Maharashtra Monsoon 2019 Live Updates: मध्य रेल्वेची खोळंबलेली वाहतूक सुरु

मध्य रेल्वेची खोळंबलेली वाहतूक सुरु झाली असून कुर्ल्याहून कल्याणच्या दिशेने पहिली लोकल 4.43 मिनिटांनी रवाना झाली.

टिळक नगर व चेंबूर येथील कोणत्याही पूल अथवा रोड ओव्हर ब्रिजचा (स्लॅब) खाली कोसळलेला नाही. हा आरओबीच्या दुभाजकाचा भाग पडलेला आहे. पडलेल्या भागाचे तुकडे आता साफ करण्यात आले असून त्यामुळे झालेला विस्कळीत झालेली वाहतूक आता सुरळीत झाली आहे.

मुंबई, ठाणे, पालघर आणि रायगड भागात मुसळधार पावसाचा इशारा हवामान खात्याने दिला आहे.

सातत्याने कोसळणाऱ्या मुसळधार पावसामुळे आणि समुद्राला आलेल्या भरतीमुळे कुर्ला, सायन, चुनाभट्टी या भागात पाणी शिरले आहे. त्यामुळे हार्बर मार्गावरील सीएसएमटी ते वाशी दरम्यानची लोकलसेवा तात्पुरती बंद ठेवण्यात आली आहे. तसंच मध्य रेल्वेची सीएसएमटी ते ठाणे वाहतूकही ठप्प झाली आहे.

ठाणे येथील घोडबंदर रोडवरील वसंत लीला संकुलातील संरक्षक भिंत कोसळली असून त्यात एका कारचे नुकसान झाले आहे.

खारघर येथील पांडवकडा धबधब्यात चार तरुणी वाहून गेल्या असून एकीचा मृतदेह हाती लागला आहे. तिघींचा शोध अद्याप सुरु आहे. घटनास्थळी पोलिस आणि अग्निशमन दलाचे जवान दाखल झाले असून शोधकार्य सुरु आहे.  या नेरुळ येथील एसआयईएस कॉलेजच्या विद्यार्थीनी आहेत.

पावसामुळे ठाणे येथील रेल्वे ट्रॅक पाण्याखाली गेले असून त्याचे काही फोटोज समोर आले आहेत. (Photos)

पावसाचा जोर काहीसा कमी झाल्याने अंधेरी सबवे मधील पाणी काहीसे ओसरले आहे. त्यामुळे नागरिकांनी कोणत्याही अफवांवर विश्वास ठेवू नये, असे आवाहन BMC ने  केले आहे. तसंच BMC कडून सातत्याने मुंबईच्या पावसाचे अपडेट्स दिले जातील.

मुंबईसह उपनगरांमध्ये सातत्याने सुरु असलेल्या दमदार पर्जन्यवृष्टीमुळे नागरिकांची दैना झाली आहे. रेल्वे ट्रॅक, सखल भागांसह आता बसमध्येही पाणी साचले आहे. पहा कल्याणमधील हा व्हिडिओ.

येत्या 24 तासांत मुंबईत अतिवृष्टीचा इशारा हवामान खात्याने दिला आहे. तसंच काल रात्री पासून होणाऱ्या दमदार पर्जन्यवृष्टीमुळे मुंबईतील शाळांना देखील आज सुट्टी जाहीर करण्यात आली आहे.

मुसळधार पावसामुळे कल्याण रेल्वे ट्रॅकमध्ये पाणी साचले आहे. त्यामुळे नक्कीच कल्याणहून होणाऱ्या रेल्वे वाहतूकीवर त्याचा परिणाम झाला आहे.

सातत्याने होणाऱ्या मुसळधार पावसामध्ये सुद्धा पश्चिम रेल्वे कर्मचाऱ्यांच्या प्रयत्नांमुळे पश्चिम रेल्वेची वाहतूक सुरळीत सुरु असल्याचे माहिती पश्चिम रेल्वेने ट्विट करत दिली आहे.

दमदार पावसामुळे ठाण्यातील घोडबंदर रोड परिसर जलमय झाला आहे.

पालघर, विरार, वसईत पावसाने दमदार हजेरी लावली आहे.

सातत्याने सुरु असलेल्या मुसळधार पावसामुळे गोरेगाव-अंधेरी-मालाड सबवे येथे पाणी साचले आहे.

ट्रान्स हार्बरवरील रेल्वेसेवा सुरळीत सुरु असून मध्य आणि हार्बर रेल्वे धिम्या गतीने सुरु असल्याची माहिती मध्य रेल्वेने ट्विट करत दिली आहे.

मुसळधार पावसामुळे पालघर मधील शाळा-कॉलेज यांना आज सुट्टी जाहीर करण्यात आल्याचे कलेक्टर कैलाश शिंदे यांनी सांगितले आहे.

येत्या 4-6 तासांत मुंबई सह ठाणे, पालघर, नवी मुंबई आणि कोकणात मुसळधार पावसाचा अंदाज हवामान खात्याने वर्तवला आहे.

मुसळधार पावसामुळे ठाणे स्टेशनात पाणी साचलं. तसंच वाहतुकीच्या खोळंब्यामुळे रेल्वे स्थानकात जबरदस्त गर्दी झाली आहे.

येत्या 4 तासांत मुंबईत मुसळधार पावसाची शक्यता असल्याचा अंदाज हवामान खात्याने वर्तवला आहे. त्यामुळे मुंबईकरांनी योग्य ती काळजी घ्यावी आणि सुरक्षित राहावे. तसंच आपत्कालीन परिस्थितीत 100 क्रमांकवर फोन करावा, असे आवाहन मुंबई पोलिसांकडून करण्यात आले आहे.