Jantar Mantar Protest: अभिजीत दिपके, सौरव दास आणि आशुतोष रांका यांची 24 तासांनंतर अखेर सुटका!

कॉक्रोच जनता पार्टीचे (CJP) संस्थापक अभिजीत दिपके आणि नेते सौरव दास व आशुतोष रांका यांची रविवारी, ११ ऑक्टोबर रोजी सकाळी सुटका झाली आहे. दिल्ली कँट पोलीस ठाण्यात त्यांना कार्यकारी दंडाधिकाऱ्यांसमोर हजर केल्यानंतर सुटकेचा आदेश देण्यात आला. शनिवारी मुंबईहून आलेले विमान दिल्ली विमानतळावर उतरताच त्यांना पोलिसांनी ताब्यात घेतले होते.

अभिजीत दिपके सह CJP नेत्यांच्या सुटकेची माहिती

अभिजीत दिपके, सौरव दास आणि आशुतोष रांका तिघांना सकाळी सुमारे ९.५७ वाजता कार्यकारी दंडाधिकाऱ्यांसमोर हजर करण्यात आले, असे वृत्तांत म्हटले आहे. त्यानंतर सकाळी १०.२३ च्या सुमारास त्यांचे वकील सौतिक बॅनर्जी यांनी सांगितले की, तिघांची सुटका झाली आहे आणि ते आता जाऊ शकतात.

शनिवारी ताब्यात घेतल्यानंतर पोलिसांनी त्यांना प्रतिबंधात्मक अटकेत ठेवल्याचे वृत्त आहे. कायदा-सुव्यवस्था बिघडू नये, या कारणासाठी अशा स्वरूपाची कारवाई केली जाते. काही वृत्तांनुसार, सुटका काही अटींवर करण्यात आली आहे. या अटी काय आहेत, हे अद्याप स्पष्ट झालेले नाही.

यापूर्वी काय घडले

सीजेपीचे अभिजीत दिपके, सौरव दास आणि आशुतोष रांका  हे तिघे नेते जंतरमंतर येथील नियोजित आंदोलनात सहभागी होण्यासाठी काल (10 ऑक्टोबर) मुंबईहून आले होते. मुख्य निवडणूक आयुक्त ज्ञानेश कुमार यांनी राजीनामा द्यावा, अशी या आंदोलनाची मागणी आहे. मतदार यादीच्या विशेष सघन पुनरीक्षणातील (एसआयआर) कथित अनियमिततेवर संघटनेचा आक्षेप आहे. दिल्ली पोलिसांनी आंदोलनाला परवानगी नाकारली होती आणि शहरात कडक बंदोबस्त ठेवला होता.

यूट्यूबर ध्रुव राठी यांनाही शनिवारी गुरुग्राममधील निवासस्थानी ताब्यात घेण्यात आले होते. वृत्तांनुसार, त्यांची रविवारी पहाटे सुमारे ३ वाजता सुटका झाली.

पुढे काय

सुटकेनंतर तिन्ही नेते आंदोलनात सहभागी होणार का आणि जंतरमंतर येथील पुढील कार्यक्रम काय असेल, याबाबत त्यांची अधिकृत भूमिका अद्याप आलेली नाही. शनिवारी आंदोलनाची जबाबदारी संघटन प्रभारी अजिंक्य शिंदे यांच्याकडे देण्यात आली होती. अजिंक्य शिंदे यांनी आंदोलन थांबणार नसून लोकांनी जंतरमंतर वर येण्याचे आवाहन केले आहे.

अभिजीत दिपके यांच्या आजी सावित्रीबाई दिपके यांचे शनिवारी हिंगोलीतील संतुक पिंपरी येथे निधन झाले होते. दिपके अंत्यसंस्कारासाठी गावी जाणार का, याबाबत माहिती उपलब्ध नाही.