Sania Mirza Announces Retirement: सानिया मिर्झाने केली टेनिसमधून निवृत्तीची घोषणा; Australian Open असणार शेवटची स्पर्धा (See Post)
सहा ग्रँड स्लॅम जिंकण्याआधी आणि दुहेरीत जागतिक क्रमवारीत अव्वल क्रमांकाची खेळाडू होण्याआधी, सानिया मिर्झाची एकेरी कारकीर्दही उल्लेखनीय होती, ती जागतिक क्रमवारीत 27 व्या क्रमांकावर होती.
भारताची स्टार महिला टेनिसपटू सानिया मिर्झाने (Sania Mirza) निवृत्तीची (Retirement) घोषणा केली आहे. ऑस्ट्रेलियन ओपन खेळण्यासाठी पोहोचलेल्या सानियाने सांगितले की, या वर्षी ऑस्ट्रेलियन ओपन आणि फेब्रुवारीमध्ये दुबई ओपननंतर ती टेनिसला अलविदा करणार आहे. म्हणजेच या दोन स्पर्धा सानियाच्या शेवटच्या स्पर्धा असतील. सानिया यापूर्वीच WTA Tennis.com शी तिच्या निवृत्तीबद्दल बोलली होती, आता सानियानेही ट्विटरवर याची औपचारिक घोषणा केली आहे.
सानिया मिर्झाने सांगितले होते की, दुखापतीमुळे 2022 साठी तिची निवृत्ती योजना लांबली आहे. दुखापतीमुळे यूएस ओपनला मुकल्याने सानियाने त्यावेळी निवृत्ती न घेण्याची घोषणा केली होती. आता यंदा ती निवृती घेणार आहे.
सानियाने नोटमध्ये लिहिले- ’30 वर्षांपूर्वी हैदराबादमधील सहा वर्षांची मुलगी तिच्या आईसोबत पहिल्यांदा निजाम क्लबच्या टेनिस कोर्टवर गेली आणि तिला टेनिस खेळायला शिकू देण्यासाठी प्रशिक्षकाशी भांडली. कोचला वाटत होते की ती खूप लहान आहे. अशाप्रकारे स्वप्नांसाठीची लढाई वयाच्या 6 व्या वर्षी सुरू झाली. माझे आई-वडील आणि बहीण, माझे कुटुंब, माझे प्रशिक्षक, फिजिओसह माझी संपूर्ण टीम, जे चांगल्या-वाईट काळात माझ्या पाठीशी उभे होते. यांच्या पाठिंब्याशिवाय हे शक्य झाले नसते.
Life update :) pic.twitter.com/bZhM89GXga
— Sania Mirza (@MirzaSania) January 13, 2023
ती म्हणते, ‘मी माझे हसणे, अश्रू, वेदना आणि आनंद त्यांच्या प्रत्येकासोबत शेअर केला आहे. त्याबद्दल मी सर्वांचे आभार मानू इच्छितो. माझ्या आयुष्यातील सर्वात कठीण काळात तुम्ही सर्वांनी मला मदत केली आहे. हैद्राबादच्या या चिमुरडीला तुम्ही स्वप्न पाहण्याची हिंमत तर दिलीच पण ती स्वप्ने पूर्ण करण्यास मदत केली. तुम्हा सर्वांचे मनःपूर्वक आभार.
ती पुढे म्हणते, ‘देशासाठी पदक जिंकणे हा माझ्यासाठी सर्वात मोठा सन्मान आहे. व्यासपीठावर उभे राहून जगभरात तिरंग्याचा सन्मान होत असल्याचे पाहणे ही माझ्यासाठी सन्मानाची गोष्ट आहे. हे लिहिताना माझ्या डोळ्यात पाणी येत आहे. माझा ग्रँडस्लॅम प्रवास 2005 मध्ये ऑस्ट्रेलियन ओपनने सुरू झाला. त्यामुळे माझ्या कारकिर्दीचा शेवट करण्यासाठी हा परिपूर्ण ग्रँडस्लॅम ठरेल. 18 वर्षांनंतरच्या माझ्या शेवटच्या ऑस्ट्रेलियन ओपनची आणि नंतर फेब्रुवारीमध्ये दुबई ओपनची तयारी करत असताना, मी खूप भावूक झाले आहे. माझ्या 20 वर्षांच्या व्यावसायिक कारकिर्दीत मी जे काही मिळवले आहे आणि ज्या काही आठवणी जमा केल्या त्यासाठी मी कृतज्ञ आहे.’ (हेही वाचा: India vs Spain Live Streaming: FIH पुरुष हॉकी 2023 मधील भारत विरुद्ध स्पेन यांच्यातील सामना कधी आणि कुठे येईल पाहता ?)
आता सानिया या महिन्यात ऑस्ट्रेलियन ओपनमध्ये महिला दुहेरीत कझाकस्तानच्या अना डॅनिलिनासोबत खेळेल आणि या ग्रँडस्लॅममध्ये तिचा शेवटचा सहभाग असेल. सहा ग्रँड स्लॅम जिंकण्याआधी आणि दुहेरीत जागतिक क्रमवारीत अव्वल क्रमांकाची खेळाडू होण्याआधी, तिची एकेरी कारकीर्दही उल्लेखनीय होती, ती जागतिक क्रमवारीत 27 व्या क्रमांकावर होती.
(The above story first appeared on LatestLY on Jan 13, 2023 07:24 PM IST. For more news and updates on politics, world, sports, entertainment and lifestyle, log on to our website latestly.com).
