Rohit Sharma: रोहित शर्मा मुंबई विरुद्ध मेघालय रणजी ट्रॉफी 2024-25 सामन्यात खेळेल? जाणून घ्या संपूर्ण माहिती?

Rohit Sharma Play in Mumbai vs Meghalaya Ranji Trophy 2024-25?: भारताच्या राष्ट्रीय क्रिकेट संघाचा कसोटी आणि एकदिवसीय कर्णधार रोहित शर्माने त्याचे बहुप्रतिक्षित रेड-बॉल देशांतर्गत पुनरागमन केले. शरद पवार क्रिकेट अकादमी बीकेसी येथे जम्मू आणि काश्मीरविरुद्धच्या रणजी ट्रॉफी 2024-25 (Ranji Trophy 2024-25) सामन्यासाठी रोहित शर्माची (Rohit Sharma) मुंबईच्या संघात निवड करण्यात आली. ऑस्ट्रेलियामध्ये झालेल्या बॉर्डर-गावस्कर ट्रॉफी 2024-25 मध्ये टीम इंडियाला 1-3 असा अपमानजनक पराभव पत्करावा लागला. त्यानंतर भारताच्या स्थानिक प्रथम श्रेणी स्पर्धेत खेळण्याचा निर्णय रोहितने घेतला. यापूर्वी, भारतीय क्रिकेट नियामक मंडळाने (बीसीसीआय) राष्ट्रीय क्रिकेट संघ निवडीसाठी पात्र ठरण्यासाठी खेळाडूंना देशांतर्गत क्रिकेटमध्ये खेळणे अनिवार्य केले होते.

रोहित शर्माचा खराब परकॉर्म

मुंबई आणि जम्मू-काश्मीर यांच्यातील रणजी ट्रॉफी 2024-25 सामन्यात रोहित शर्माचे पुनरागमन खराब झाले. पहिल्या डावात तो तीन धावांवर बाद झाला. दुसऱ्या डावात रोहित शर्माने 35 चेंडूत 28 धावा केल्या. ज्यात दोन चौकार आणि तीन षटकारांचा समावेश होता. जम्मू आणि काश्मीरचा गोलंदाज युद्धवीर सिंगने या अनुभवी फलंदाजाला बाद केले. मुंबईला रणजी ट्रॉफी 2024-25 एलिट ग्रुप अ सामन्यात जम्मू आणि काश्मीरविरुद्ध पाच विकेट्सने पराभव पत्करावा लागला.

गतविजेता मुंबई संघ रणजी ट्रॉफी 2024-25 चा त्यांचा शेवटचा गट-टप्पा सामना मेघालय विरुद्ध खेळणार आहे. मुंबई विरुद्ध मेघालय सामना गुरुवारी 30 जानेवारी रोजी सुरू होईल. जम्मू आणि काश्मीर विरुद्धच्या पराभवामुळे मुंबईच्या क्वार्टर फायनलमध्ये पोहोचण्याच्या आशांना मोठा धक्का बसला आहे. अजिंक्य रहाणेच्या नेतृत्वाखालील संघाला आता मेघालयावर मोठ्या फरकाने मात करावी लागेल आणि उपांत्यपूर्व फेरीच्या आशा जिवंत ठेवण्यासाठी इतर सामन्यांमध्ये अनुकूल निकालांची अपेक्षा करावी लागेल.

रोहित शर्मा मुंबई विरुद्ध मेघालय रणजी ट्रॉफी 2024-25 सामन्यात खेळेल का?

भारताचा कसोटी आणि एकदिवसीय कर्णधार रोहित शर्मा मुंबई आणि मेघालय यांच्यातील आगामी रणजी ट्रॉफी 2024-25 सामन्याला मुकण्याची शक्यता आहे. मुंबई क्रिकेट असोसिएशनने रोहित, यशस्वी जयस्वाल आणि श्रेयस अय्यर या तीन खेळाडूंच्या अनुपलब्धतेची पुष्टी केली आहे. तिन्ही भारतीय क्रिकेटपटू 6 फेब्रुवारीपासून इंग्लंडच्या राष्ट्रीय क्रिकेट संघाविरुद्ध सुरू होणाऱ्या तीन सामन्यांच्या एकदिवसीय मालिकेसाठी राष्ट्रीय संघात सामील होतील.