कर्मचारी भविष्य निर्वाह निधी संघटनेची मोठी सुविधा! पोर्टल वर नाही तर UMANG अ‍ॅपवरच होणार 'ही' कामं

कर्मचारी भविष्य निर्वाह निधी संघटनेने (EPFO) UAN शी संबंधित अनेक महत्त्वाच्या सुविधा UMANG अ‍ॅपवर उपलब्ध करून दिल्या आहेत. यामुळे कर्मचाऱ्यांना आता मोबाइलवरूनच UAN जनरेट आणि अ‍ॅक्टिव्हेट करता येणार आहे. याशिवाय PF बॅलन्स तपासणे आणि पासबुक डाउनलोड करणेही शक्य झाले आहे. आधार आधारित फेस ऑथेंटिकेशन तंत्रज्ञानामुळे ही संपूर्ण प्रक्रिया अधिक सुलभ आणि जलद झाली आहे. नक्की वाचा: कर्मचारी भविष्य निर्वाह निधी खाते लॉक झाले आहे का? जाणून घ्या कारणे, खाते अनलॉक करण्याची सोपी पद्धत. 

UMANG अ‍ॅपवर मिळणार या सुविधा

EPFO सदस्यांसाठी UMANG अ‍ॅपवर अनेक महत्त्वाच्या सेवा एकाच ठिकाणी उपलब्ध करण्यात आल्या आहेत. यामध्ये UAN जनरेट करणे, UAN अ‍ॅक्टिव्हेट करणे, आधारच्या मदतीने फेस ऑथेंटिकेशन, PF बॅलन्स पाहणे आणि पासबुक डाउनलोड करणे या सेवांचा समावेश आहे. यापूर्वी या सर्व कामांसाठी कर्मचाऱ्यांना EPFO च्या पोर्टलवर अवलंबून राहावे लागत असे. मात्र आता अनेक कामे थेट मोबाइलवरून पूर्ण करता येणार आहेत.

UAN अ‍ॅक्टिव्हेशनसाठी फेस ऑथेंटिकेशनचा वापर

नवीन UAN जनरेट करण्यासाठी आणि तो अ‍ॅक्टिव्हेट करण्यासाठी आधार आधारित फेस ऑथेंटिकेशन तंत्रज्ञानाचा वापर केला जात आहे. EPFO च्या सध्याच्या पोर्टलवरही ही माहिती देण्यात आली आहे की, UAN जनरेशन आणि अ‍ॅक्टिव्हेशनची सुविधा आता UMANG अ‍ॅपच्या माध्यमातून उपलब्ध आहे.

या प्रक्रियेत कर्मचाऱ्याची ओळख आधारशी जोडलेली माहिती आणि चेहऱ्याच्या जुळणीद्वारे पडताळली जाते. यामुळे चुकीच्या माहितीमुळे UAN तयार होण्याची समस्या कमी होण्यास मदत होऊ शकते.

मोबाइलवरून असा तपासा PF बॅलन्स

ज्या कर्मचाऱ्यांचा UAN आधीच अ‍ॅक्टिव्ह आहे, ते UMANG अॅपमधील EPFO विभागात जाऊन PF शी संबंधित माहिती पाहू शकतात. सदस्यांना त्यांच्या EPF खात्याचा बॅलन्स आणि व्यवहारांची माहिती देखील पाहता येते. EPFO च्या वेबसाइटवरही रिअल टाइम EPF खाते बॅलन्स आणि व्यवहारांचा इतिहास पाहण्याची सुविधा उपलब्ध आहे. नक्की वाचा: कर्मचारी भविष्य निर्वाह निधी संघटनेच्या ATM Withdrawal Facility ची प्रतिक्षा कायम; पहा काय होणार फायदा .

पासबुक डाउनलोड करण्याची सुविधा

UMANG अ‍ॅपच्या माध्यमातून सदस्य त्यांची EPF पासबुक पाहू आणि डाउनलोड करू शकतात. पासबुकमध्ये कर्मचारी आणि नियोक्ता यांनी दिलेल्या योगदानाची तसेच खात्यात नोंदलेल्या व्यवहारांची माहिती मिळते. यामुळे दर महिन्याला आपल्या PF खात्यात किती रक्कम जमा झाली, हे कर्मचाऱ्याला सहज तपासता येते.

नोकरी बदलणाऱ्यांसाठीही उपयुक्त

UAN हा एक युनिव्हर्सल नंबर आहे, जो कर्मचाऱ्याच्या वेगवेगळ्या नोकऱ्यांदरम्यान PF खाती जोडण्यास मदत करतो. त्यामुळे UAN अॅक्टिव्ह ठेवणे आणि त्याची माहिती अचूक ठेवणे आवश्यक आहे. UMANG अ‍ॅपवर या सुविधा उपलब्ध झाल्याने कर्मचाऱ्यांना EPFO शी संबंधित विविध कामांसाठी वेगवेगळ्या ठिकाणी जाण्याची गरज कमी होणार आहे.