Pune Metro Line 3: पुणे मेट्रो लाईन 3 ची प्रतीक्षा संपणार! गणेशोत्सवापूर्वी उद्घाटनाची तयारी?

Pune Metro 3 Start Date: ​पुण्यातील वाहतूक कोंडीच्या विळख्यात अडकणाऱ्या नोकरदारांसाठी आणि विशेषतः हिंजवडीतील आयटी कर्मचाऱ्यांसाठी एक अत्यंत दिलासादायक बातमी समोर येत आहे. बहुप्रतिक्षित 'पुणे मेट्रो लाईन ३' (हिंजवडी ते शिवाजीनगर) मधील पहिला टप्पा लवकरच प्रवाशांच्या सेवेत दाखल होण्याची शक्यता आहे. पुणे महानगर प्रदेश विकास प्राधिकरण (PMRDA) १५ सप्टेंबरपूर्वी या मार्गावरील पहिला १३ किलोमीटरचा टप्पा सुरू करण्याचे नियोजन करत असल्याची माहिती समोर येत आहे.

​१२ स्टेशन्स आणि १३ किलोमीटरचा टप्पा

नियोजनानुसार, पहिल्या टप्प्यात सुमारे १३ किलोमीटर अंतरावर मेट्रो सेवा सुरू केली जाणार असून यामध्ये १२ प्रमुख स्टेशन्सचा समावेश असेल. हा टप्पा सुरू झाल्यास हिंजवडी आयटी पार्क आणि लगतच्या परिसरातील दैनंदिन प्रवाशांचा प्रवास गतिमान आणि सुकर होणार आहे. सध्या या मार्गावर तासन्‌तास होणाऱ्या वाहतूक कोंडीमुळे चाकरमानी आणि विद्यार्थी त्रस्त आहेत, त्यामुळे हा मार्ग सुरू झाल्यास त्यांना मोठा दिलासा मिळेल.

​उद्घाटनाच्या तारखेची प्रतीक्षा

हा टप्पा कार्यान्वित करण्यासाठी तांत्रिक चाचण्या आणि उर्वरित कामे वेगाने पूर्ण केली जात असली, तरी या मार्गाच्या अधिकृत उद्घाटनाची तारीख अद्याप निश्चित झालेली नाही. या प्रकल्पाचे उद्घाटन पंतप्रधानांच्या हस्ते करण्याचे नियोजन केले जात असून, अधिकृत तारखेची घोषणा लवकरच होण्याची शक्यता आहे.

​हा मार्ग पूर्ण क्षमतेने सुरू झाल्यानंतर शहरातील सार्वजनिक वाहतूक व्यवस्थेला मोठी गती मिळेल आणि रस्त्यांवरील खासगी वाहनांचा ताण लक्षणीयरीत्या कमी होईल अशी अपेक्षा व्यक्त केली जात आहे.