Good Friday 2025 History and Significance: यंदा 18 एप्रिल रोजी पाळला जाणार 'गुड फ्रायडे'; जाणून घ्या ख्रिश्चन धर्मातील या महत्त्वाच्या आणि शोकपूर्ण दिवसाचे महत्व आणि इतिहास

‘गुड फ्रायडे’ (Good Friday 2025) हा ख्रिश्चन धर्मातील एक अत्यंत महत्त्वाचा आणि शोकपूर्ण दिवस आहे, जो येशू ख्रिस्ताच्या क्रूसावरील बलिदान आणि मृत्यूच्या स्मरणार्थ पाळला जातो. यंदा, 2025 मध्ये, हा दिवस 18 एप्रिल रोजी येणार आहे, जो ईस्टर संडेच्या आधीचा शुक्रवार आहे. हा दिवस ख्रिश्चनांसाठी प्रेम, त्याग आणि उद्धार यांचे प्रतीक आहे, कारण येशूंनी मानवजातीसाठी आपले जीवन अर्पण केले. ख्रिश्चन समुदाय असलेल्या भागांत हा दिवस श्रद्धेने व्यतीत केला जातो. यावेळी चर्चमध्ये बायबलमधील वाचन, प्रार्थना, गुड फ्रायडेची गाणी, प्रवचने यांचे आयोजन केले जाते.

गुड फ्रायडेचे महत्व-

गुड फ्रायडे हा येशू ख्रिस्ताला गोलगोथा (कॅल्व्हरी) येथे क्रूसावर चढवण्याच्या घटनेची आठवण करून देतो. ख्रिश्चन विश्वासानुसार, येशूंनी मानवजातीच्या पापांसाठी स्वतःचे बलिदान दिले, ज्यामुळे त्यांना उद्धाराचा मार्ग मिळाला. हा दिवस शोकाचा असला तरी त्याला ‘गुड’ म्हणतात, कारण येशूंचा हा त्याग मानवतेसाठी चांगुलपणाचा आणि प्रेमाचा संदेश घेऊन आला. काहींच्या मते यामागे येशूंच्या बलिदानाची पवित्रता आहे. जर्मनीत हा दिवस ‘कारफ्रायटॅग’ (Karfreitag) म्हणजे ‘दु:खाचा शुक्रवार’ म्हणून ओळखला जातो, जो त्याच्या शोकपूर्ण स्वरूपावर प्रकाश टाकतो. हा दिवस ख्रिश्चनांसाठी आत्मचिंतन आणि प्रार्थनेचा आहे, जिथे ते येशूंच्या प्रेमाचा आणि त्यागाचा सन्मान करतात.

गुड फ्रायडेमागील कथा-

ख्रिश्चन धर्मग्रंथांनुसार, येशू ख्रिस्ताचा त्यांच्याच शिष्यांपैकी एक, जूडसने 30 नाण्यांसाठी विश्वासघात केला. गेथ्समनी बागेत रात्रीच्या वेळी येशूला रोमन सैनिकांनी अटक केली. त्यांच्यावर खोटे आरोप ठेवून त्यांना रोमन गव्हर्नर पॉन्शियस पायलटसमोर (Pontius Pilate) हजर करण्यात आले. पॉन्शियसने येशूंना दोषी ठरवले आणि त्यांना क्रूसावर चढवण्याची शिक्षा सुनावली. येशूंना पाठीवर क्रूस घेऊन कॅल्व्हरी टेकडीवर नेण्यात आले, जिथे त्यांना खिळे ठोकून क्रूसावर लटकवण्यात आले. दुपारी 12 ते 3 या वेळेत येशूंचा मृत्यू झाला. बायबलनुसार त्या वेळी अंधार पसरला होता. येशूंच्या मृत्यूनंतर त्यांचे अनुयायी शोकात बुडाले, पण तिसऱ्या दिवशी ‘ईस्टर संडे’ला ते पुन्हा जिवंत झाले, ज्यामुळे ख्रिश्चन विश्वासाला नवे बळ मिळाले. गुड फ्रायडे हा या बलिदानाची आठवण आहे, आणि तो पवित्र सप्ताहाचा भाग आहे.

असा व्यतीत केला जातो गुड फ्रायडेचा दिवस-

गुड फ्रायडे हा आनंदाचा उत्सव नसून शोक आणि प्रायश्चित्ताचा दिवस आहे. जगभरातील ख्रिश्चन चर्चमध्ये विशेष प्रार्थना आणि सेवा आयोजित केल्या जातात. कॅथोलिक, ऑर्थोडॉक्स, ल्युथरन आणि अँग्लिकन चर्चमध्ये दुपारी 12 ते 3 या वेळेत ‘थ्री आवर्स अॅगनी’, नावाची सेवा होते, जी येशूंच्या क्रूसावरील अंतिम तासांचे स्मरण करते. अनेक ठिकाणी येशूंच्या क्रूसावरील प्रवासाचे नाट्यरूपांतर, ज्याला ‘पॅशन ऑफ ख्राइस्ट’ म्हणतात, सादर केले जाते. काही समुदाय उपवास करतात आणि मांस खाणे टाळतात, कारण हा दिवस त्यागाचा आहे. (हेही वाचा: Amarnath Yatra 2025 Registration: अमरनाथला जाणाऱ्यांसाठी नोंदणी सुरू; काय आहे संपूर्ण प्रक्रिया? जाणून घ्या)

गुड फ्रायडेचा संदेश-

दरम्यान, ख्रिश्चन विश्वासानुसार, गुड फ्रायडे हा येशू ख्रिस्ताच्या क्रूसावरील मृत्यूचा स्मरणदिवस आहे, ज्याने मानवजातीच्या पापांचा बोजा आपल्या खांद्यावर घेतला. बायबल सांगते की, येशूंनी स्वतःला बलिदान देऊन मानवांना पापांपासून मुक्ती मिळवून दिली, आणि त्यांच्यामुळे देवाशी थेट संबंध जोडला गेला. गुड फ्रायडेचे सर्वात मोठे महत्त्व म्हणजे येशूंच्या प्रेमाचा आणि त्यागाचा संदेश. त्यांनी स्वतःच्या प्राणांची आहुती देऊन दाखवले की, खरे प्रेम म्हणजे स्वतःच्या सुखापेक्षा इतरांचा उद्धार महत्त्वाचा आहे. हा संदेश केवळ ख्रिश्चनांसाठीच नाही, तर सर्व मानवजातीला लागू आहे. येशूंच्या या कृतीने क्षमेची शक्ती अधोरेखित केली, त्यांनी क्रूसावरूनही आपल्या शत्रूंना क्षमा केली. हा दिवस आपल्याला शिकवतो की, कठीण परिस्थितीतही करुणा आणि दया ठेवणे शक्य आहे.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)