Mumbai Dahi Handi: दहीहंडी उत्सवात मुंबई वाहतूक पोलिसांची 18, 818 ई-चलनांद्वारे कारवाई, 1.92 कोटींचा दंड

मुंबईत शनिवार, 5 सप्टेंबर रोजी साजऱ्या झालेल्या दहीहंडी उत्सवादरम्यान शहरातील गोविंदा पथकांनी विविध ठिकाणी मानवी मनोरे रचून हंड्या फोडल्या. या उत्सवाच्या पार्श्वभूमीवर मुंबई वाहतूक पोलिसांनी वाहतूक नियमभंग करणाऱ्या वाहनचालकांविरोधात व्यापक कारवाई करत तब्बल 18, 818 ई-चलन बजावले. या कारवाईतून एकूण 1.92 कोटी रुपयांचा दंड वसूल करण्यात आला. सीसीटीव्ही फुटेजच्या आधारे ओळख पटलेल्या वाहनचालकांवरही कारवाई करण्यात आली.

कोणत्या उल्लंघनांवर सर्वाधिक कारवाई

धोकादायक व अतिवेगाने वाहन चालवणे, हेल्मेटशिवाय दुचाकी चालवणे, ट्रिपल सीट प्रवास आणि नो-एंट्री नियमांचे उल्लंघन, अशा विविध प्रकारच्या उल्लंघनांसाठी वाहनचालकांवर कारवाई करण्यात आली.

वाहतुकीला अडथळा निर्माण केल्याप्रकरणी सर्वाधिक म्हणजे ३,७२७ चलन बजावण्यात आले. याखेरीज हेल्मेटशिवाय वाहन चालवल्याबद्दल ३,२४९, सिग्नल तोडल्याबद्दल १,४७८, चुकीच्या दिशेने वाहन चालवल्याबद्दल ७३४, नो-एंट्री व वन-वे उल्लंघनाबद्दल ४७६ आणि ट्रिपल सीट प्रवासाबद्दल ३०१ चलन बजावण्यात आले. दारू पिऊन वाहन चालवल्याची २५ प्रकरणेही नोंदवण्यात आली.

वाहतूक सुरळीत ठेवण्यासाठी कडक उपाययोजना

अपघात टाळणे, वाहतूक सुरळीत ठेवणे आणि रस्ता सुरक्षितता सुनिश्चित करणे या उद्देशाने दहीहंडी उत्सवादरम्यान वाहतूक पोलिसांनी कारवाई अधिक तीव्र केली होती. उत्सवादरम्यान शहरातील अनेक भागांत वाहनांची व पादचाऱ्यांची गर्दी मोठ्या प्रमाणात वाढली होती, त्यामुळे ही खबरदारी घेण्यात आली.

एका मुलाचा मृत्यू, ३७६ गोविंदा जखमी

वाहतूक कारवाईबरोबरच दहीहंडी उत्सवादरम्यान शहरात काही दुर्दैवी घटनाही घडल्या. एका अल्पवयीन मुलाचा मृत्यू झाला असून, उत्सवादरम्यान ३७६ गोविंदा जखमी झाल्याची माहिती पालिका अधिकाऱ्यांनी रविवारी दिली.

भगवान श्रीकृष्णाच्या जन्मोत्सवाचा एक भाग असलेली दहीहंडी परंपरा शनिवारी राज्यभरात पारंपरिक उत्साहात साजरी करण्यात आली. या परंपरेत गोविंदा पथके थर रचून उंचावर बांधलेली दहीहंडी फोडतात.

मालाडमध्ये सात वर्षांच्या मुलाचा मृत्यू

मालवणी येथील चिकूवाडीतील एकता वेल्फेअर सोसायटीत काही मुले स्वतंत्रपणे दहीहंडी साजरी करत असताना विटांचा एक खांब कोसळून त्याखाली दबल्याने सात वर्षांच्या मुलाचा मृत्यू झाल्याची माहिती एका अधिकाऱ्याने दिली. नक्की वाचा: Mumbai Dahi Handi 2026: मालाडमध्ये दहीहंडी उत्सवाला गालबोट; भिंतीचा कॉलम कोसळून 7 वर्षीय चिमुकल्याचा मृत्यू . 

बृहन्मुंबई महानगरपालिकेच्या (बीएमसी) अधिकाऱ्यांनी दिलेल्या माहितीनुसार, उत्सवादरम्यान ३७६ गोविंदा जखमी झाले. यामध्ये मुंबई शहर भागात सर्वाधिक १८३ प्रकरणे नोंदवली गेली, तर पश्चिम उपनगरांत १२६ आणि पूर्व उपनगरांत ६२ प्रकरणे नोंदवण्यात आली. जखमींपैकी ५३ जण सध्या रुग्णालयात दाखल असून, ३७ जणांवर अद्याप उपचार सुरू आहेत. उपचारानंतर एकूण २८६ जणांना घरी सोडण्यात आले.

केईएम रुग्णालयात सर्वाधिक जखमींची नोंद

परळ येथील केईएम रुग्णालयात सर्वाधिक ७६ जखमी गोविंदांची नोंद झाली. जोगेश्वरी येथील एचबीटी ट्रॉमा केअर रुग्णालयात ३४, तर घाटकोपरमधील राजावाडी आणि विक्रोळीतील व्ही. देसाई रुग्णालयात प्रत्येकी ३३ जखमींवर उपचार करण्यात आले.

मुंबई सेंट्रल येथील नायर रुग्णालयात ३२ जखमी गोविंदा दाखल झाले. शहरभरात दहीहंडी उत्सवासाठी मोठ्या प्रमाणात गर्दी जमल्याने अनेक भागांत वाहतूक व पादचाऱ्यांची वर्दळ वाढली होती, त्यामुळेच या घटना आणि वाहतूक उल्लंघनांची नोंद झाली.