Muzaffarnagar: बोर्डाच्या परीक्षेच्या उत्तरपत्रिकेच्या वादातून हेड कॉन्स्टेबलने शिक्षकाची गोळ्या झाडून केली हत्या

Muzaffarnagar: उत्तर प्रदेशातील मुझफ्फरनगर जिल्ह्यात एक धक्कादायक घटना समोर आली आहे. वाराणसीहून बोर्डाच्या परीक्षेची उत्तरपत्रिका घेऊन मुझफ्फरनगरच्या एसडी इंटर कॉलेजमध्ये आलेल्या शिक्षकांची वादानंतर यूपी पोलिसांच्या हेड कॉन्स्टेबलने गोळ्या झाडून हत्या केली. शहराचे पोलिस अधीक्षक सत्यनारायण प्रजापत यांनी सोमवारी सांगितले की, वाराणसीच्या शिक्षण विभागाच्या पथकाने बोर्डाच्या परीक्षेच्या उत्तरपत्रिका पोलिस संरक्षणात मुझफ्फरनगरच्या सिव्हिल लाइन्स पोलिस स्टेशन परिसरात असलेल्या एसडी इंटर कॉलेजमध्ये आणल्या होत्या.

शिक्षण विभागाच्या टीममध्ये शिक्षक धर्मेंद्र कुमार, संतोष कुमार आणि दोन चतुर्थश्रेणी कर्मचाऱ्यांचा समावेश होता. कॉलेजचे गेट बंद असल्याने टीमचे सर्व सदस्य वाहनात बसले होते. त्यांनी सांगितले की, रविवारी रात्री कॉलेजच्या बाहेर गाडीत झोपलेले असताना शिक्षक धर्मेंद्र आणि हेड कॉन्स्टेबल चंद्र प्रकाश यांच्यात काही कारणावरून वाद झाला. 

दरम्यान, चंद्रप्रकाश यांनी आपल्या सरकारी रायफलने शिक्षक धर्मेंद्र यांच्यावर गोळ्या झाडल्या. एएसपी म्हणाले की, गंभीर जखमी शिक्षक धर्मेंद्र कुमार यांना रुग्णालयात नेण्यात आले, तेथे डॉक्टरांनी त्यांना मृत घोषित केले. मृतदेह पोस्टमॉर्टमसाठी पाठवण्यात आला आहे.

ते म्हणाले की, पोलिसांनी आरोपी हेड कॉन्स्टेबलविरुद्ध आयपीसीच्या संबंधित कलमांतर्गत गुन्हा दाखल केला असून त्याला अटक करण्यात आली आहे. पोलीस या प्रकरणाचा तपास करत आहेत.