CBSE Board Exams Update: सीबीएसई बोर्डाच्या परीक्षेदरम्यान ChatGPT, मोबाईल फोन्स वापरण्यास मनाई, नाहीतर होऊ शकते कारवाई

सीबीएसई बोर्डाच्या (CBSE Board) परीक्षा बुधवार, 15 फेब्रुवारीपासून सुरू होत आहेत. मात्र, मुख्य विषयांच्या परीक्षा 20 फेब्रुवारीपासून सुरू होणार आहेत. आता 2023 च्या सीबीएसई बोर्ड परीक्षेच्या एक दिवस आधी एक अतिशय महत्त्वाचे अपडेट समोर आले आहे. केंद्रीय माध्यमिक शिक्षण मंडळाने चॅटजीपीटीसंदर्भात महत्त्वाची माहिती दिली आहे. या वर्षी तुम्ही सीबीएसई 10वी किंवा 12वीची परीक्षा देणार असाल तर चुकूनही परीक्षेत चॅट जीपीटी वापरण्याचा विचार करू नका.

मंगळवार, 14 फेब्रुवारी रोजी सीबीएसईने सांगितले की 10वी, 12वी बोर्डाच्या परीक्षांमध्ये चॅट जीपीटीचा वापर करण्यास मनाई आहे. परीक्षेच्या हॉलमध्ये चुकूनही विद्यार्थ्यांनी मोबाईल किंवा इतर कोणतेही इलेक्ट्रॉनिक उपकरण घेऊन जाऊ नये. अशा गोष्टींसोबत पकडले गेल्यास कडक कारवाई केली जाईल.