Viral: दिल्लीत पिट बुलचा हल्ला! बॉल खेळणाऱ्या ६ वर्षांच्या निष्पाप मुलावर झडप; घटना CCTV मध्ये कैद
फुटेजमध्ये मुलगा बॉलच्या मागे धावत असतानाच पिट बुलने त्याच्यावर झडप घातल्याचे स्पष्टपणे दिसत आहे. घटनास्थळी उपस्थित असलेल्या लोकांनी धाव घेऊन मुलाला वाचवले आणि त्याला तातडीने रुग्णालयात दाखल केले.
दिल्लीतील प्रेम नगर भागात रविवारी एक अत्यंत दुःखद घटना घडली. घराबाहेर बॉल खेळत असलेल्या एका सहा वर्षांच्या निष्पाप मुलावर शेजारच्या पाळीव पिट बुल (Pit Bull) जातीच्या कुत्र्याने अचानक हल्ला करून त्याला गंभीर जखमी केले. या भीषण हल्ल्यात मुलाच्या डोक्यावर आणि कानावर खोलवर जखमा झाल्या असून, त्याचा कान फाटला आहे. ही संपूर्ण घटना सीसीटीव्ही कॅमेऱ्यात कैद झाली आहे. फुटेजमध्ये मुलगा बॉलच्या मागे धावत असतानाच पिट बुलने त्याच्यावर झडप घातल्याचे स्पष्टपणे दिसत आहे. घटनास्थळी उपस्थित असलेल्या लोकांनी धाव घेऊन मुलाला वाचवले आणि त्याला तातडीने रुग्णालयात दाखल केले. सध्या त्याची प्रकृती चिंताजनक असल्याचे डॉक्टरांनी सांगितले आहे. कुटुंबीयांच्या तक्रारी आणि वैद्यकीय अहवालांच्या आधारे पोलिसांनी त्वरित कारवाई करत कुत्र्याच्या मालकाला अटक केली आहे. स्थानिक रहिवाशांनी आरोप केला आहे की, या कुत्र्याने यापूर्वीही अनेक वेळा परिसरातील लोकांना धमकावले आहे आणि जखमी केले आहे.