विदेशातून आणलेले मास्क धुवून विक्री प्रकरणी नारपोली येथे गुन्हा दाखल; 8 मार्च 2020 च्या ताज्या मराठी बातम्या आणि ब्रेकिंग न्यूज LIVE

विदेशातून आणलेले मास्क धुवून विक्री प्रकरणी भिवंडी, नारपोली येथे गुन्हा दाखल. इमरान शेख नावाच्या व्यक्तीवर हा गुन्हा दाखल झाला आहे. उघड्यावर फेकून दिलेले सर्व मास्क एकत्र करून त्यांची जैव वैद्यकीय पद्धतीने विल्हेवाट लावण्यासाठी ते पॉल्युशन बोर्डच्या ताब्यात देण्यात आले आहेत. 

सध्या महाराष्ट्र पोलीस दलात सुमारे सव्वादोन लाख अधिकारी-कर्मचारी आहेत. त्यापैकी 28 हजार म्हणजेच 15 टक्क्याच्या आसपास महिला कर्मचारी आहेत. महिला अधिकारी-कर्मचाऱ्यांचे हे प्रमाण 15 टक्क्यांहून 30 टक्क्यापर्यंत नेण्याच्या दृष्टीने राज्य शासन प्रयत्नशील असल्याची माहिती गृहमंत्र्यांनी दिली. 

कोरोना व्हायरसच्या पार्श्वभूमीवर मुंबई व पुणे आंतरराष्ट्रीय विमानतळावर 904 विमानांमधील 1 लाख 9 हजार 118 प्रवाशांची तपासणी झाली आहे. कोरोना व्हायरस संबंधित माहितीसाठी राज्य नियंत्रण कक्षाचा दूरध्वनी क्रमांक 020- 26127394, टोल फ्री क्रमांक 104 वर संपर्क साधता येणार असल्याची माहिती आरोग्यमंत्री राजेश टोपे यांनी दिली. 

कर्नाटकचे माजी राज्यपाल आणि माजी केंद्रीय कायदा मंत्री हंसराज भारद्वाज यांचे आज निधन झाले.

कोरोना व्हायरसमुळे लेह लद्दाख मधील  शाळा 31 मार्च पर्यंत बंद राहणार असल्याचा निर्णय जिल्हा दंडाधिकाऱ्यांनी दिला आहे.

येस बँकेचे संस्थापक राणा कपूर यांना आज ईडीकडून पहाटेच्या वेळेस अटक करण्यात आली. त्यानंतर परिवाराला ईडीने नोटिस सुद्धा पाठवली. तर आता राणा कपूर यांची मुलगी रोशनी ही मुंबई सोडून लंडन येथे जाण्यासाठी निघाली असता तिला विमानतळावर अडवण्यात आले आहे.

नेदरलॅंड्स येथे कोरोना व्हायरसची 77 नवी प्रकरणे समोर आली आहेत.

हुबळी येथे जागतिक महिलादिनानिमित्त महिला कर्मचाऱ्याने ट्रेन चालवली आहे.

भोपाळ येथे ट्रक आणि स्कूटरमध्ये भीषण अपघात झाला असून चार जणांचा मृत्यू तर दोन जण गंभीर झाले आहेत.

सर्व बँकांच्या कामावर सातत्याने लक्ष असल्याने ठेवीदारांचे पैसे सुरक्षित असल्याचे आरबीआयकडून स्पष्टीकरण देण्यात आले आहे.

तेलंगणमधील एका खासगी शाळेत 11 विद्यार्थिनींवर बलात्कार झाल्याचा धक्कादायक घटना उघडकीस आली आहे. या प्रकरणी एका शिक्षकाला अटक करण्यात आली आहे. हा नराधम शिक्षक विद्यार्थिंनींवर बलात्कार करण्यापूर्वी विद्यार्थिनींना दारू पाजत होता.  

महिलांच्या ट्वेन्टी-20 विश्वचषकाच्या अंतिम फेरीत भारताचा 85 धावांनी पराभव झाला आहे. ऑस्ट्रेलियाने भारतावर दमदार विजय मिळवत पाचव्यांदा विश्वचषकाला गवसणी घातली आहे. 

नाशिकच्या जिल्हा शासकीय रुग्णालयात पुन्हा एक कोरोना संशयित रुग्ण दाखल झाला आहे. हा रुग्ण न्यूझीलंडहून भारतात परतला होता. हा रुग्ण मूळचा नवी मुंबईच्या वाशी उपनगरातील रहिवासी आहे. त्याला सर्दी आणि घसा दुःखीचा त्रास जाणवत असल्याने रुग्णालयात दाखल करण्यात आले आहे. 

अयोध्येतील श्रीराम मंदिराचे 30 एप्रिलरोजी भूमिपूजन करण्यात येणार आहे. यासंदर्भात गोविंदगिरी महाराज यांनी माहिती दिली आहे. 

मिलिंद एकबोटे राज ठाकरे यांच्या भेटीला, छत्रपती संभाजी महाराज यांच्या पुण्यतिथीनिमित्त 24 मार्चला होणाऱ्या कार्यक्रमाचे निमंत्रण देण्यात आले आहे. तर धर्मवीर संभाजी महाराज स्मृती समितीतर्फे हे निमंत्रण मिलिंद एकबोटे यांना दिले आहे.

राष्ट्रवादी काँग्रेस पार्टीचे प्रदेशाध्यक्ष आणि राज्याचे जलसंपदा मंत्री जयंत पाटील आज जागतिक महिला दिनाचे औचित्य साधून दुपारी 2 ते 3 वाजेपर्यंत फेसबुकद्वारे महिलांशी संवाद साधणार आहे. तसेच राज्यातील कर्तृत्ववान महिलांच्या कार्याचा गौरवही करणार आहे.

केरळामध्ये कोरोना व्हायरची लागण झालेले नवे 5 रुग्ण आढळले आहेत. केरळच्या आरोग्यमंत्री के. के. शैलजा यांनी यासंदर्भात माहिती दिली आहे. त्यामुळे भारतातील करोना रग्णांची संख्या 39 वर पोहोचली आहे. 

जागतिक महिला दिनानिमित्त सीएसएमटी-कल्याण लोकल महिला मोटरमन ने चालवली

मुख्यमंत्री उद्धव ठाकरे यांनी महाराष्ट्रातील तमाम माता भगिनींना जागतिक महिला दिनाच्या शुभेच्छा दिल्या आहेत.

महाराष्ट्र नव निर्माण सेनेचा उद्या म्हणजेच सोमवारी वर्धापन दिन आहे. या निमित्ताने मनसे प्रमुख राज ठाकरे कार्यकर्त्यांना संबोधित करणार आहेत. तसेच सोमवारी नवी मुंबईत होणाऱ्या कार्यक्रमात मनसेकडून शॅडो कॅबिनेटची घोषणा होण्याची शक्यताही वर्तवण्यात येत आहे.