जम्मू-कश्मीर आणि हरियाणामध्ये महाराष्ट्र, झारखंडच्याही आगोदर विधानसभा निवडणूक? केंद्रीय निवडणूक आयोग आज तारीख जाहीर करण्याची शक्यता

भारतीय निवडणूक आयोगाकडून आज दुपारी 3 वाजता एक महत्त्वाची पत्रकार परिषद आयोजित केली जाणार आहे, ज्यामध्ये जम्मू-काश्मीर आणि हरियाणा विधानसभा निवडणुकांच्या तारखा जाहीर केल्या जाणार आहेत. कलम 370 हटवल्यानंतर जम्मू-काश्मीरमध्ये पहिल्यांदाच या निवडणुका होत आहेत. अलीकडेच मुख्य निवडणूक आयुक्त राजीव कुमार यांनी यासंदर्भात जम्मू, काश्मीर आणि हरियाणाच्या अधिकाऱ्यांची बैठकही घेतली होती. (हेही वाचा - Congress Announces Nationwide Protest: कॉंग्रेसकडून 22 ऑगस्ट रोजी देशभरात राष्ट्रीय स्तरावरील आंदोलनाची घोषणा; SEBI प्रमुखांच्या राजीनाम्याची मागणी)

हरियाणा विधानसभा निवडणुकीची तयारी

हरियाणामध्ये विधानसभेच्या एकूण 90 जागा आहेत, त्यापैकी सध्या तीन जागा रिक्त आहेत. भाजपकडे 41 आमदार आहेत, तर काँग्रेसकडे 29, जेजेपीकडे 10 आणि आयएनएलडी आणि एचएलपीकडे प्रत्येकी एक आमदार आहे. याशिवाय पाच अपक्ष आमदारही आहेत. या निवडणुकीत या सर्व पक्षांमध्ये चुरशीची स्पर्धा होऊ शकते, त्यात हरियाणाच्या राजकारणाचे भवितव्य ठरणार आहे.

जम्मू-काश्मीरमध्ये निवडणुका घेण्याची मागणी

2019 मध्ये कलम 370 हटवल्यानंतर जम्मू-काश्मीरला केंद्रशासित प्रदेश बनवण्यात आले. तेव्हापासून तेथील राजकीय पक्षांकडून राज्याचा दर्जा बहाल करण्याची मागणी सातत्याने होत होती. आधी निवडणुका होतील आणि मगच राज्याचा दर्जा बहाल केला जाईल, असे सरकारकडून सांगण्यात आले.

निवडणूक आयोगाच्या सूत्रांनी दिलेल्या माहितीनुसार, जम्मू-काश्मीरमध्ये तीन ते चार टप्प्यात मतदान होऊ शकते. सप्टेंबरमध्ये निवडणूक प्रक्रिया पूर्ण होऊन या महिन्याच्या अखेरीस निवडणुकीचा निकाल जाहीर होऊ शकतो. जम्मू-काश्मीरमधील सुरक्षेची परिस्थिती लक्षात घेता निवडणुका घेणे प्रशासनासमोर मोठे आव्हान असेल. अलीकडच्या काळात अचानक वाढलेल्या दहशतवादी घटनांमुळे प्रशासनाची चिंता वाढली असून त्याचा परिणाम निवडणूक कार्यक्रमावरही होऊ शकतो.