Arrest | (Representative Image)

गुजरात पोलिसांनी (Gujarat Police) एका महत्त्वपूर्ण कारवाईत वडोदरा येथील शेअर मार्केट कंपनी (Share Market Company) म्हणून मुखवटा धारण केलेल्या एका रॅकेटचा (Share Market Fraud) पर्दाफाश केला आहे. ही बोगस शेअर मार्केट कंपनी लोकांचे पैसे घेऊन कथितरित्या स्टॉक मार्केटमध्ये (Stock Market) गुंतवत असल्याचे सांगून पैसे दुप्पट करण्याचे आमिष दाखवत होती. या प्रकाराची माहिती मिळताच पोलिसांनी तातडीने कारवाई केली. ज्यामध्ये 17 जणांना अटक करण्यात आली आहे. गुजरात पोलिसांनी याबाबत माहिती दिली.

एंजल ब्रोकिंग कस्टमर केअर' कंपनीच्या नावाखाली फसवणूक

पोलीस सूत्रांनी दिलेल्या माहितीनुसार, आरोपींनी 'एंजल ब्रोकिंग कस्टमर केअर' नावाच्या कंपनीच्या नावाखाली एक विस्तृत घोटाळ्याचा कट रचला आणि एका व्हॉट्सॲप ग्रुपद्वारे संशयित पीडितांचे शोषण केले. शेअर मार्केटमध्ये व्यवहार करण्याच्या खोट्या बहाण्याने कार्यरत असलेल्या या टोळीने लाखो रुपयांची फसवणूक केली. वडोदरास्थित कंपनीतील एका वरिष्ठ अधिकाऱ्याला या कंपनीने दुप्पट मोबदल्याचे आमिश दाखवून तब्बल 94.18 लाख रुपयांना चुना लावला. (हेही वाचा, Share Market Fraud Pune: बनावट शेअर ट्रेडिंग रॅकेट प्रकरण, पुणे पोलिसांकडून 5 जणांना अटक; आरोपांचे धागेदोरे हाँकाँगपर्यंत)

आरोपींना दोन दिवसांची पोलीस कोठडी

अटक केलेल्या सर्व संशयितांना गुरुवारी न्यायालयासमोर हजर केले असता, या प्रकरणाचा पुढील तपास करण्यासाठी त्यांना दोन दिवसांची पोलीस कोठडी सुनावण्यात आली. शेअर मार्केट घोटाळा प्रकरणाचा छडा लावण्यासाठी तपास मोहीम अधिक वेगवान केली असून तत्परतेने काम सुरु असल्याचे पोलिसांनी म्हटले आहे. एनडीटीव्हीने दिलेल्या वृत्तानुसार, या कंपनीच्या कारनाम्यांबद्दलची तक्रार वडोदराच्या सायबर क्राइम विभागातील माजी उच्चपदस्थ अधिकारी रामकृष्ण बेदुंदरी यांनी दाखल केली होती.

ऑनलाईन लिंकद्वारे फसवणूक

आरोपीने 'एंजल सिक्युरिटी कस्टमर सर्व्हिस'च्या नावाखाली शेअर मार्केट ट्रेडिंग करण्यास प्रवृत्त करून व्हॉट्सॲप मेसेजद्वारे पीडितांशी संपर्क सुरू केला. कायदेशीर कंपनी एंजेल वन कडील बनावट कागदपत्रांचा वापर करून, त्यांनी दिशाभूल करणारी माहिती आणि ट्रेडिंग प्रक्रियेचे स्पष्टीकरण देणारी लिंक लोकांना दिली. त्यानंतर, फसवणूक करणाऱ्यांनी स्थापन केलेल्या विविध खात्यांमध्ये पीडितेच्या ऑनलाइन खात्यांमधून 94.18 लाखा रुपयांची चिंताजनक रक्कम बेकायदेशीरपणे हस्तांतरित करण्यात आली. फसवणूक झाल्याचे लक्षात येताच, तक्रारदाराने तत्काळ वडोदराच्या सायबर क्राईम पोलिसांना घटनेची माहिती दिली, त्वरीत आणि सखोल तपास करण्यास सांगितले. त्यांच्या अथक परिश्रमांचा परिणाम म्हणून, आर्थिक गैरव्यवहार आणि सायबर गुन्ह्यांविरुद्धच्या लढाईत निर्णायक विजयाचे संकेत देत, फसव्या योजनेत सहभागी असलेल्या 17 व्यक्तींना पकडण्यात पोलिसांना यश आले.

शेअर मार्केट घोटाळा हा देशभरात चिंतेचे कारण ठरला आहे. महाराष्ट्रातही मधल्या काळात शेअर मार्केट गुंतवणुकीद्वारे मोठ्या प्रमाणावर फसवणूक झाल्याच्या घटना पुढे आल्या आहेत. महाराष्ट्र पोलीस त्या प्रकरणांचा तपास अजूनही करत आहेत.