Cyclone Nisarga Tracker And Live News Updates: राजधानी दिल्लीला लागून असलेल्या नोएडामध्ये भूकंपाचे धक्के जाणवले

बुधवारी रात्री राजधानी दिल्लीला लागून असलेल्या नोएडामध्ये भूकंपाचे धक्के जाणवले. या भूकंपाची तीव्रता 3.2 रिश्टर स्केल नोंदवली गेली आहे. हवामान खात्याच्या म्हणण्यानुसार बुधवारी रात्री 10.42 वाजता दक्षिण पूर्व नोएडा येथे हे भूकंपाचे धक्के जाणवले.

निसर्ग चक्रीवादळाच्या तडाख्यातून मुंबईसह महाराष्ट्राचे रक्षण करणाऱ्या सगळ्यांचे मुख्यमंत्री उद्धव बाळासाहेब ठाकरे यांनी आभार मानले आहेत.

महाराष्ट्राच्या रायगड, धुळे, नंदुरबार, नाशिक जिल्ह्यात वेगवेगळ्या ठिकाणी आणि ठाणे, रत्नागिरी, सिंधुदुर्ग, अहमदनगर, पुणे, कोल्हापूर, सातारा जिल्ह्यात  येत्या अडीच तासात मुसळधार पाऊस पडण्याची शक्यता आहेः IMD

रत्नागिरी व श्रीवर्धन येथे वीजपुरवठा पूर्ववत सुरू झाला आहे. मुरुड, मांडगांव, गोरेगाव, अलिबाग, म्हसळा, गुहागर, दापोली तालुक्‍यातील वीज पुरवठा ईएचव्ही स्थानकांवरून वीजपुरवठा बंद केला होता. वारा व पाऊस थंडावल्यानंतर तो सुरु केला आहे.

निसर्ग चक्रीवादळामुळे, पुणे विमानतळ येथे आज हवामानाच्या परिस्थितीमुळे 6 विमाने वळविण्यात आली आणि 1 रद्द केले. विमानतळ संचालकांनी याबाबत माहिती दिली.

निसर्ग चक्रीवादळामुळे आज सायंकाळपर्यंत झाडे पडण्यासंदर्भात 60 फोन आणि पाणी तुंबल्याबाबत 9 लोकांच्या कॉलला प्रतिसाद दिला- अग्निशमन दल, पुणे महानगरपालिका

संभाव्य चक्रीवादळ व मॉन्सून तयारीच्या अनुषंगाने, महापालिका आयुक्त इक्बाल सिंह चहल यांनी लव्हग्रोव्ह पंपिंग स्टेशन व परिसराला भेट देऊन पाहणी केली.

 मुंबईला निसर्ग चक्रीवादळाचा असलेला धोका कमी झालेला असला तरी पुढील काही तास महत्त्वाचे असल्याचे बाळासाहेब थोरात यांनी सांगितले आहे. ते म्हणाले, 'चक्रीवादळ केंद्रबिंदू पासून सरासरी 200 किमी पर्यंत परिणाम करते. वादळाची दिशा पाहता पुणे, नाशिक अहमदनगर जिल्ह्यातील प्रशासन दक्ष आहे. नागरिकांनीही काळजी घ्यावी, प्रशासनाने केलेल्या सूचनांचे पालन करावे.'

तसेच या वादळानंतरच्या कामाची माहिती देताना ते म्हणाले, 'निसर्ग चक्रीवादळ रायगडमधून कर्जतकडे सरकले आहे. आतापर्यंत सर्वाधिक फटका मुरुड आणि श्रीवर्धनाला बसला आहे. वादळामुळे झालेल्या नुकसानीचे पंचनामे करण्याचे काम सुरू आहे. तातडीने जनजीवन पूर्वपदावर आणण्यासाठी युद्धपातळीवर प्रयत्न सुरू आहेत.' 

आज महाराष्ट्रातील अलिबाग परिसरात विद्युत खांब पडल्याने एका 58 वर्षीय व्यक्तीचा मृत्यू झाला आहे. जिल्हाधिकारी निधी चौधरी यांनी याबाबत माहिती दिली.

सध्या निसर्ग चक्रीवादळ महाराष्ट्रात, अलिबागपासून पूर्वे-ईशान्य दिशेला 100 किमी, मुंबईपासून 90 कि.मी. पूर्वेकडे आणि पुण्याच्या उत्तर-वायव्य दिशेला 50 किमी अंतरावर केंद्रित आहे. गेल्या 6 तासात 23 किमी प्रतितास वेगाने ते ईशान्य दिशेने पुढे सरकले आहे.

निसर्ग चक्रीवादळाने आज अलिबाग येथे धडक दिली होती, त्यानंतर आता रायगड जिल्ह्यातील अलिबाग येथे एनडीआरएफची टीम या वादळानंतरची कामे करत आहे.

निसर्ग चक्रीवादळा पासून सुरक्षित राहण्याकरिता तात्पुरते स्थलांतरित झालेल्या व्यक्तींना, बृहन्मुंबई महानगरपालिका कर्मचार्‍यांनी अन्न व पाणी वाटप केले.

सध्या निसर्ग चक्रीवादळाचा धोका जरी मुंबईवरून टळला असला तरी, यामुळे झालेल्या पावसाने महाराष्ट्रातील काही भागांचे नुकसान केले आहे.या वादळाच्या पावसामुळे मुंबईच्या बीकेसी येथे बांधलेल्या कोरोना व्हायरसच्या जम्बो रुग्णालयात पाणी शिरले आहे. नितेश राणे यांनी याबाबतचा व्हिडिओ शेअर केला आहे.

रायगड मध्ये निसर्ग चक्रीवादळामुळे कोसळलेली झाडं हटवण्याच्या कामाला सुरूवात झाली आहे. प्रशासन, पोलिस यांच्याकडून रस्ता पुना पूर्ववत करण्याचे काम हाती घेण्यात आलं आहे.

निसर्ग चक्रीवादळ महाराष्ट्राच्या किनारपट्टीला धडकल्यानंतर आता उत्तर महाराष्ट्राच्या दिशेने सरकले आहे. त्यानुसार स्थानिक प्रशासनाला सज्ज राहण्याचे आदेश देण्यात आले आहेत.

आज रायगडमध्ये निसर्ग चक्रीवादळ धडकल्यानंतर अनेक ठिकाणी नुकसान झाले आहे.  अलिबाग नजिक रामराज येथे विजेची डीपी पडल्याने एक व्यक्ती जखमी झाला असून त्याच्यावर उपचार करण्यात येत आहेत. तर काही ठिकाणी विजेचे खांब कोसळल्याचेही चित्र आहे.

निसर्ग चक्रीवादळामध्ये सोसट्याचा वारा वाहत आल्याने एका कामकाम सुरु असलेल्या इमरतीचा सिमेंट ब्लॉक पडल्याने सांताक्रुझमध्ये 3 जण जखमी झाले आहेत.

मुंबईवरील निसर्ग चक्रीवादळाचा धोका टळल्याचा स्कायमेटचा अंदाज आहे. त्यांनी दिलेल्या माहितीनुसार, आज रात्रीपर्यंत पाऊस बसरू शकतो. वार्‍याचा वेग देखील ताशी 50 किमी प्रति तास असू शकते.

रायगडच्या जिल्हाधिकारी निधी चौधरी यांनी दिलेल्या माहितीनुसार, रायगड मध्ये काही ठिकाणी मोबाईल नेटवर्क सेवा विस्कळीत झाली आहे. काही तासांपूर्वी रायगडच्या किनार्‍यावर निसर्ग चक्रीवादळ धडकलं आहे.

रत्नागिरीमध्ये आज निसर्ग चक्रीवादळानंतर खवळलेल्या समुद्रात अडकलेली एक बोट आणि 10 खलाशी यांची सुखरूप सुटका करण्यात आली आहे.