EPFO Enrolment Campaign: कर्मचाऱ्यांना मिळणार पीएफ, पेन्शन आणि विम्याची हमी; ईपीएफओच्या विशेष मोहिमेचा लाभ घेण्याचे आस्थापनांना आवाहन
कर्मचारी भविष्य निर्वाह निधी संघटनेने (EPFO) सर्व पात्र कामगारांना सामाजिक सुरक्षेच्या कक्षेत आणण्यासाठी आस्थापनांना ‘कर्मचारी नोंदणी मोहीम २०२६’ चा लाभ घेण्याचे आवाहन केले आहे.
कर्मचारी भविष्य निर्वाह निधी संघटनेने (EPFO) देशभरातील आस्थापनांना 'कर्मचारी नोंदणी मोहीम २०२६' (EEC 2026) चा लाभ घेण्याचे आवाहन केले आहे. या विशेष मोहिमेचा मुख्य उद्देश ईपीएफच्या कक्षेबाहेर राहिलेल्या पात्र कर्मचाऱ्यांना भविष्य निर्वाह निधी, पेन्शन आणि विम्यासह सर्व वैधानिक सामाजिक सुरक्षा लाभ उपलब्ध करून देणे हा आहे. कामगार आणि रोजगार मंत्रालयाने जाहीर केल्यानुसार, ही मोहीम ३१ ऑक्टोबरपर्यंत सुरू राहणार आहे.
मोहिमेचे स्वरूप आणि उद्दिष्टे
कर्मचारी भविष्यनिर्वाह निधी च्या या मोहिमेच्या माध्यमातून नियोक्त्यांना स्वेच्छेने नियमांचे पालन करण्याची संधी उपलब्ध करून देण्यात आली आहे. ज्या आस्थापनांनी भूतकाळात ठराविक कालावधीदरम्यान आपल्या कर्मचाऱ्यांची ईपीएफ अंतर्गत नोंदणी केली नव्हती, त्यांना आता कोणताही कायदेशीर गुंतागुंत टाळून थेट नोंदणी करता येणार आहे. यामुळे असंघटित किंवा सुरक्षेपासून वंचित राहिलेल्या कर्मचाऱ्यांना औपचारिक सामाजिक सुरक्षा चौकटीत समाविष्ट करणे शक्य होईल.
नोंदणीसाठी पात्रता आणि अटी
कामगार मंत्रालयाने दिलेल्या माहितीनुसार, या मोहिमेअंतर्गत नियोक्ते अशा कर्मचाऱ्यांची नोंदणी करू शकतात, जे निर्धारित कालावधीत ईपीएफ लाभांपासून वंचित राहिले होते. तसेच, घोषणा करण्याच्या तारखेला ते कर्मचारी हयात असणे आणि संबंधित आस्थापनेमध्ये कार्यरत असणे आवश्यक आहे.
नियोक्त्यांसाठी ही प्रक्रिया अधिक सुलभ आणि पारदर्शक करण्यासाठी ऑनलाइन प्रणाली विकसित करण्यात आली आहे. पात्र आस्थापनांना नोंदणी आणि निधी जमा करण्याची (रेमिटन्स) संपूर्ण प्रक्रिया विहित ऑनलाइन यंत्रणेद्वारे पूर्ण करावी लागेल.
या मोहिमेमुळे आस्थापनांना कायदेशीर पूर्तता करणे सोपे होईल, तर दुसरीकडे हजारो कर्मचाऱ्यांना भविष्य निर्वाह निधी, पेन्शन आणि कर्मचारी ठेव संलग्न विमा (EDLI) योजनांचे दीर्घकालीन आर्थिक संरक्षण मिळणार आहे.
(The above story first appeared on LatestLY on Aug 24, 2026 11:46 AM IST. For more news and updates on politics, world, sports, entertainment and lifestyle, log on to our website latestly.com).
