Google Map Mislead: गुगल मॅपच्या भरवशावर बसले अन् पोलिसही अडकले; नागालँडमध्ये स्थानिकांनी रात्रभर पोलिसांना ठेवले ओलीस
गुगल मॅपची आणखी मोठी एक चूक समोर आली आहे. ताज्या घटनेत आसाम पोलिसांचे १६ सदस्यीय पथक गुगल मॅप्सच्या चुकीच्या निर्देशांमुळे नागालँडच्या मोकोकचुंग जिल्ह्यात अडकले. जिथे स्थानिकांनी त्यांच्यावर हल्ला केला. त्यांना ओलीस ठेवले.
Google Map Mislead: गुगल मॅपवर अवलंबून असलेले बरेच लोक अलीकडे चुकीच्या ठिकाणी पोहोचल्याच्या अनके घटना समोर आल्या आहेत. असाच एक धक्कादायक प्रकार समोर असाम पोलिसांसोबत घडला आहे. ज्यामध्ये आसाम पोलिसांचे १६ सदस्यीय पथक गुगल मॅप (Google Map )च्या निर्देशांमुळे नागालँडच्या (Nagaland)मोकोकचुंग जिल्ह्यात पोहोचले. मंगळवारी रात्री आसाम पोलिसांचे पथक एका आरोपीला अटक करण्यासाठी छापा टाकत असताना ही घटना घडली. गुगल मॅपने टीमला चुकीची दिशा दाखवल्याने टीम चुकीच्या ठिकाणी पोहोचली, जिथे स्थानिकांनी त्यांच्यावर हल्ला केला. पोलिसांना रात्रभर ओलीस ठेवले.
पोलीस गणवेशात नसल्यामुळे आणखी गोंधळ झाला
आसाम पोलिसांच्या एका वरिष्ठ अधिकाऱ्याने सांगितले की, जोरहाट जिल्हा पोलिसांचे एक पथक आरोपींना अटक करण्यासाठी चहाच्या बागेत छापा टाकत असताना ही घटना घडली. गुगल मॅपवर हे ठिकाण आसाममध्ये दाखवले होते. पण प्रत्यक्षात ते नागालँडच्या आत होते. या गोंधळामुळे पथक नागालँडच्या आत गेले. "स्थानिक लोकांनी आसाम पोलिसांच्या पथकाला गुन्हेगार समजून त्यांच्यावर हल्ला केला. १६ पैकी फक्त तीन जण गणवेशात होते. उर्वरित सर्वजण साध्या कपड्यात होते, ज्यामुळे आणखी गोंधळ निर्माण झाला," असे अधिकाऱ्याने सांगितले.
स्थानिकांनी रात्रभर पोलिस पथकाला ओलीस ठेवले
अधिकाऱ्याने सांगितले की, स्थानिकांनी आसाम पोलिसांच्या पथकाला ओलिस ठेवले होते. ज्यात एक सदस्य जखमी झाला. जोरथॅट पोलिसांनी मोकोकचुंगच्या पोलिस अधीक्षकांशी संपर्क साधला. पोलिसांनी तात्काळ एक पथक पाठवले जे आसाम पोलिसांना वाचवण्यासाठी घटनास्थळी पोहोचले. जेव्हा स्थानिकांना कळले की हे खरे आसाम पोलिस सदस्य आहेत, तेव्हा त्यांनी जखमी व्यक्तीसह पाच जणांना सोडून दिले. तथापि, उर्वरित ११ पोलीस रात्रभर ओलीस राहिले. दुसऱ्या दिवशी सकाळी त्याला सोडण्यात आले आणि नंतर तो जोरथटला पोहोचला.