माहिती

Indian Railways Recruitment: रेल्वेत पॅरामेडिकल संवर्गात 590 पदांसाठी भरती जाहीर,15 सप्टेंबरपासून ऑनलाइन अर्ज प्रक्रिया सुरू

भारतीय रेल्वे भरती मंडळाने (आरआरबी) पॅरामेडिकल संवर्गातील ५९० रिक्त पदांसाठी भरती जाहीर केली आहे. आरोग्य क्षेत्रातील शिक्षण घेतलेल्या उमेदवारांसाठी ही मोठी संधी असून, अर्ज प्रक्रिया, पात्रता निकष, वयोमर्यादा आणि परीक्षा पद्धतीचा हा सविस्तर आढावा.

By Dipali Nevarekar | Published: Sep 16, 2026 06:19 PM IST

भारतीय रेल्वेमध्ये नोकरी करू इच्छिणाऱ्या उमेदवारांसाठी एक महत्त्वाची संधी समोर आली आहे. रेल्वेच्या विविध विभागांमध्ये पॅरामेडिकल संवर्गातील तब्बल 590 रिक्त पदांसाठी भरती जाहीर करण्यात आली आहे. रेल्वे भरती मंडळामार्फत (RRB) ही भरती प्रक्रिया राबवली जात असून, आरोग्य क्षेत्रातील शिक्षण घेतलेल्या उमेदवारांना यातून नोकरीची संधी मिळणार आहे.

भरती प्रक्रियेचे वेळापत्रक

आरआरबी पॅरामेडिकल भरती २०२६ साठी ऑनलाइन अर्ज प्रक्रिया १५ सप्टेंबर २०२६ पासून सुरू झाली असून, अर्ज करण्याची अंतिम मुदत १४ ऑक्टोबर २०२६ रात्री ११.५९ वाजेपर्यंत आहे. अर्ज शुल्क भरण्यासाठीची अंतिम तारीख १६ ऑक्टोबर २०२६ असून, अर्जात दुरुस्ती करण्यासाठी १७ ते २६ ऑक्टोबर २०२६ हा कालावधी देण्यात आला आहे.

प्रमुख पदे आणि शैक्षणिक पात्रता

या भरतीमध्ये विविध पदांचा समावेश असून, प्रत्येक पदासाठी वेगळी शैक्षणिक पात्रता निश्चित करण्यात आली आहे :

नर्सिंग सुपरिटेंडंट (३६५ पदे) : जनरल नर्सिंग अँड मिडवाइफरी (जीएनएम) किंवा बीएससी नर्सिंग उत्तीर्ण उमेदवार पात्र असतील.

फार्मासिस्ट (११८ पदे) : फार्मसीमधील पदवी (बी.फार्म) किंवा डी.फार्म धारक उमेदवारांना संधी मिळेल.

हेल्थ अँड मलेरिया इन्स्पेक्टर ग्रेड २ (४३ पदे) : बीएससी पदवीसह सॅनिटरी इन्स्पेक्टर डिप्लोमा आवश्यक आहे.

लॅब असिस्टंट ग्रेड २ (३१ पदे) : बारावी (विज्ञान शाखा) आणि संबंधित डिप्लोमा आवश्यक आहे.

रेडियोग्राफर/एक्स-रे तंत्रज्ञ (२५ पदे) : बारावी (विज्ञान शाखा) आणि रेडियोग्राफी डिप्लोमा आवश्यक आहे.

याशिवाय डायलिसिस टेक्निशियन, ईसीजी टेक्निशियन, ऑप्टोमेट्रिस्ट आणि ऑडिओलॉजिस्ट अशा पदांचाही या भरतीत समावेश करण्यात आला आहे.

वयोमर्यादा आणि इतर निकष

आरआरबी भरतीसाठी उमेदवारांचे वय पदानुसार १८ ते ४० वर्षांच्या दरम्यान असणे आवश्यक आहे. वयाची गणना १ जानेवारी २०२७ रोजी केली जाणार आहे. सरकारी नियमानुसार अनुसूचित जाती व अनुसूचित जमाती प्रवर्गातील उमेदवारांना ५ वर्षे, ओबीसी-एनसीएल प्रवर्गातील उमेदवारांना ३ वर्षे, तर दिव्यांग उमेदवारांना १० ते १५ वर्षांपर्यंत वयोमर्यादेत सूट देण्यात आली आहे. याशिवाय प्रत्येक पदासाठी संबंधित वैद्यकीय मानके (बी१, सी१, सी२) उत्तीर्ण होणे बंधनकारक आहे.

निवड प्रक्रिया आणि परीक्षा पद्धती

उमेदवारांची निवड संगणकावर आधारित परीक्षेच्या (सीबीटी) गुणवत्तेवर केली जाणार आहे. ही परीक्षा १०० गुणांची असून त्यात एकूण १०० वस्तुनिष्ठ प्रश्न विचारले जातील. परीक्षेसाठी ९० मिनिटांचा कालावधी देण्यात येईल. यामध्ये ७० प्रश्न संबंधित विषयावर आधारित असतील, तर उर्वरित ३० प्रश्न सामान्य ज्ञान, गणित, बुद्धिमत्ता चाचणी आणि सामान्य विज्ञान या विषयांवर आधारित असतील. चुकीच्या उत्तरासाठी १/३ गुण वजा केले जातील.

परीक्षा शुल्क

सर्वसाधारण प्रवर्गातील उमेदवारांसाठी परीक्षा शुल्क ५०० रुपये निश्चित करण्यात आले असून, सीबीटी परीक्षा दिल्यानंतर त्यापैकी ४०० रुपये संबंधित उमेदवाराच्या बँक खात्यात परत केले जातील. महिला, अनुसूचित जाती, अनुसूचित जमाती, अल्पसंख्याक, आर्थिकदृष्ट्या मागास वर्ग (ईबीसी), दिव्यांग आणि माजी सैनिक उमेदवारांसाठी शुल्क २५० रुपये असून, सीबीटी परीक्षेनंतर हे संपूर्ण शुल्क परत केले जाणार आहे.

अर्ज कसा करावा

इच्छुक आणि पात्र उमेदवारांनी आरआरबीच्या अधिकृत संकेतस्थळावरून https://rrb.indianrailways.gov.in/ या लिंकवर केवळ ऑनलाइन पद्धतीनेच अर्ज सादर करायचा आहे. उमेदवारांनी अर्ज करण्यापूर्वी अधिकृत जाहिरात काळजीपूर्वक वाचून पात्रता निकष तपासून घेण्याचे आवाहन करण्यात आले आहे.

(The above story first appeared on LatestLY on Sep 16, 2026 06:19 PM IST. For more news and updates on politics, world, sports, entertainment and lifestyle, log on to our website latestly.com).