Bhuvneshwar Kumar Record: भुवनेश्वर कुमारची आयपीएलमध्ये चमकदार कामगिरी; 300 टी-20 सामने खेळणारा पहिला भारतीय वेगवान गोलंदाज ठरला
भुवनेश्वर कुमार राजस्थान रॉयल्स विरुद्धच्या सामन्यात आरसीबीकडून खेळायला आला तेव्हा त्याने एक असा विक्रम आपल्या नावावर केला जो त्याच्या आधी कोणत्याही भारतीय वेगवान गोलंदाजाच्या नावावर नव्हता.
Bhuvneshwar Kumar Record: आयपीएल 2025 (IPL)चा 28 वा सामना राजस्थान रॉयल्स आणि रॉयल चॅलेंजर्स बंगळुरू यांच्यात जयपूरमधील सवाई मानसिंग स्टेडियमवर खेळला गेला. या सामन्यात राजस्थान संघाने प्रथम फलंदाजी करताना 20 षटकांत 4 गडी गमावून 173 धावा केल्या. या सामन्यात आरसीबीकडून खेळणारा वेगवान गोलंदाज भुवनेश्वर कुमार (Bhuvneshwar Kumar) जेव्हा मैदानावर गोलंदाजी करण्यासाठी आला तेव्हा त्याच्या नावावर एक अनोखा विक्रम नोंदवला गेला.
सध्या भारतासाठी सर्वाधिक टी-20 सामने खेळण्याचा विक्रम रोहित शर्माच्या नावावर आहे. त्याने एकूण 452 टी-20 सामने खेळले आहेत. भुवनेश्वर कुमार हा 300 टी-20 सामने खेळणारा पहिला भारतीय वेगवान गोलंदाज ठरला आहे. भुवनेश्वरनंतर, या यादीत दुसरे नाव वेगवान गोलंदाज आणि अष्टपैलू हार्दिक पंड्याचे आहे. त्याने आतापर्यंत 291 टी-20 सामने खेळले आहेत. भुवनेश्वर कुमारने 300 टी-20 सामन्यांमध्ये 24.92 च्या सरासरीने 316 विकेट्स घेतल्या आहेत, ज्यामध्ये पाच वेळा पाच विकेट्स घेण्याचा समावेश आहे. भुवनेश्वर कुमारची टी-20 मधील सर्वोत्तम कामगिरी म्हणजे 4 धावांत 5 बळी.
भुवनेश्वर कुमार आयपीएल 2025च्या हंगामात रॉयल चॅलेंजर्स बंगळुरू संघाकडून खेळत आहे. त्याला या हंगामात आतापर्यंत 5 सामने खेळण्याची संधी मिळाली आहे. यामध्ये त्याने 24.83 च्या सरासरीने एकूण 6 विकेट्स घेतल्या आहेत. चालू हंगामात भुवनेश्वरचा इकॉनॉमी रेट 7.84 आहे.