Coronavirus: धारावी येथील 35 वर्षीय व्यक्तीस कोरोना व्हायरस लागण झाल्याचे वृत्त; 2 एप्रिल 2020 च्या ताज्या मराठी बातम्या आणि ब्रेकिंग न्यूज LIVE

मुंबई येथील धारावी परिसरातून आणखी एक वृत्त पुढे येत आहे. येथील एका 35 वर्षीय व्यक्तीची कोरोना व्हायरस चाचणी पॉझिटीव्ह आल्याचे समजते. या घटनेनंतर हा व्यक्ती ज्या ठिकाणी राहातो ती  इमारत प्रशासनाकडून क्वारंटाईन करण्यात आली असल्याचे वृत्त प्रसारमाध्यामांनी दिले आहे.

नालासोपारा येथे एका कोरोना बाधित व्यक्तीचा मृत्यू झाला आहे. या व्यक्तिचा मृत्यू कोरोना व्हायरसमुळेच झाल्याची अद्याप पुष्टी नाही. या व्यक्तिस इतरही काही आजार होते. तो कोरोना व्हायरस पॉझिटीव्ह होता

महाराष्ट्रात आणखी एका कोरोना बाधित रुग्णाचा मृत्यू झाला आहे. त्यामुळे राज्यातील कोरना बाधितांच्या मृत्यूत आता आणखी एकाची भर पडली आहे.

एम्स रुग्णालयातील एका डॉक्टरची COVID19 चाचणी पॉझिटीव्ह आली आहे. या डॉक्टरची पत्नी 9 महिन्यांची गर्भवती आहे. तिचीही चाचणी पॉझिटीव्ह आली आहे. त्यामुळे दोघांनाही विलगिकरण कक्षात ठेवण्यात आले आहे. या महिलेची प्रसुती रुग्णालयातच केली जाणार आहे.

केंद्रीय आरोग्य मंत्रालयाने लॉकडाऊनच्या पार्श्वभूमीवर मार्गदर्शक तत्वं जारी करण्यात आली आहे. देशातील नागरिकांना विदेशी नागरिक आणि कोरोना व्हायरस बाधित रुग्णांपासून दूर ठेवण्यासाठी यात काही गोष्टींचा अंतर्भाव करण्यात आला आहे.

नवी दिल्लीत कोविड-19 रुग्णांचा आकडा 293 गेला असल्याची माहिती दिल्ली सरकारने दिली आहे. यात निजामुद्दीन येथील 182 कोरोना बाधित पॉझिटिव्ह रुग्णांचा समावेश आहे.

कांदिवली मधील शताब्दी रुग्णालयातील 40 कर्मचा-यांना क्वारंटाईन ठेवण्यात आले आहे. हे कर्मचारी  कोविड-19 च्या रुग्णाला हाताळत होते अशी माहिती मिळत आहे.

नागपूर मध्ये कोरोना विरुद्ध लढा देण्यासाठी कोरोना वॉर रूमची निर्मिती करण्यात आल्याचे पालिका आयुक्त तुकाराम मुंढे यांनी TV9 मराठीशी बोलताना सांगितले. त्यामुळे लोकांना यात आपला सहभाग दाखवून घराबाहेर जाणे टाळावे असे आवाहन त्यांनी केले आहे. 

मुंबईतील सांताक्रूज पश्चिम परिसरातून 35.84 लाखांचे मास्क घेऊन जाणा-या एकाला अटक करण्यात आली आहे. मुंबई पोलिसांनी ही कारवाई केली असून आरोपीला पोलीस कोठडी सुनावण्यात आली आहे.

महाराष्ट्रात 81 नवीन कोरोना रुग्ण आढळले असून त्यातील 57 रुग्ण हे मुंबईतील असल्याची माहिती राज्य आरोग्य विभागाने दिली आहे. त्यातील 42 जणांना डिस्चार्ज मिळाला आहे.

केरळमध्ये 21 नवे कोरोना बाधित रुग्ण आढळल्याची माहिती केरळचे मुख्यमंत्री पिनराई विजयन यांनी दिली आहे. त्यामुळे सध्या केरळातील कोरोना ग्रस्तांची एकूण संख्या 286 वर गेली असून त्यातील 256 रुग्ण सध्या उपचार घेत आहेत.

COVID-19 च्या पार्श्वभूमीवर राज्यातील 30 सरकारी रुग्णालये ही कोरोना ग्रस्तांसाठी असल्याची घोषणा करण्यात आली आहे. या 30 रुग्णालयात 2305 बेड्सचा समावेश आहे, असे राज्य आरोग्य मंत्रालयाकडून सांगण्यात येत आहे.

पंतप्रधान नरेंद्र मोदी हे एका छोट्याशा व्हिडिओच्या माध्यमातून उद्या सकाळी 9 वाजता देशवासियांना संदेश देणार आहेत. एएनआय या वृत्तसंस्थेने त्याबाबत माहिती दिली आहे.

नवी दिल्ली चे मुख्यमंत्री अरविंद केजरीवाल यांनी नुकत्याच दिलेल्या माहितीनुसार दिल्लीत कोरोना बाधितांची संख्या 219 झाली असून त्यात 108 निजामुद्दीन येथील लोकांचा समावेश आहे. यातील 2 जणांचा मृत्यू झाला असून नवी दिल्लीत मृतांची एकूण संख्या 4 झाली आहे.

भारतामध्ये मागील 24 तासामध्ये 328 नव्या रूग्णांची नोंद झाली आहेत. दरम्यान या काळात 12 कोरोनाबाधितांचा मृत्यू झाला आहे.  

मरकजला गेलेल्यांपैकी 1804 लोकांना क्वारंटाईन करण्यात आलं आहे. त्यांच्यावर देशभरात उपचार सुरू आहेत. 

महाराष्ट्रामधून दिल्ली निजामुद्दीन येथील तबलिगी जमातीच्या मकरज कार्यक्रमामध्ये सुमारे 1400 जणांचा समावेश होता. त्यापैकी 1300 जणांचा शोध घेण्यात यश आलं आहे. त्यांना क्वारंटीन करून स्वॅप टेस्ट घेण्यात आल्या आहेत. अशी माहिती राज्याचे आरोग्यमंत्री राजेश टोपे यांनी दिली आहे.

मुंबईच्या धारावीमध्ये कोरोना व्हायरसचा विळखा नियंत्रणात ठेवण्यासाठी मुंबई पालिका प्रशासनाने भाग सील करण्यास सुरूवात केली. मात्र त्याका विरोध करत काही जणांनी पालिकेच्या कर्मचार्‍यांवर हल्ला केला. संबंधित आरोपींविरोधात तक्रार दाखल करण्यात आली असून एकाला अटक झाली असून अन्य 7-8 जणांचा शोध सुरू आहे.

राज्याचे गृहमंत्री अनिल देशमुख यांनी व्हिडिओ च्या माध्यमातून जनतेला घराबाहेर न पडण्याचा सल्ला दिला आहे. आपण कोरोना विरुद्ध हे मोठं युद्ध सुरु केलं आहे. ही लढाई आपल्याला जिंकायची आहे. त्यासाठी घरात राहून तुम्हाला देशसेवा करण्याची जी संधी मिळाली आहे त्याचे सोनं करा असा संदेश त्यांनी दिला आहे.