मुंबईच्या रस्त्यांवर झळकले "थँक यू कॅप्टन स्मित"! Israeli Consulate ची भारतीय वैमानिकासाठी खास मानवंदना

फ्लायदुबई विमानातील घटनेत धैर्य दाखवणारे भारतीय वैमानिक कॅप्टन स्मित माछर यांचे आभार मानण्यासाठी इस्रायलच्या मुंबईतील वाणिज्य दूतावासाने शहरात होर्डिंग्ज लावली आहेत. "थँक यू, कॅप्टन स्मित" असा संदेश असलेली ही होर्डिंग्ज शहरातील अनेक प्रमुख चौकांत आणि महामार्गांवर दिसत आहेत.

30 सप्टेंबर रोजी दुबईहून तेल अवीवकडे जाणाऱ्या फ्लायदुबईच्या FZ1073 विमानातील ही घटना आहे. वृत्तांनुसार सहवैमानिकाने माछर यांच्यावर चाकूने हल्ला केला आणि विमान पाडण्याचा प्रयत्न केला, असा आरोप आहे. माछर गंभीर जखमी झाले, तरीही त्यांनी कॉकपिटचे दार उघडले. त्यामुळे क्रू आणि प्रवाशांना आत जाऊन परिस्थिती नियंत्रणात आणता आली. विमानाचे सौदी अरेबियात आपत्कालीन लँडिंग झाले आणि सहवैमानिकाला ताब्यात घेण्यात आले. संयुक्त अरब अमिराती आणि इस्रायलच्या अधिकाऱ्यांसह तपास सुरू आहे.

होर्डिंग्जवर काय संदेश आहे?

होर्डिंग्जवर इंग्रजीत संदेश असून त्याचा आशय असा आहे: इस्रायली नागरिकांचे प्राण वाचवल्याबद्दल कॅप्टन स्मित यांचे आभार आणि ते लवकर बरे व्हावेत यासाठी शुभेच्छा. दूतावासाने हा उपक्रम जनजागृती मोहीम म्हणून सुरू केला आहे.

वृत्तांनुसार ही होर्डिंग्ज वरळीतील वॉर्डन रोड आणि नेपियन सी रोडच्या चौकात, वांद्रे पूर्व येथे पश्चिम द्रुतगती महामार्गावरील प्रबोधनकार ठाकरे उड्डाणपुलाजवळ आणि बीकेसी-सायन लिंक रोडवर लावण्यात आली आहेत. याशिवाय अंधेरी-जोगेश्वरी उड्डाणपूल आणि माहीमजवळील तुळशी पाइपलाइन रोड येथेही ती दिसतात. नक्की वाचा: मृत्यूच्या दारात असताना Captain Smit Machchhar यांना धैर्य कुठून मिळालं? PM Modi ना सांगितलं रहस्य.  

दूतावासाची प्रतिक्रिया

दूतावासाचे कॉन्सुल जनरल रेवाच यांनी वृत्तसंस्थेशी बोलताना इस्रायल सरकार आणि जनतेच्या वतीने माछर यांचे आभार मानले. गंभीर जखमी असतानाही माछर यांनी कॉकपिटचे दार उघडले, त्यामुळे इतरांना हस्तक्षेप करून हल्लेखोराला रोखता आले, असे ते म्हणाले. ही घटना दहशतवादी हल्ला असल्याबद्दल कोणतीही शंका नसल्याचे त्यांनी सांगितले. भारतीय नागरिकांनी यापूर्वीही ज्यू लोकांचे प्राण वाचवले असल्याचे सांगत त्यांनी भारताबद्दल कृतज्ञता व्यक्त केली.

दूतावासाच्या निवेदनानुसार माछर यांच्या कृतीमुळे विमानातील सुमारे १७४ जणांचे प्राण वाचले. काही वृत्तांमध्ये हा आकडा १८० असल्याचे नमूद आहे.

नेतन्याहू यांचीही प्रशंसा

इस्रायलचे पंतप्रधान बेंजामिन नेतन्याहू यांनी यापूर्वी माछर यांच्या कृतीला मोठे शौर्य म्हटले होते. जीवासाठी झुंजत असतानाही माछर यांनी कॉकपिटचे दार उघडले, त्यामुळे ९/११ सारखी दुर्घटना टळू शकली, असे त्यांनी म्हटले होते.

माछर यांची प्रकृती सुधारत असल्याची माहिती भारतीय राजदूतांनी दिली आहे. दरम्यान आज  पंतप्रधान नरेंद्र मोदी यांनीही त्यांच्याशी संवाद साधून त्यांच्या धैर्याचे कौतुक केले.