Ashish Shelar Demand: महसूल विभागाने मुंबई उपनगरातील गृहनिर्माण सोसायट्यांना जारी केलेल्या अकृषिक कर नोटिसांना स्थगिती देण्याची आशिष शेलारांची मागणी
Ashish Shelar (Photo Credits-ANI)

भारतीय जनता पक्षाचे (BJP) नेते आशिष शेलार (Ashish Shelarयांच्या नेतृत्वाखालील शिष्टमंडळाने  सोमवारी संध्याकाळी महाराष्ट्राचे महसूल मंत्री बाळासाहेब थोरात (Balasaheb Thorat) यांची भेट घेऊन महसूल विभागाने मुंबई उपनगरातील गृहनिर्माण सोसायट्यांना जारी केलेल्या अकृषिक (NA) कर नोटिसांना स्थगिती देण्याची मागणी केली. मुंबईच्या उपनगरातील सुमारे 20,000 गृहनिर्माण संस्थांवर दरवर्षी अकृषिक कर आकारला जातो, जो अन्यायकारक आहे. या सोसायट्यांनी बांधकामाच्या वेळीच हा कर भरला आहे. तसेच, मुंबई बेट शहरातील सोसायट्यांना लागू नसताना उपनगरातील सोसायट्यांना हा कर का लावला जातो? शेलार म्हणाले.

यापूर्वीच्या भाजप सरकारने अकृषिक कर वसुलीला स्थगिती दिल्याचेही शेलार यांनी महसूलमंत्र्यांच्या निदर्शनास आणून दिले. हा कर भरण्यासाठी 2008 पासून बजावण्यात आलेल्या नोटिसांना तत्कालीन महसूलमंत्री चंद्रकांत पाटील यांनी भाजप सरकारमध्ये स्थगिती दिली होती, असे ते म्हणाले. स्थानिक नगरसेविका अलका केरकर आणि वांद्रे येथील सेंट सेबॅस्टियन हाउसिंग सोसायटी आणि सांताक्रूझ येथील सारस्वत हाउसिंग सोसायटीचे सदस्य या शिष्टमंडळात होते. हेही वाचा Money Laundering Case: ईडीकडून माजी गृहमंत्री अनिल देशमुखांच्या पत्नीच्या याचिकेला विरोध करणारे न्यायालयात प्रतिज्ञापत्र दाखल

कोविड-19 साथीच्या आजारामुळे सोसायट्या आर्थिक संकटात सापडल्या असून त्यांच्यावर अकृषिक करांचा अधिक बोजा टाकू नये, असे शिष्टमंडळाने मंत्र्यांना सांगितले. याबाबत मुख्यमंत्री उद्धव ठाकरे यांच्याशी चर्चा करून लवकरच निर्णय घेतला जाईल, असे आश्वासन थोरात यांनी शिष्टमंडळाला दिले.