Beed Rape Case: आंबेजोगाईमध्ये नोकरीचे आमिष दाखवून अल्पवयीन विवाहितेवर सहा महिन्यांत 400 वेळा बलात्कार, 9 जणांवर गुन्हा दाखल

नोकरीचे आमिष दाखवून अल्पवयीन विवाहितेवर गेल्या सहा महिन्यांत 400 वेळा बलात्कार (Rape) केल्याची हृदयद्रावक घटना समोर आली आहे. ही घटना बीड (Beed), महाराष्ट्रातील अंबाजोगाई (Ambajogai) येथील आहे. पीडित मुलगी दोन महिन्यांची गर्भवती आहे. याप्रकरणी बाल कल्याण समितीने पीडितेचा गर्भपात करून घेण्याची प्रक्रिया पूर्ण करण्यास सुरुवात केली आहे. पीडितेच्या तक्रारीनंतर अंबाजोगाई ग्रामीण पोलिसांनी 9 जणांविरुद्ध गुन्हा दाखल केला आहे. पीडितेच्या वडिलांसह चार आरोपींना अटक करण्यात आली आहे. पोलीस अधीक्षक आर राजा यांनी दिलेल्या माहितीनुसार, या प्रकरणाचा तपास करताना पोलिसांनी अंबाजोगाई शहरातील सर्व लॉजची झडती घेऊन सीसीटीव्ही फुटेज स्कॅन करण्यास सुरुवात केली आहे.

पीडित मुलगी अल्पवयीन असून ती मजूर कुटुंबातील आहे. पीडित मुलीच्या आईचा दोन वर्षांपूर्वी मृत्यू झाला होता. आईच्या मृत्यूनंतर पीडितेच्या वडिलांनी तिचे लग्न लावून दिले. पीडित मुलगी लग्नानंतर दीड वर्ष तिच्या सासरच्या घरी राहत होती. मात्र सासूच्या सततच्या छळामुळे ती माहेरी परतली. माहेरी आल्यानंतर पीडित मुलगी नोकरी शोधण्यासाठी शहरात गेली. अंबाजोगाई शहरातील एका अकादमीत त्यांची दोन लोकांशी भेट झाली.

नोकरी लावण्याच्या नावाखाली दोघांनी पीडितेवर बलात्कार केला. यानंतर पीडितेवर वेगवेगळ्या लोकांनी सहा महिने वारंवार बलात्कार केला. पीडितेच्या तक्रारीनुसार, तिच्यावर 400 हून अधिक वेळा बलात्कार झाला. पीडित मुलगी आज 20 आठवड्यांची गरोदर आहे. पीडितेने तिच्यासोबतची ही वेदनादायक घटना बाल कल्याण समितीच्या सदस्यांना सांगितली. हेही वाचा Mumbai: मुंबईत सुरक्षेत वाढ, मुंबई पोलिस झाले अधिक सतर्क

पीडित तरुणीने यापूर्वी अंबाजोगाई शहर पोलिसात बलात्काराची तक्रार दिली होती. मात्र पोलिसांनी त्यांची तक्रार ऐकून घेतली नाही. एवढेच नाही तर त्यावेळी ड्युटीवर असलेल्या पोलीस कर्मचाऱ्याने तिला एका लॉजमध्ये नेऊन तिच्यावर बलात्कार केला. असे पीडितेने तक्रारीत म्हटले आहे. पोलिसांनी केलेल्या बलात्काराच्या वृत्ताने शहरात खळबळ उडाली आहे. या संपूर्ण प्रकरणाची सखोल चौकशी करण्याचे आदेश बीड जिल्ह्याचे पोलीस अधीक्षक आर.राजा यांनी दिले आहेत.