Bhuleshwar Cha Raja Collapses During Procession: 'भुलेश्वरचा राजा' आगमन मिरवणूक दुर्घटनेत दोघांचा मृत्यू, परिसरातील आजचे आगमन सोहळे रद्द
'भुलेश्वरचा राजा' बाप्पाची मूर्ती कोसळून झालेल्या अपघातात मंडळाचे अध्यक्ष संकेत नेवशे आणि पदाधिकारी बृजेश जोशी यांचा मृत्यू झाला आहे.
मुंबई मध्ये सार्वजनिक गणेशोत्सवाचा मोठा थाट असतो. अनेक सार्वजनिक मंडळांमध्ये गणेश चतुर्थीपूर्वीच बाप्पाचे मोठ्या थाटामाटात आगमन केले जाते. मुंबईतील भुलेश्वर भागातही काल 22 ऑगस्ट, शनिवारी रात्री 'भुलेश्वरचा राजा' गणेशमूर्तीच्या आगमनाचा थाट सुरू होता. मंडळापासून 50-60 मीटर भागात असतानाच मिरवणुकीदरम्यान मोठी दुर्घटना घडली. बालाराम मर्चंट रोड (डॉ. आत्माराम मर्चंट रोड) येथे जय अंबे चौकातील कबुतरखान्याजवळ 'भुलेश्वरचा राजा' (Bhuleshwar Cha Raja) या मंडळाची २२ फुटांहून अधिक उंचीची भव्य गणेशमूर्ती कोसळली. या दुर्घटनेत दोघांचा मृत्यू झाला असून पाच जण जखमी झाले आहेत. जखमींमध्ये पाच आणि सात वर्षांच्या दोन मुलींचाही समावेश आहे.
'भुलेश्वरचा राजा' दुर्घटना कशी घडली
'भुलेश्वरचा राजा' कोसळल्याची घटना शनिवारी रात्री सुमारे साडेनऊ वाजता घडली. लालबागमधील कार्यशाळेतून मूर्ती मंडपाकडे नेली जात असताना मोठ्या संख्येने भाविक तिच्या स्वागतासाठी जमले होते. स्थानिक प्रशासन आणि आपत्कालीन यंत्रणांनी दिलेल्या माहितीनुसार, मूर्ती बसवलेली चौकट अस्थिर झाल्याने ती चौकटीवरून घसरली आणि सभोवतालच्या गर्दीवर कोसळली. मुंबई अग्निशमन दलाच्या प्राथमिक अहवालानुसार, मूर्तीला आधार देणाऱ्या वेल्डिंग चौकटीतील संरचनात्मक त्रुटीमुळे ही दुर्घटना घडली असण्याची शक्यता आहे.
घटनेची माहिती मिळताच बृहन्मुंबई महानगरपालिका (बीएमसी), मुंबई अग्निशमन दल, मुंबई पोलीस आणि १०८ रुग्णवाहिका सेवेच्या पथकांनी तात्काळ घटनास्थळी धाव घेऊन बचावकार्य सुरू केले आणि जखमींना जवळच्या रुग्णालयांमध्ये हलवले.
'भुलेश्वरचा राजा' दुर्घटना मृतांची ओळख
दुर्घटनेत मृत्युमुखी पडलेल्यांची ओळख संकेत नेवशे (वय ३३) आणि बृजेश हेमंत जोशी (वय ३०) अशी झाली आहे. संकेत नेवशे हे गणेश मंडळाचे अध्यक्ष होते. दोघांनाही रुग्णालयात नेण्यापूर्वीच मृत घोषित करण्यात आले. या दुर्घटनेत पाच जण जखमी झाले असून त्यांना उपचारासाठी जवळच्या रुग्णालयांमध्ये दाखल करण्यात आले. जखमींमध्ये पाच आणि सात वर्षांच्या दोन अल्पवयीन मुलींचा समावेश आहे. स्थानिक रुग्णालयातील वैद्यकीय अधिकाऱ्यांनी सांगितले की जखमींवर उपचार सुरू असून त्यांची प्रकृती स्थिर आहे.
डी बी मार्ग पोलीस ठाण्याने अकस्मात मृत्यूची नोंद (एडीआर) दाखल करून घटनेचा तपास सुरू केला आहे. मूर्ती कोसळण्यामागील नेमका घटनाक्रम आणि संरचनात्मक त्रुटी शोधण्यासाठी तपास यंत्रणा कार्यरत आहेत. गणेशोत्सवाच्या पार्श्वभूमीवर शहरात मोठ्या मिरवणुका आणि गर्दी असल्याने मूर्ती वाहतुकीच्या सुरक्षिततेबाबत खबरदारी घेण्याचे आवाहन प्रशासनाकडून करण्यात येत आहे.
आजचे काही आगमन सोहळे रद्द
View this post on Instagram
'भुलेश्वरचा राजा' कोसळल्याच्या दुर्घटनेनंतर परिसरात हळहळ व्यक्त केली जात आहे. आज या भागात चंदनवाडीचा गोड गणपती यांचे आगमन सोहळे रद्द करण्यात आले आहेत. मंडळांनी सोशल मीडीयात पोस्ट करत भाविकांना आगमनाची नवी तारीख लवकरच जाहीर केली जाईल असं सांगितले आहे.
(The above story first appeared on LatestLY on Aug 23, 2026 10:27 AM IST. For more news and updates on politics, world, sports, entertainment and lifestyle, log on to our website latestly.com).
