India vs West Indies 2026: विंडीजविरुद्ध रोहित-विराट वनडे संघात, तर टी-20 मध्ये तरुण रक्तावर विश्वास
दरम्यान, वरुण चक्रवर्ती पोटरीच्या दुखापतीमुळे जपान टी-20 आणि आगामी आशियाई क्रीडा स्पर्धेतून बाहेर पडला असून त्याच्या जागी विपराज निगमची निवड करण्यात आली आहे.
भारतीय क्रिकेट नियामक मंडळाच्या (BCCI) वरिष्ठ निवड समितीने वेस्ट इंडिजविरुद्धच्या आगामी मर्यादित षटकांच्या मालिकेसाठी तसेच इराणी चषकासाठी भारतीय संघांची घोषणा केली आहे. मायदेशात होणाऱ्या या मालिकेत तीन एकदिवसीय आणि पाच टी-20 सामने खेळवले जाणार आहेत. निवड समितीने एकदिवसीय संघाचे नेतृत्व शुभमन गिलकडे सोपवले असून, टी-20 संघाच्या कर्णधारपदाची धुरा श्रेयस अय्यरकडे दिली आहे.
वेस्ट इंडिजविरुद्धच्या तीन सामन्यांच्या एकदिवसीय मालिकेसाठी अनुभवी फलंदाज रोहित शर्मा आणि विराट कोहली यांचा संघात समावेश करण्यात आला आहे. शुभमन गिलच्या नेतृत्वाखालील या संघात केएल राहुल उपकर्णधार म्हणून जबाबदारी सांभाळेल. याशिवाय ऋतुराज गायकवाड, यशस्वी जैस्वाल, ध्रुव जुरेल, नितीश कुमार रेड्डी, नमन धीर आणि गोलंदाजीत मोहम्मद सिराज, कुलदीप यादव, प्रसिद्ध कृष्णा, गुरनूर ब्रार आणि आकिब नबी यांना संधी देण्यात आली आहे. एकदिवसीय मालिकेतील सामने अनुक्रमे त्रिवेंद्रम, गुवाहाटी आणि न्यू चंदीगड येथे खेळवले जातील.
🚨 News 🚨
#TeamIndia ODI & T20I squads announced for West Indies tour of India 2026, along with updated squad for Japan T20I & Asian Games.
More Details ▶️https://t.co/Lxx3Bz8Q14 https://t.co/Y9RGlQ09XK
— BCCI (@BCCI) September 16, 2026
पाच सामन्यांच्या टी-20 मालिकेसाठी निवड समितीने तरुण आणि आक्रमक खेळाडूंवर भर दिला आहे. श्रेयस अय्यरच्या नेतृत्वाखालील या संघात टिळक वर्मा उपकर्णधार असणार आहे. फलंदाजीत अभिषेक शर्मा, वैभव सूर्यवंशी, इशान किशन आणि संजू सॅमसन या स्फोटक फलंदाजांचा समावेश आहे. ऑलराउंडर म्हणून शिवम दुबे, अक्षर पटेल, वॉशिंग्टन सुंदर आणि नितीश कुमार रेड्डी यांची निवड झाली आहे. गोलंदाजी विभागात कुलदीप यादव, रवी बिश्नोई, अर्शदीप सिंग, मयांक यादव आणि प्रिन्स यादव विरोधी फलंदाजांची परीक्षा घेतील. टी-20 सामने लखनौ, रांची, इंदूर, हैदराबाद आणि बंगळुरू येथे रंगणार आहेत.
रणजी विजेत्या जम्मू आणि काश्मीर संघाविरुद्ध होणाऱ्या प्रतिष्ठित इराणी चषक सामन्यासाठी 'रेस्ट ऑफ इंडिया' (ROI) संघाचीही घोषणा करण्यात आली आहे. या संघाचे नेतृत्व यष्टीरक्षक-फलंदाज ऋषभ पंतकडे सोपवण्यात आले असून सरफराज खान उपकर्णधारपदाची भूमिका पार पाडेल. संघात सनत सांगवान, शिखर मोहन, सुदीप घारामी, स्मरण रविचंद्रन, मानव सुथार, सारांश जैन, आकाश दीप (फिटनेस मंजुरीच्या अधीन), मुकेश कुमार, मुकेश चौधरी, आर्यन जुयाल, आर्यन पांडे, अनुकुल रॉय आणि आयुष दोसेजा यांचा समावेश आहे.
(The above story first appeared on LatestLY on Sep 16, 2026 09:09 PM IST. For more news and updates on politics, world, sports, entertainment and lifestyle, log on to our website latestly.com).
