Delhi MLAs Salaries Hike: दिल्लीत आमदारांचे पगार 66 टक्क्यांनी वाढले; आता 54 हजार वरून मिळणार 90 हजार रुपये, अधिसूचना जारी

Delhi MLAs Salaries Hike: दिल्लीतील आमदारांचे वेतन आणि भत्ते तब्बल 12 वर्षांनंतर वाढवण्यात आले आहेत. आमदारांचा पगार आता 66 टक्क्यांनी वाढून 90 हजार झाला आहे. दिल्ली सरकारच्या कायदा, न्याय आणि विधान व्यवहार विभागाचे प्रधान सचिव भरत पाराशर यांनी 9 मार्च रोजी पगार आणि भत्त्यांबाबत अधिसूचना जारी केली आहे. तसेच, मुख्यमंत्री, सभापती आणि उपसभापती यांचे वेतन आणि भत्ते विधानसभा, चीफ व्हिप आणि विरोधी पक्षनेते यांच्या मानधनात 1.70 टक्के, लाख रुपये प्रति महिना वाढ करण्यात आली आहे. पगार आणि भत्त्यातील वाढ गेल्या 14 फेब्रुवारीपासून लागू मानली जाईल. यापूर्वी 2011 मध्ये दिल्लीच्या आमदारांचे वेतन आणि भत्ते वाढवण्यात आले होते. दिल्लीत एकूण 70 आमदार आहेत.

गेल्या वर्षी 4 जुलै रोजी दिल्ली विधानसभेने मुख्यमंत्री, मंत्री, आमदार, मुख्य व्हिप, विधानसभा अध्यक्ष, उपसभापती यांच्या वेतन आणि भत्त्यांमध्ये वाढ करण्यासंबंधीची पाच वेगवेगळी विधेयके मंजूर केली. राष्ट्रपतींनी 14 फेब्रुवारी रोजी याला मंजुरी दिली होती. (हेही वाचा - Bombay High Court On Act Of God: 'टायर फुटणे हे देवाचे कृत्य नाही'; मुंबई उच्च न्यायालयाने विमा कंपनीला दिले नुकसान भरपाईचे आदेश)

तथापी, दिल्लीच्या विधी, न्याय आणि विधान व्यवहार विभागाच्या अधिसूचनेनुसार, आमदारांचे मासिक वेतन आणि भत्ता 54 हजार रुपयांवरून 90 हजार रुपये झाला आहे. दुसरीकडे मुख्यमंत्री, विधानसभा अध्यक्ष, मंत्री आणि विरोधी पक्षनेते यांचे वेतन आणि भत्ते 72 हजार रुपये प्रति महिना वरून 1.70 लाख रुपये झाले आहेत.

आमदारांचे मूळ वेतन 12 हजारांवरून 30 हजार रुपये करण्यात आले आहे. याशिवाय दैनंदिन भत्ताही 1,000 रुपयांवरून 1,500 रुपये करण्यात आला आहे. मुख्यमंत्री, मंत्री, विधानसभा अध्यक्ष आणि विरोधी पक्षनेते यांचे मूळ वेतन 18,000 रुपयांवरून 60,000 रुपये करण्यात आले आहे.

याशिवाय आमदारांना स्वतंत्रपणे 1 लाख रुपये प्रवास भत्ताही मिळेल. जो सध्या 50,000 रुपये आहे. दिल्ली सरकारचा दावा आहे की, ही वाढ करूनही दिल्लीच्या आमदारांना तेलंगणा आणि हिमाचल प्रदेशसह अनेक राज्यांच्या आमदारांपेक्षा कमी पगार मिळेल.