाढवल्या आहेत.

अ‍ॅक्वा लाईनवरील गर्दीच्या भागांचा समावेश

अ‍ॅक्वा लाईन ही मुंबईतील अशा अनेक भागांतून जाते, जेथे गणेशोत्सवादरम्यान मोठ्या प्रमाणात गर्दी होते. यामध्ये सिद्धिविनायक, दादर, वरळी, महालक्ष्मी आणि गिरगाव यांसारख्या प्रमुख भागांचा समावेश आहे. या भागांतील प्रसिद्ध सार्वजनिक गणेश मंडळांच्या दर्शनासाठी दरवर्षी लाखो भाविक गर्दी करतात, त्यामुळे मेट्रो सेवांच्या वाढीव वेळेचा मोठा फायदा प्रवाशांना होण्याची शक्यता आहे.

एकंदरीत, मेट्रो वन आणि मेट्रो लाईन ३ या दोन्ही मार्गिकांवरील वाढीव सेवांमुळे गणेशोत्सव काळात मुंबईकरांना रात्री उशिरापर्यंत सुरक्षित व सोयीस्कर प्रवासाचा पर्याय उपलब्ध होणार आहे.