Maharashtra SIR ची प्रारूप मतदार यादी आज होणार प्रसिद्ध; नाव कसं तपासाल? नाव गायब असल्यास काय कराल?

Maharashtra SIR Draft Voter Rolls Out Today: विशेष सखोल पुनरीक्षण (SIR) प्रक्रियेअंतर्गत आज महाराष्ट्र राज्याची प्रारूप मतदार यादी प्रसिद्ध होणार आहे. या यादीत आपले नाव समाविष्ट झाले आहे की नाही, हे तपासण्याची संधी मतदारांना मिळणार आहे. निवडणूक आयोगाने यासाठी मतदार सेवा पोर्टलद्वारे ऑनलाइन सुविधा उपलब्ध करून दिली असून, बूथ स्तर अधिकारी (बीएलओ) आणि निर्धारित मतदार केंद्रांच्या माध्यमातूनही मतदारांना आपले नाव तपासता येणार आहे.

31 ऑगस्ट ते 30 सप्टेंबर दरम्यान हरकती दाखल होणार

प्रारूप मतदार यादी प्रसिद्ध होणे हा पुनरीक्षण प्रक्रियेचा अंतिम टप्पा नाही. ज्या मतदारांचे नाव यादीतून गहाळ आहे किंवा तपशिलात त्रुटी आढळल्या आहेत, अशा मतदारांना निर्धारित कालावधीत हरकती आणि तक्रारी दाखल करता येणार आहेत. महाराष्ट्रात सुधारित वेळापत्रकानुसार 31 ऑगस्ट ते 30 सप्टेंबर या कालावधीत हरकती आणि तक्रारी दाखल करता येतील, तर अंतिम मतदार यादी 4 नोव्हेंबर रोजी प्रसिद्ध होणार आहे.

SIR मध्ये ऑनलाइन नाव कसे तपासावे

निवडणूक आयोगाच्या मतदार सेवा पोर्टलवर मतदार यादीतील माहिती शोधण्याची आणि एसआयआरअंतर्गत येणाऱ्या राज्यांची प्रारूप मतदार यादी डाउनलोड करण्याची सुविधा उपलब्ध आहे. यासाठी पुढील पद्धत अवलंबता येईल:

• ECI's Voter's Services Portal ला भेट द्या.
• मतदार यादीत नाव शोधण्याचा किंवा एसआयआरशी संबंधित सेवांचा पर्याय निवडा.
• राज्य, जिल्हा आणि विधानसभा मतदारसंघ यांसारखी आवश्यक माहिती भरावी.
• एपिक क्रमांक किंवा इतर उपलब्ध तपशिलाच्या आधारे शोध घ्यावा.
• मतदार यादीत दाखवलेले नाव, वय, नातेवाइकाचे नाव आणि इतर तपशील तपासा.

  आवश्यकता भासल्यास संबंधित प्रारूप मतदार यादीची पीडीएफ डाउनलोड करून मतदान केंद्रनिहाय यादी तपासावी.

ECINET App द्वाराही तपासणी शक्य

मतदार सेवांसाठी ECINET App या मोबाइल अ‍ॅपचाही वापर करता येतो. निवडणूक आयोगाच्या पोर्टलवर एसआयआरशी संबंधित सुविधांसह उपलब्ध असलेल्या माध्यमांमध्ये या अ‍ॅपचा समावेश करण्यात आला आहे. एसआयआर पडताळणीसाठी आयोगाकडे स्वतंत्र शोध सुविधाही उपलब्ध असून, एपिक क्रमांक, मतदाराचे नाव, जिल्हा, विधानसभा मतदारसंघ आणि मतदान केंद्राचा तपशील वापरून शेवटच्या एसआयआर मतदार यादीत शोध घेता येतो.

नावाच्या स्पेलिंगमधील फरकामुळे शोध निकालांवर परिणाम होऊ शकतो, असे पोर्टलवर नमूद करण्यात आले आहे. अचूक स्पेलिंगने नाव न सापडल्यास मतदारांनी वेगवेगळे स्पेलिंग वापरून पाहावेत आणि जिल्हा, विधानसभा मतदारसंघ व मतदान भाग यांसारखी अतिरिक्त माहिती द्यावी, असा सल्ला देण्यात आला आहे.

नाव नसल्यास काय कराल?

पात्र मतदार ज्यांचे नाव प्रारूप यादीत नाही, तसेच नव्याने पात्र ठरलेले मतदार यांना विहित घोषणापत्रासह फॉर्म 6 भरून हरकती व तक्रारींच्या कालावधीत सादर करता येईल. यासाठी आधार कार्ड, जन्म किंवा विवाह प्रमाणपत्र, मागील म्हणजे 2025 सालच्या यादीतील उतारा आणि पासपोर्ट आकाराचा फोटो यांसारखी कागदपत्रे आवश्यक असतील. नाव, वय किंवा इतर तपशिलात दुरुस्ती हवी असल्यास मतदारांना फॉर्म 8 याच कालावधीत सादर करता येईल.

महाराष्ट्रातील मतदारांसाठी राज्यस्तरीय सुविधा

महाराष्ट्राच्या मुख्य निवडणूक अधिकारी कार्यालयाच्या संकेतस्थळावर एसआयआर २०२६ साठी स्वतंत्र विभाग तयार करण्यात आला असून, त्यात सुधारित वेळापत्रक, एसआयआर सूचना, वारंवार विचारले जाणारे प्रश्न, मदत केंद्रे आणि मतदारांशी संबंधित इतर माहितीच्या लिंक्स देण्यात आल्या आहेत. त्यामुळे महाराष्ट्रातील मतदार ईसीआयच्या पोर्टलसोबतच राज्याच्या सीईओ संकेतस्थळावरूनही प्रारूप यादी तपासू शकतात.

राज्याच्या सीईओ संकेतस्थळावर एएसडीडी (अनुपस्थित, स्थलांतरित, डुप्लिकेट आणि मृत मतदार) ही सुविधाही उपलब्ध असून, यामध्ये मतदारांना आपल्या एपिक क्रमांकाच्या आधारे काही नोंदी तपासता येतात.

महाराष्ट्रातील SIR वेळापत्रक

निवडणूक आयोगाने महाराष्ट्राचे एसआयआर वेळापत्रक सुधारित केले आहे. 31ऑगस्ट रोजी प्रारूप मतदार यादी प्रसिद्ध होत असून, 30 सप्टेंबरपर्यंत हरकती आणि तक्रारी दाखल करता येणार आहेत. नोटीस टप्पा आणि हरकती-तक्रारींचा निपटारा 29 ऑक्टोबरपर्यंत सुरू राहणार आहे. अंतिम मतदार यादी 4 नोव्हेंबर रोजी प्रसिद्ध केली जाणार आहे.

महाराष्ट्रात घरोघरी जाऊन गणना करण्याची प्रक्रिया पूर्ण झाली असून, कागदपत्रे गोळा करण्याचे काम 17 ऑगस्ट रोजी संपले. निवडणूक आयोगाने दिलेल्या आकडेवारीनुसार, महाराष्ट्रात एकूण 9.78 कोटी मतदार असून, यापैकी 7.71  कोटी म्हणजेच 78.85 टक्के मतदारांनी घरोघरी गणनेदरम्यान भरलेले आणि स्वाक्षरी केलेले गणना फॉर्म सादर केले आहेत.