QuickLY
Socially
Supreme Court On Terrorist Last Rites: जम्मू-काश्मीरमधील हैदरपोरा येथे सुरक्षा दलांसोबत झालेल्या चकमकीत मारला गेलेला दहशतवादी अमीर मॅग्रेचा मृतदेह बाहेर काढण्याची मागणी सर्वोच्च न्यायालयाने (Supreme Court) फेटाळली आहे. आमिरचे वडील लतीफ यांनी मुलाच्या मृतदेहाचे विधीवत अंत्यसंस्कार करण्याची परवानगी मागणारी याचिका दाखल केली होती. सोमवारी न्यायमूर्ती सूर्यकांत आणि न्यायमूर्ती बीएस परडीवाला यांच्या खंडपीठाने सांगितले की, जोपर्यंत हे न्यायाचे हित साधले जात आहे असे दिसत नाही तोपर्यंत मृतदेहाचे विघटन करण्याचा आदेश देता येणार नाही. नोव्हेंबर 2021 मध्ये दोन साथीदारांसोबत झालेल्या चकमकीत अमीर मारला गेला.
न्यायमूर्ती सूर्यकांत आणि न्यायमूर्ती जे. बी. पार्डीवाला यांच्या खंडपीठाने सांगितले की, एकदा मृतदेह दफन केल्यानंतर तो मृतदेह कबरीतून काढता येणार नाही. जम्मू-काश्मीरमधून मिळालेल्या माहितीनुसार, मृताचे संपूर्ण कायदा आणि सुव्यवस्थेसह अंत्यसंस्कार करण्यात आले आहेत. मृताच्या मृतदेहाचे योग्य प्रकारे दफन करण्यात आलेले नाही, ही बाब पूर्णपणे चुकीची असल्याचे न्यायालयाने म्हटले आहे. (हेही वाचा - अल्पवयीन मुलावर जबरदस्तीने लिंग बदल ऑपरेशन केल्याचा आरोप असलेल्या डॉक्टरांविरुद्धचा एफआयआर रद्द करण्यास Karnataka High Court चा नकार)
खंडपीठाने म्हटले आहे की, वडिलांच्या भावनांचा आम्ही आदर करतो, मात्र न्यायालय भावनांच्या आधारे खटल्यांचा निर्णय घेऊ शकत नाही. जम्मू-काश्मीर उच्च न्यायालयाचा निर्णय योग्य आहे. मोहम्मद लतीफ मॅग्रे यांनी दाखल केलेले अपील न्यायालयाने फेटाळून लावले. कुटुंबाला नुकसान भरपाई देण्याबाबत उच्च न्यायालयाच्या निर्देशांचे पालन करावे आणि त्यांना कबरीवर प्रार्थना करण्याची परवानगी द्यावी, असे निर्देश सर्वोच्च न्यायालयाने राज्य सरकारला दिले आहेत.
सुनावणीदरम्यान, जम्मू-काश्मीर प्रशासनाचे प्रतिनिधीत्व करणाऱ्या वकिलांनी सांगितले की, मृत व्यक्ती दहशतवादी होता. इस्लामिक रितीरिवाजांनुसार, त्यांचे अंतिम संस्कार करण्यात आले. जम्मू-काश्मीर प्रशासनाच्या वकिलांनी सांगितले की, या घटनेला आठ महिने उलटून गेले आहेत. मृतदेह काढल्यास कायदा आणि सुव्यवस्थेचा प्रश्न निर्माण होईल. जम्मू-काश्मीर प्रशासनाच्या वतीने वकील तरुणा अर्धेन्दुमौली प्रसाद उपस्थित होते.
दरम्यान, मॅग्रे यांनी आपल्या मुलाचा मृतदेह बाहेर काढू न देणाऱ्या जम्मू-काश्मीर उच्च न्यायालयाच्या आदेशाला आव्हान देत सर्वोच्च न्यायालयात धाव घेतली होती. गेल्या वर्षी 15 नोव्हेंबर रोजी श्रीनगरच्या बाहेरील भागात झालेल्या चकमकीत अमीर मॅग्रेसह चार जण ठार झाले होते. अधिवक्ता नुपूर कुमार यांच्यामार्फत ही याचिका दाखल करण्यात आली आहे.
