Pandharpur Wari 2023: वारी टोलमुक्त! 13 जून ते 3 जुलै दरम्यान पंढरपूरला जाणाऱ्या वाहनांचा टोल माफ, जाणून घ्या कसा घ्याल फायदा

आषाढी एकादशीसाठी विठ्ठलाच्या ओढीने राज्यभरातील अनेक ठिकाणच्या पालख्या पंढरपूरला वाटेवर आहेत. अशात सरकारने वारकऱ्यांच्या सर्व हलक्या व जड वाहनांना टोल माफ केला आहे. उपमुख्यमंत्री देवेंद्र फडणवीस यांनी याबाबत माहिती दिली आहे. त्यांनी सोशल मिडियाच्या माध्यमातून सांगितले की, 13 जून ते 3 जुलै दरम्यान वारी टोलमुक्त असेल. कोणत्याही महामार्गाने पंढरीला येताना टोल आकारला जाणार नाही. यासाठी वाहनांवर ‘आषाढी एकादशी २०२३’ असे स्टिकर असणे गरजेचे आहे. हे स्टिकर स्थानिक पोलीस ठाणे, वाहतूक पोलीस, आरटीओकडून घेता येईल.

दुसरीकडे, शासन स्वच्छ, सुंदर व निर्मल वारीसाठी कटिबद्ध असून यंदाच्या वारीसाठी 21 कोटी रुपयांचा निधी उपलब्ध करुन देण्यात आला आहे, असे प्रतिपादन ग्रामविकास मंत्री गिरीष महाजन यांनी केले. (हेही वाचा: पुणे आकाशवाणी केंद्रातील वृत्त विभाग चालूच राहणार; मुख्यमंत्र्यांच्या हस्तक्षेपानंतर प्रसारभारतीने निर्णय घेतला मागे)