8th Pay Commission: लेव्हल 8 कर्मचाऱ्यांना 10 वर्षांत मिळू शकतात 28.89 लाख रुपये जास्त, वार्षिक वेतनवाढ 3 वरून 7% झाल्यास काय होईल फरक?

केंद्रीय कर्मचाऱ्यांसाठी लागू होणाऱ्या आठव्या वेतन आयोगात (8th Pay Commission) वार्षिक वेतनवाढीचा दर किती असावा, याबाबत सध्या चर्चा सुरू आहे. एका गणनेनुसार, हा दर सध्याच्या 3 टक्क्यांवरून 7 टक्क्यांपर्यंत वाढवल्यास लेव्हल 8 श्रेणीतील कर्मचाऱ्याला येत्या 10 वर्षांत तब्बल 28 लाख 89 हजार रुपये अतिरिक्त मिळू शकतात. यामुळे वेतनवाढीचा दर हा आयोगासमोरील एक महत्त्वाचा मुद्दा बनला आहे.

आयोगाचा पुढील दौरा आणि सल्लामसलत

आठवा केंद्रीय वेतन आयोग 7 आणि 8 सप्टेंबर रोजी चेन्नईचा दौरा करणार आहे. जयपूर येथे झालेल्या दोन दिवसीय भागधारकांच्या बैठकीनंतर हा दौरा होत आहे. चेन्नईच्या भेटीदरम्यान कर्मचारी आणि निवृत्तिवेतनधारक संघटनांचे प्रतिनिधी तसेच इतर भागधारक आयोगाच्या अधिकाऱ्यांची भेट घेऊन विविध मुद्द्यांवर आपल्या मागण्या मांडणार आहेत. यामध्ये वार्षिक वेतनवाढीचा दर हा पुन्हा एकदा चर्चेचा विषय ठरण्याची शक्यता आहे.

कर्मचारी संघटनांची मागणी काय

यापूर्वीच्या सल्लामसलत बैठकीत प्रमुख कर्मचारी संघटनांनी वार्षिक वेतनवाढीचा दर वाढवण्याची मागणी जोरकसपणे मांडली होती. सध्याचा 3 टक्के दर वाढत्या खर्चाशी सुसंगत नसल्याचा दावा या संघटनांनी केला आहे. या संघटनांनी 5 ते 7 टक्क्यांपर्यंत दर वाढवण्याची शिफारस केली आहे. अशा प्रस्तावांना मान्यता मिळाल्यास केंद्रीय कर्मचाऱ्यांच्या वेतनवाढीच्या गतीवर थेट परिणाम होणार आहे.

लेव्हल ८ कर्मचाऱ्याचे उदाहरण

ही संकल्पना स्पष्ट करण्यासाठी सध्याचा मूळ पगार 47,600 रुपये असलेल्या लेव्हल 8 श्रेणीतील कर्मचाऱ्याचे उदाहरण घेण्यात आले आहे. या गणनेसाठी आठव्या वेतन आयोगाकडून 2.15 हा फिटमेंट फॅक्टर स्वीकारला जाईल, असे गृहीत धरण्यात आले आहे. या सुधारित मूळ पगाराच्या आधारे 10 वर्षांच्या कालावधीत 3, 5 आणि 7 टक्के अशा वेगवेगळ्या वार्षिक वेतनवाढीच्या दरांनुसार तुलना करण्यात आली.

किती फरक पडतो

गणनेनुसार, 3 टक्के वार्षिक वेतनवाढीच्या दराने 10 वर्षांतील एकूण वेतन 1 कोटी 40 लाख 78 हजार 561 रुपये इतके होते. हाच दर 7 टक्के झाल्यास हा आकडा 1 कोटी 69 लाख 67 हजार 703  रुपयांपर्यंत पोहोचतो. म्हणजेच 7 टक्के दराच्या पर्यायात कर्मचाऱ्याला 10 वर्षांत तब्बल 28 लाख 89 हजार 143 रुपये अधिक मिळू शकतात.

अंदाजित आकडेवारी, अंतिम निर्णय बाकी

ही आकडेवारी केवळ अंदाजित असून वेतनवाढीचा दर आणि वेतन सुधारणेचा प्रत्यक्ष आकडा हा आठव्या वेतन आयोगाचा अहवाल शासनाकडून अधिसूचित झाल्यानंतरच स्पष्ट होणार आहे. सध्या फिटमेंट फॅक्टर देखील अंतिम झालेला नसून, तज्ज्ञांच्या अंदाजानुसार तो साधारण 1.92 ते 2.86 या पट्ट्यात राहण्याची शक्यता वर्तवली जात आहे.

आठव्या वेतन आयोगाचा अहवाल जानेवारी 2026 पासून लागू होण्याची शक्यता वर्तवली जात आहे. या आयोगाचा थेट फायदा सुमारे 48.62 लाख केंद्रीय कर्मचारी आणि 67.85 लाख निवृत्तिवेतनधारकांना होण्याची शक्यता आहे. वेतनवाढीचा दर, फिटमेंट फॅक्टर आणि इतर तरतुदींबाबत अंतिम निर्णय आयोगाच्या अहवालानंतरच स्पष्ट होईल, अशी माहिती संबंधित सूत्रांनी दिली आहे.