MPs Who Never Spoke In Parliament: संसदेत 9 खासदार बोलले नाहीत एकही शब्द; Sunny Deol, Shatrughan Sinha यांचा समावेश, जाणून घ्या यादी

MPs Who Never Spoke In Parliament: सुपरस्टार सनी देओल (Sunny Deol) आणि शत्रुघ्न सिन्हा (Shatrughan Sinha) हे चित्रपटाच्या पडद्यावर त्यांच्या दमदार डायलॉग डिलिव्हरीसाठी प्रसिद्ध आहेत, मात्र ते 17 व्या लोकसभेत (Parliament) एक शब्दही बोलले नाहीत. संसदेचे अर्थसंकल्पीय अधिवेशन संपल्यानंतर 17 व्या लोकसभेचे शेवटचे अधिवेशन संपले. या पाच वर्षांत सर्व खासदारांनी प्रतिनिधी म्हणून आपापल्या भागातील जनतेच्या समस्या आणि आवाज सभागृहात मांडण्याचा प्रयत्न केला. मात्र 543 खासदारांपैकी 9 खासदार असे आहेत, जे संसदेच्या कामकाजात एक शब्दही बोलले नाहीत. सनी देओल, शत्रुघ्न सिन्हासह 9 खासदार सभागृहात मौन बाळगून होते. या खासदारांनी सभागृहात एकदाही आपले मत व्यक्त केले नाही. त्यापैकी 6 खासदार भाजपचे आहेत.

लोकसभा सूत्रांनी दिलेल्या माहितीनुसार, बंगालमधील टीएमसी खासदार दिव्येंदू अधिकारी, कर्नाटकचे भाजप खासदार आणि माजी राज्यमंत्री अनंत कुमार हेगडे, भाजप खासदार व्ही श्रीनिवास प्रसाद, भाजपचे खासदार बीएन बाचे गौडा, पंजाबचे भाजप खासदार सनी देओल, आसामचे भाजप खासदार दानवे बरुआ हे असे खासदार आहेत जे लोकसभेतील पाच वर्षांच्या कार्यकाळात सभागृहात एक शब्दही बोलले नाहीत. हे लोक कोणत्याही भाषणात किंवा चर्चेत सहभागी झाले नाहीत. मात्र या खासदारांनी तोंडी सहभाग दाखवला नसला तरी, त्यांनी लेखी सहभाग नक्कीच दाखवला. या लोकांनी लेखी प्रश्न विचारून आपला सहभाग नोंदवला.

दुसरीकडे, संसदेत तीन खासदार होते ज्यांनी लेखी किंवा तोंडी कोणत्याही स्वरूपात सभागृहात आपला सहभाग नोंदवला नाही. यामध्ये बॉलिवूडमधून राजकारणी झालेले, पश्चिम बंगालमधील टीएमसी खासदार शत्रुघ्न सिन्हा, यूपीचे बसपा खासदार अतुल राय आणि कर्नाटकचे भाजप खासदार आणि माजी राज्यमंत्री रमेश सी जिगजिगानी यांचा समावेश आहे.

उल्लेखनीय आहे की माजी केंद्रीय मंत्री बाबुल सुप्रियो यांनी संसद सदस्यत्वाचा राजीनामा दिल्यानंतर 2022 मध्ये आसनसोल पोटनिवडणुकीत शत्रुघ्न सिन्हा निवडून आले. लोकसभा निवडणूक जिंकल्यानंतर लगेचच राय एका फौजदारी खटल्यात तुरुंगात गेले, जिथे ते चार वर्षे तुरुंगात राहिले. गेल्या वर्षी ऑगस्टमध्येच त्याची सुटका झाली होती. तर जिग्जिगनी हे प्रकृती अस्वास्थ्यामुळे लोकसभेत सक्रिय राहू शकले नसल्याचे सांगण्यात येत आहे. (हेही वाचा: Ashok Chavan on Congress: मनात काँग्रेस भाजपात प्रवेश ; अशोक चव्हाण यांचा पक्षांतर कार्यक्रमाचा व्हिडिओ व्हायरल)

दरम्यान, खासदारांच्या उपस्थितीच्या नोंदीवरून असे दिसून येते की, वरील खासदारांपैकी काहींनी संसदेच्या कामकाजात उपस्थित राहण्याची तसदी घेतली नाही. अतुल राय, सनी देओल आणि दिव्येंदू अधिकारी यांसारख्या खासदारांची उपस्थिती अनुक्रमे 1%, 17% आणि 24% इतकी होती. संसदेच्या एका वरिष्ठ अधिकाऱ्याने दिलेल्या माहितीनुसार, सभागृहाच्या अध्यक्षांनी सनी देओलला दोनदा बोलण्याची संधी दिली, परंतु दोन्ही प्रयत्न निष्फळ ठरले. लोकसभेच्या आकडेवारीनुसार, 17 व्या लोकसभेत 222 विधेयके मंजूर झाली आणि मंत्र्यांनी 1,116 प्रश्नांना तोंडी उत्तरे दिली.